Oweruza
19 Panthawe yomwe mu Izirayeli mwenze mulibe mpfumu, Mulevi munango yemwe ambakhala kumapiri ku dera yakutali maninge ku Efuraimu, adalowola nyabasa wake ku Betelehemu, ku Yuda. 2 Koma nkazi moyu wenze wosakhulupirika ndipo adachoka nkuyenda kwa ababa wake ku Betelehemu wa ku Yuda. Iye adakhala kumoku kwa minyezi 4. 3 Pavidateno mwamuna wake moyu adayenda kukakambirana naye kuti abwerere. Paulendo moyu wenze na ntumiki wake komasoti abulu awiri. Padafika, nkazi moyu adangenesa mwamuna moyu m’nyumba mwa ababa wake ndipo ababa wake padamuwona adakondwa maninge. 4 Manje apongozi wake mwawo, ababa wake wa mtsikana moyu adamukumbira kuti apitirize kukhala kumuko kwa ntsiku zitatu ndipo ambadya, kumwa komasoti kugona kumuko.
5 Pantsiku ya 4, adamuka machibese nkukonzekera kuti anyamuke, koma ababa wa mtsikana muyo adauza nkomweni wawo muyo kuti: “Muyambe mwadya kuti mugumane mphanvu, patsogolo pake munganyamuke.” 6 Pamwapo adakhala pasi ndipo wose awiri adayamba kudya na kumwa. Patsogolo pake ababa wa mtsikana muyo adanena kuti: “Tani lero mugone muyende mangwana, ndipo mukondwe.” 7 Mwamuna muyo padaimirira kuti ambayende, ababa mwawo adapitiriza kumugwigwirira ndipo adagona pomwe.
8 Padamuka machibese ntsiku yachi 5 kuti ambayende, ababa wa ntsikana muyo adamuuza kuti: “Muyambe mwadya kuti mugumane mphanvu.” Pamwapo iwo adapitiriza kukhala muko mpakana maulo, ndipo wose awiri adapitiriza kudya. 9 Patsogolo pake mwamuna muyo adaimirira kuti ambayende pabodzi na nkazi wake komasoti ntumiki wake. Koma ababa wa mtsikana muyo adamuuza kuti: “Dzuwa inkuyenda kale kukachoma. Tani mugone pomwe? Kudoke manjemanje. Gonani ndipo mukondwe. Mangwana mungabesere nkumbayenda kumuyi* kwanu.” 10 Koma mwamuna muyo alibe kubvuma kuti agone pomwe. Pamwapo adanyamuka mpakana adayenda nkukafika pafupi na Yebusi yemwe adziwika pomwe kuti Yerusalemu. Paulendo moyu enze na abulu awiri wale, omwe enze na vishalo ndipo wenze pomwe na nkazi wake komasoti ntumiki wake.
11 Pomwe ambafendera ku Yebusi, dzuwa yenze idakhala pang’ono kuchoma ndipo ntumiki wake ule adamuuza kuti: “Tani tiyende mu thaundi ya Yebusi kuti tikagone kumoku?” 12 Koma ambuya wake mwawa adadawira kuti: “Osati tiyime muthaundi ya wanthu wachilendo omwe ni Aizirayelilini. Naboni tipitilire mpakana tikafike ku Gibeya.” 13 Adauza pomwe ntumiki wake muyo kuti: Naboni tiyesese tikafike ku Gibeya panango ku Rama ndipo tikagone kumuko” 14 Pamwapo adapitiriza ulendo wawo ndipo dzuwa idayamba kuchoma, pomwe ambafendera ku Gibeya mu dera ya Benjamim.
15 Padafika muthaundi ya Gibeya, adaima kuti agone momu ndipo adakhala nkati mwa thaundi mweyi. Koma palibe yemwe adawatenga kuti akagone kumuyi kwake. 16 Paidapita nthawe, mwamuna munango wachikulire adabwera maulo mwayo kuchokera kumunda. Mwamuna muyo wenze wa kudera ya mapiri ya Efuraimu, ndipo panthawe mweyi ambakhala ku Gibeya, koma wanthu wa muthaundi mweyi enze wa dzinza ya Benjamim. 17 Padanyang’ana, adawona mwamuna wa pa ulendo ule ali nkati mwa thaundi. Pamwapo mwamuna wachikulire ule adamubvunza kuti: “Unkuchoka kuponi, ndipo unkuyenda kuponi?” 18 Iye adadawira kuti: “Tinkuchokera ku Betelehemu wa ku Yuda ndipo tinkuyenda kudera ya mapiri yakutali maninge ya Efuraimu. Kumuko ndiko kwathu. Nenze nayenda ku Betelehemu wa ku Yuda ndipo manjeuno nikuyenda ku nyumba ya Yahova,* koma palibe yemwe wanitenga kuti nikagone kumuyi kwake. 19 Tiri na uswa wokwana komasoti chakudya chinango cha abulu wathu ndipo tiri na nkate, vinyu, vokwanira inepano, nkazi uyu komasoti ntumiki wathu uyu. Chirichose tinacho.” 20 Koma mwamuna wachikulire moyu adati: “Ntendere ukhale nawe! Ine nikupase chirichose chomwe ungafune. Koma osati ugone panja nkati mwa mpanda mwa thaundi mweyi.” 21 Padateno adatenga Mulevi ule nkuyenda naye ku nyumba kwake ndipo adapasa abulu wake wale chakudya. Patsogolo pake adasamba mapazi yawo nkuyamba kudya na kumwa.
22 Ali nkati mokondwa, amuna woipa wa muthaundi mweyo adazungulira nyumba mweyo nkuyamba kumenya nsuwo. Iwo ambauza mwamuna wachikulire muyo, munichiro wa nyumba mweyo, kuti: “Bulisa mwamuna yemwe wabwera mu nyumba yako kuti tigone naye.” 23 Munikachiro wa nyumba mwiyo adabula nkuwauza kuti: “Neye abale wangu, ayi kuchita voipa vimwevo, ndawa munthu moyu ni mulendo wangu. Ayi kuchita vinthu vochitisa manyazi tene. 24 Ninamwana nkazi yemwe ni namwali komasoti pali nyabasa nkazi wa mwamuna moyu. Tani nikuchosereni mwawa kuti muwachite vomwe mukufuna ivo? Koma mwamuna muyu ayi kumuchita vinthu vochitisa manyazi ninge mwevi.”
25 Koma wanthu mwawo, alibe kumubvera mwakuti Mulevi muyo adatenga nkazi wake n’kumupereka kwa wanthu mwawo. Wanthu mwawo adayamba kumuponderera komasoti kumudzudza usiku wose mpakana kunkuchena. Pakumbayamba kuchena adamusiya kuti ambayende. 26 Nkazi muyo padafika pa nyumba ya mwamuna wachikulire ule, momwe mwenze abwana wake adagwera pa nsuwo, ndipo adakhala pamwapo mpakana machibese. 27 Abwana wake padamuka machibese nkufungula misuwo ya nyumba mwiyo kuti apitirize ulendo wawo adawona nkazi ule aligone panja pa nyumba mwiyo manja yake yali pa nsuwo. 28 Manje adauza nkazi muyo kuti: “Muka timbayende.” Koma alibe kudawira. Pavidateno, adamupakiza pabulu nkumbayenda.
29 Padafika kwawo, adangena m’nyumba nkutenga chisu. Padateno adagwatagwata nkazi ule mapitsi 12 ndipo adatumiza pitsi ibodzi mudera iriyose ya Izirayeli. 30 Pavidateno, aliyese yemwe adawona vimwevi adati: “Vinthu ninge vimwevi vikanati vachitikako panango kuwoneka kuchokera pa ntsiku yomwe Aizirayeli adachoka ku dziko ya Iguputo mpakana lero. Nkhani mweyi muiganizire maninge,* mukambirane ndipo mutiuze vochita.”