Oweruza

21 Manje amuna wa Izirayeli adalumbira ku Mizipa kuti: “Aliyese wa isepano adzaperekelini mwana wake nkazi kuti alowodwe na mwamuna wa dzinza ya Benjamim.” 2 Manje wanthu mwawo adayenda ku Beteli nkukhala pasi pamaso pa Mulungu chaiye mpakana maulo. Iwo ambalira maninge mokuwa. 3 Iwo ambanena kuti: “Ndawa chani vimwevi vachitika mu Izirayeli, imwepo Yahova Mulungu wa Izirayeli? Ndawa chani lero dzinza ibodzi yasowa mu Izirayeli?” 4 Manje mangwana yake, wanthu mwawo adamuka machibese nkumanga guwa ya ntsembe ndipo adapereka ntsembe zoshoka na ntsembe za m’bverano.

5 Patsogolo pake Aizirayeli adati: “Pa madzinza yose ya Aizirayeli ni mbani yemwe alibe kubwera kudzasonkhana pamaso pa Yahova? Pakuti enze adalumbira kuti aliyese yemwe abwerelini kwa Yahova ku Mizipa aphewe shuwa. 6 Aizirayeli adayamba kubva ntsisi ndawa ya vomwe vidachitikira m’bale wawo Benjamim. Iwo adati: “Lero dzinza ibodzi yagwatiwa nkuchosewa mu Izirayeli. 7 Tichite tani kuti tiwagumanire akazi wanthu mwawa wakhala, pakuti tidalumbira pamaso pa Yahova kuti tiwapaselini wana wathu akazi kuti akhale akazi wawo?”

8 Adayamba kubvunzana kuti: “Pa madzinza yose ya Izirayeli ni mbani alibe kubwera pamaso pa Yahova ku Mizipa?” Manje adawona kuti palibe aliyese wochokera ku Yabesi-giliyadi yemwe adabwera kunsasa komwe kwenze gulu mweyo. 9 Padawerenga wanthu mwawo, adawona kuti penze palibe aliyese wochokera ku Yabesi-giliyadi. 10 Pamwapo, gulu ya Aizirayeli mwiyo idatumiza amuna wamphanvu maninge okwana 12 000. Adawalamula kuti: “Yendani, mukaphe na chibemba wanthu wa ku Yabesi-giliyadi ndipo mukaphe pomwe akazi na wana wawo. 11 Vomwe mukachite ni ivi: Mukaphe mwamuna aliyese na nkazi aliyese yemwe adagonako kale na mwamuna.” 12 Ku Yabesi-giliyadi adagumanako atsikana 400, omwe enze anamwali mwakuti enze akalibe agonako na mwamuna. Atsikana mwawa adabwera nawo ku nsasa ku Silo mudziko ya Kanani.

13 Manje gulu mweyo idatumiza mawu kwa wanthu wa dzinza ya Benjamim omwe enze ku mwala wa Rimoni wale ndipo adawapolomisa ntendere. 14 Pamwapo wanthu wa dzinza ya Benjamim wale adabwerera ndipo adawapasa akazi wa ku Yabesi-giliyadi omwe alibe kuphewa wale. Koma akazi mwawo ambakwanalini. 15 Wanthu mwawa ambabva ntsisi ndawa ya vomwe vidachitikira dzinza ya Benjamim, ndawa Yahova adachitisa kuti madzinza ya Aizirayeli yagawanike. 16 Manje akulu wa Izirayeli adanena kuti: “Pakuti akazi wose wa dzinza ya Benjamim adaphewa, tichite tani kuti amuna omwe akhala awa tiwagumanire akazi?” 17 Pamwapo anango adadawira kuti: “Pankufunika kukhala chuma cha banja kwa wanthu wa dzinza ya Benjamim omwe apulumuka kuti osati pakhale dzinza yomwe yapfudziwa mu Izirayeli. 18 Koma ise tinkubvumiziwalini kuwapasa wana wathu akazi kuti akhale akazi wawo, ndawa Aizirayeli adalumbira kuti: ‘Aliyese wopereka nkazi kwa mwamuna wa dzinza ya Benjamim ni wotembererewa.’”

19 Pamwapo adati: “Pale ku Silo kuchitika chikondwerero cha Yahova gole iriyose. Thaundi ya Silo iri ku norte* kwa Beteli, cha ku machibese kwa nsewu ukulu wochokera ku Beteli kuyenda ku Sekemu, na ku sul kwa Lebona.” 20 Pamwapo adalamula wanthu wa dzinza ya Benjamim kuti: “Yendani, mukabishale m’minda ya uva. 21 Manje mukakawona atsikana wa ku Silo akubwera kudzavina kavinidwe kawo kozungulira, aliyese adzabule m’minda ya uva mwayo, nkuphata mtsikana pakati pa atsikana wa ku Silo, ndipo akayende naye ku dera ya Benjamim kuti akakhale nkazi wake. 22 Ababa wawo panango azilongosi wawo akadzabwera kudzadandaula, tidzawauze kuti: ‘Tibvereni ntsisi, naboni tiwathandize, ndawa panthawe ya nkhondo, tiribe kukwanisa kuphata akazi okwana amuna wose wa dzinza ya Benjamim. Ndipo imwepombo mudakawapasalini akazi, iwo nkukhala alibe mulandu.’”

23 Pamwapo wanthu wa dzinza ya Benjamim adachitadi vimwevo. Ndipo aliyese adatenga nkazi pa akazi omwe ambavina. Padateno, adabwerera kumalo yawo ndipo adamanga pomwe mathaundi yale nkumbakhalamo.

24 Aizirayeli adayamba kumwazikana kuchoka kumuko ndipo aliyese adayenda ku dzinza yake na ku banja yake. Iwo adachoka kumuko mwakuti aliyese adayenda ku malo yake.

25 Ntsiku mwizo mu Izirayeli mwenze mulibe mpfumu. Aliyese ambandochita vomwe ankuona kuti ni vabwino.