Oweruza
2 Patsogolo pake mngelo wa Yahova adanyamuka ku Giligala nkuyenda ku Bokimu, ndipo adati: “Nidakubulisani mu Iguputo nkukungenesani mudziko yomwe nidalumbirira azibereki wanu. Nidanena soti kuti: ‘Nidzalekelini kukwanirisa pangano yangu kwa imwepo. 2 Imwepo ayi kuchita pangano na wanthu okhala mudziko mweyi, ndipo mugwese maguwa yawo yantsembe.’ Koma imwepo mulibe kubvera mawu yangu. Ndawa chani mwachita vimwevi? 3 Ndipomwapa nidanena kuti: ‘Nidzawathamangiselini pamaso panu, koma adzakukasheni, ndipo milungu yawo idzakusokonezeni.’”
4 Mngelo wa Yahova padauza Aizirayeli mawu mwaya, wanthu mwawo adayamba kulira mokuwa. 5 Ndipomwapa malo mwaya adayapasa dzina yakuti Bokimu,* ndipo adaperekapo ntsembe kwa Yahova.
6 Yoswa padauza Aizirayeli mwawo kuti ambayende, aliyese adayenda komwe kwenze malo yake, kukatenga dziko mwiyo kukhala yawo. 7 Wanthu mwawo adapitiriza kutumikira Yahova ntsiku zose zomwe Yoswa wenze na moyo, komasoti ntsiku zose za akulu omwe adapitiriza kukhala na moyo Yoswa padamwalira, omwe adawona vinthu vikuluvikulu vomwe Yahova adachitira Aizirayeli. 8 Patsogolo pake Yoswa ntumiki wa Yahova, mwana wa Nuni, adamwalira ali na magole 110. 9 Ndipo adamuikha m’manda ku Timinati-heresi mu dera yomwe adatambira ninge mbali yake, mu dera ya mapiri ya Efuraimu, ku norte* kwa phiri ya Gaasi. 10 Wanthu wose wa m’badwo muyo adamwalira, ndipo padabwera m’badwo unango womwe umbadziwalini Yahova panango vomwe iye adachitira Aizirayeli.
11 Pamwapo Aizirayeli adayamba kuchita vinthu voipa pamaso pa Yahova ndipo adayamba kutumikira* Abaala. 12 Iwo adasiya Yahova, Mulungu wa azibereki wawo yemwe adawabulisa mudziko ya Iguputo nkuyamba kutumikira milungu ya wanthu omwe enze nawo pafupi. Adayamba kugwadira milungu mwayo ndipo adakalipisa Yahova. 13 Adasiya Yahova nkuyamba kutumikira Baala na vifaniziro va Asitoreti. 14 Pavidateno Yahova adakalipa nawo maninge Aizirayeli, mwakuti adawapereka m’manja mwa azondi wawo nkumenyana nawo na kuwatengera vinthu vawo. Iye adawagulisa kwa azondi wawo omwe adawazungulira mwakuti alibe kukwanisa kulimbana nawo. 15 Kulikose komwe ambayenda, djanja ya Yahova imbawaboneresa na kuwabweresera tsoka, mobverana na vomwe Yahova adanena, komasoti vomwe Yahova adawalumbirira, mwakuti iwo ambabonera maninge. 16 Pavidateno, Yahova ambawapasa oweruza omwe ambawapulumusa m’manja mwa azondi wawo.
17 Koma Aizirayeli ambawabveralini oweruza mwawo. Iwo ambachita uhule na milungu yanango na kuyagwadira. Adasiya mwakankulumize njira yomwe azibereki wawo ambafambamo. Azibereki wawo ambabvera malamulo ya Yahova, koma iwo alibe kuchita vimwevi. 18 Yahova akawapasa woweruza, Yahova ambakhala na woweruza muyo, ndipo ambawapulumusa m’manja mwa azondi wawo panthawe yose ya woweruza muyo. Yahova ambawabvera ntsisi akabva kulira kwawo ndawa ya wanthu omwe ambawatonga mosowa chilungamo komasoti kuwachitira nkhanza.
19 Koma woweruza akamwalira, iwo ambayamba pomwe kuchita voipa kuposha azibereki wawo. Ambatewera milungu yanango, kuyatumikira na kuyagwadira. Iwo alibe kusiya vochita vawo ivo komasoti ukambulamatu wawo. 20 Pamapeto pake, Yahova adakalipa nawo maninge Aizirayeli ndipo adati: “Pakuti mtundu muyu ulibe kutewedza pangano yangu yomwe nidalamula azibereki wawo kuti aitewedze, ndipo alibe kunibvera, 21 inepano nithamangiselini pomwe ntundu uliwose pamaso pa mitundu yomwe Yoswa adayasiya pomwe ambamwalira. 22 Nichite vimwevi kuti niyese Aizirayeli kuti niwone peno angabvere malamulo ya Yahova potewedza malamulo mwayo ninge momwe azibereki wawo adachitira.” 23 Pamwapo, Yahova adabvuma kuti mitundu mwaya yapitirize kukhalapo. Alibe kuyathamangisa kamangu komasoti alibe kuyapereka m’manja mwa Yoswa.