Oweruza
3 Yahova adabvuma kuti mitundu yomwe yali m’nyantsi aya yapitirize kukhala mudziko mwiyi na cholinga chakuti yayese Aizirayeli wose omwe enze akanati kuwonako nkhondo zomwe ntundu muyo udamenya ku Kanani. 2 (Adachita vimwevi kuti mibadwo ya Aizirayeli yomwe yenze yakanati kuwonako nkhondo, yapfunzire na kudziwa kumenya nkhondo.) 3 Mitundu yake yenze wolamulira 5 wa Afilisiti, Akanani wose, Asidoni komasoti Ahivi okhala m’phiri ya Lebanoni, kuchokera ku phiri ya Baala-herimoni mpakana ku Lebo-hamati.* 4 Mulungu adaphatisa basa mitundu mwaya poyesa Aizirayeli kuti awone peno angabvere malamulo yomwe Yahova adapereka kwa azibereki wawo pakuphatisa basa Mose. 5 Manje Aizirayeli ambakhala pabodzi na Akanani, Ahiti, Aamori, Aperezi, Ahivi na Ayebusi. 6 Aizirayeli ambalowola wana akazi wa Akanani ndipo ambatenga pomwe wana wawo wachikazi nkuwapereka kwa wana wachimuna wa Akanani mwawo, ndipo Aizirayeli adayamba kutumikira milungu ya Akanani.
7 Pamwapo Aizirayeli adayamba kuchita vinthu voipa pamaso pa Yahova ndipo adayebwa Yahova Mulungu wawo. Iwo ambatumikira pomwe Abaala komasoti vipilala vopatulika.* 8 Pavidateno, Yahova adakalipa nawo maninge Aizirayeli, ndipo adawapereka* kwa Kusani-risataimu, mpfumu ya Mesopotamiya.* Aizirayeli adatumikira Kusani-risataimu kwa magole 8. 9 Aizirayeli padalirira Yahova kuti awathandize, Yahova adawapasa munthu kuti awapulumuse. Munthu wake wenze Otiniyeli, mwana mwamuna wa Kenazi, mng’ono wake wa Kalebe. 10 Mzimu wa Yahova umbamuthandiza ndipo adakhala woweruza wa Izirayeli. Padayenda ku nkhondo, Yahova adapereka Kusani-risataimu mpfumu ya Mesopotamiya* m’manja mwake, mwakuti adamuwina. 11 Pavidateno dziko idakhala pa ntendere kwa magole 40. Patsogolo pake Otiniyeli, mwana wa Kenazi, adamwalira.
12 Aizirayeli adayamba pomwe kuchita vinthu voipa pamaso pa Yahova. Pamwapo Yahova adabvuma kuti Egiloni mpfumu ya Mowabu ambabonerese Aizirayeli, ndawa adachita vinthu voipa pamaso pa Yahova. 13 Kuingizira pamwapo, adachitisa kuti Aamoni na Aamaleki alimbane na Aizirayeli. Iwo adamenyana na Aizirayeli nkuwatengera thaundi ya miti ya kanjedza. 14 Aizirayeli adatumikira Egiloni, mpfumu ya Mowabu kwa magole 18. 15 Patsogolo pake Aizirayeli adalilira Yahova kuti awathandize. Pamwapo Yahova adawapasa Ehudi mwana wa Gera kuti awapulumuse. Ehudi wenze munthu yemwe ambaphatisa basa maninge djanja yamadzere ndipo wenze wa dzinza ya Benjamim. Paidapita nthawe, Aizirayeli adatumiza mtsonkho wawo kwa Egiloni mpfumu ya Mowabu, ndipo Ehudi ndiye adayenda kukapereka mtsonkho muyo. 16 Ehudi wenze adakonza chibemba chakuthwa kosekose, chenze talimphe 44,5 sentimetro,* ndipo adachimangirira m’chiuno mbali yakumakulu, nkati mwa chovala chake. 17 Padafika kwa Egiloni mpfumu ya Mowabu, adapereka mtsonkho ule. Egiloni wenze munthu wonenepa maninge.
18 Ehudi padapereka mtsonkho ule, iye pabodzi na omwe adanyamula mtsonkho ule adanyamuka nkumbayenda. 19 Koma padafika pamalo pomwe penze mafano yosema yomwe yenze ku Giligala, adabwerera kwa mpfumu nkunena kuti: “Pepani mpfumu, niri na ntontholo wachintsintsi kuti nikuuzeni.” Ndipo mpfumu mwiyo idati: “Tipaseni mpata!” Padanena vimwevi, atumiki wose wa mpfumu mwiyo adabula. 20 Ehudi adafenderera mpfumu ire iri yokhayokha muchipinda chozizira bwino cha m’dzulu. Pamwapo iye adati: “Ntontholo womwe ninawo ni wochokera kwa Mulungu.” Padateno, mpfumu ire idaimirira pa mpando wake wachifumu. 21 Manje Ehudi pakuphatisa basa djanja yake yamadzere, adasolola chibemba chomwe chenze m’chiuno mwake kumakulu nkulasa nacho Egiloni m’mimba. 22 Chibemba chire chidangena na chophatira chake ndipo mafuta yadabisa chibemba chire ndawa alibe kuchizula m’mimba mwake umo, ndipo matuvi yadayamba kubula. 23 Pavidateno, Ehudi adabula na pa janela, koma wenze adafunga na kukhiya misuwo ya chipinda cha m’dzulu. 24 Iye padabula, atumiki wa Egiloni adabwera ndipo adagumana kuti misuwo ya chipinda cha m’dzulu ni yokhiya. Pamwapo iwo adati: “Panango wayenda mu chimbudzi mu chipinda chozizira bwino cha nkati.” 25 Iwo adadikhira mpakana kukhala na nkhawa ndawa adawona kuti mpfumu ikufungulalini misuwo ya chipinda cha m’dzulu. Pamwapo adatenga khiyi nkufungula misuwo mwayo ndipo adandowona kuti mpfumu yawo yafa iri thaphsa pasi.
26 Iwo akuganizira vomwe vachitika, Ehudi adathawa ndipo adapita na pomwe penze mafano yosema nkukafika bwinobwino ku Seira. 27 Padafika kumuko adaliza lupenga ya nyanga ya nkhosa mudera ya mapiri ya Efuraimu. Pamwapo Aizirayeli adapolika naye pabodzi kuchokera mu dera ya mapiri mwiyo ndipo iye ambawatsogolera. 28 Pamwapo adawauza kuti: “Nitewereni, ndawa Yahova wapereka azondi wanu Amowabu m’manja mwanu.” Padateno, adamutewera kukatchingiriza Amowabu pa malo yoyambukira kamadzi ka Yorodano, ndipo alibe kubvuma kuti aliyese ayambuke. 29 Panthawe mwiyo adapha Amowabu pafupifupi 10 000. Wose enze masocha yamphanvu komasoti yolimba ntima, koma palibe olo m’bodzi yemwe adapulumuka. 30 Pantsiku mwiyo, Aizirayeli adawina Amowabu, ndipo dziko mwiyo idakhala pa ntendere kwa magole 80.
31 Padachoka Ehudi, padabwera Samagara mwana wa Anati. Moyu adapha amuna 600 wa Chifilisiti na kamuti kosongoka* kodjinyira ng’ombe pakuzitchaira. Moyu adapulumusambo Aizirayeli.