Oweruza

1 Yoswa padamwalira, Aizirayeli* adabvunza Yahova kuti: “Mbani wa isepano wati ayambe kuyenda kukamenyana na Akanani?” 2 Yahova adadawira kuti: “Ayambe ni Yuda, ndipo napereka* dziko mwiyo m’manja mwake.” 3 Pamwapo Yuda adauza m’bale wake Simiyoni kuti: “Nabo tiyende pabodzi mu gawo yangu kuti tikamenyane na Akanani. Patsogolo pake inembo nidzayende nawe ku gawo yako.” Pamwapo Simiyoni adayenda naye.

4 Dzinza ya Yuda paidayenda, Yahova adapereka Akanani na Aperezi m’manja mwawo, mwakuti adawina amuna 10 000 ku Bezeki. 5 Adagumana Adoni-bezeki ku Bezeki nkumenyana naye ndipo adawina Akanani na Aperezi. 6 Adoni-bezeki padayamba kuthawa, adamuthamangisa nkumuphata ndipo adamugwata vala vikuluvikulu vakumanja na vakuminyendo. 7 Pavidateno, Adoni-bezeki adati: “Pali mafumu 70 yogwatiwa vala vikuluvikulu vakumanja na vakuminyendo, yomwe yambalokotera vakudya kuntsi kwa meza yangu. Mulungu wanibwezera vomwe nidachita.” Patsogolo pake adamuyendesa ku Yerusalemu ndipo adafera kumuko.

8 Amuna wa dzinza ya Yuda adamenyana pomwe na thaundi ya Yerusalemu nkuitenga. Adapha wanthu wokhala muthaundi mumo na chibemba, ndipo thaundi mwiyo adaishoka na moto. 9 Patsogolo pake amuna wa dzinza ya Yuda adayenda kukamenyana na Akanani omwe ambakhala mu dera ya mapiri, ku Negebu na ku Sefela. 10 Pamwapo dzinza ya Ayuda idayenda kukamenyana na Akanani omwe ambakhala ku Heburoni, (pakuyamba dzina ya thaundi ya Heburoni yenze Kiriyati-ariba). Iwo adapha Sesai, Ahimani na Talimai.

11 Padachoka kumuko adayenda kukamenyana na wanthu wa muthaundi ya Debiri. (Pakuyamba dzina ya thaundi ya Debiri yenze Kiriyati-seferi.) 12 Patsogolo pake Kalebe adanena kuti: “Aliyese yemwe awine thaundi ya Kiriyati-seferi nkuitenga, nidzamupase mwana wangu Akisa, kuti akhale nkazi wake.” 13 Ndipo Otiniyeli mwana wa Kenazi, mng’ono wake wa Kalebe, adatenga thaundi mwiyo. Pamwapo Kalebe adamupasa Akisa mwana wake kuti akhale nkazi wake. 14 Pomwe Akisa ambayenda ku muyi kwa mwamuna wake Otiniyeli, adauza mwamuna wake muyo kuti akumbire munda kwa ababa wake a Kalebe. Pamwapo Akisa adabuluka pa bulu. Padateno, Kalebe adamubvunza kuti: “Ukufuna chani?” 15 Iye adakumbira kuti: “Nidaliseni, pakuti mwanipasa dera ya ku sul* munipase pomwe Guloti-maimu.”* Pamwapo Kalebe adamupasa Guloti Wakuntunthu na Wakuphompho.

16 Pamwapo mwana wa munthu wa khaindi ya Chikeni, yemwe wenze mpongozi wake wa Mose, adabula muthaundi ya miti ya kanjedza pabodzi na wanthu wa ku Yuda, nkukangena muchipululu cha Yuda, ku sul kwa Aradi. Ndipo iwo adayamba kukhala pabodzi na wanthu mwawo. 17 Koma dzinza ya Yuda idapitiriza kuyenda na azibale wawo wa dzinza ya Simiyoni, ndipo adapha Akanani omwe ambakhala ku Zefati nkudzonga thaundi mwiyo. Pamwapo thaundi mwiyo adaipasa dzina yakuti Horima.* 18 Patsogolo pake dzinza ya Yuda idatenga Gaza na madera yake, Asikeloni na madera yake komasoti Ekironi na madera yake. 19 Yahova wenze pabodzi na dzinza ya Yuda mwakuti idatenga dera ya mapiri. Koma iribe kukwanisa kuthamangisa wanthu okhala m’chigwa ndawa yakuti wanthu mwawo enze na ngolo zankhondo zomwe zenze na visimbi vitalivitali komasoti vakuthwa. 20 Adapereka dera ya Heburoni kwa Kalebe ninge momwe Mose adapolomisira, ndipo Kalebe adathamangisa wana wa Anaki atatu amuna omwe ambakhala kumuko.

21 Wanthu wa dzinza ya Benjamim alibe kuthamangisa Ayebusi wa ku Yerusalemu, mwakuti Ayebusi mwawo ankupitiriza kukhala na wanthu wa dzinza ya Benjamim ku Yerusalemu mpakana lero.

22 Panthawe mwiyi, wana wa Yosefe adayenda kukamenyana na wanthu wa muthaundi ya Beteli ndipo Yahova wenze nawo. 23 Wana wa Yosefe adayamba kuchita mapulani ya momwe angawinire thaundi ya Beteli. (Pakuyamba dzina ya thaundi mweyi yenze Luzi.) 24 Manje wanthu omwe ambachita mapulani wale adawona munthu munango ankubula mu thaundi mweyi, ndipo adamuuza kuti: “Tiuze momwe tingangenere mu thaundi mweyi, ndipo tikuphelini.”* 25 Iye adawauza momwe iwo angangenere mu thaundi mwiyo, ndipo iwo adapha wanthu wa muthaundi mumo na chibemba, koma mwamuna muyo na wanthu wose wa m’banja mwake alibe kuwapha. 26 Patsogolo pake mwamuna muyo adayenda ku dziko ya Ahiti na kumanga thaundi ndipo adaipasa dzina yakuti Luzi. Mpakana lero thaundi mweyi idziwika na dzina mweyi.

27 Manase alibe kutenga thaundi ya Beti-seani na miyi yake yozungulira komasoti Taanaki na miyi yake yozungulira. Alibe kuthamangisa pomwe wanthu okhala muthaundi ya Dori na miyi yake yozungulira, wanthu wa muthaundi ya Ibuleamu na miyi yake yozungulira na wanthu okhala muthaundi ya Megido na miyi yake yozungulira. Akanani mwawo adapitiriza kungingimira kukhala mu dziko mweyi. 28 Aizirayeli padakhala na mphanvu, adayamba kuwaphatisa basa ya ukapolo Akanani mwawo, koma alibe kuwachoseratu wose mu dziko mwiyo.

29 Nayombo dzinza ya Efuraimu iribe kuthamangisa Akanani omwe ambakhala ku Gezeri, mwakuti Akanani mwawo adapitiriza kukhala pakati pawo ku Gezeri muko.

30 Dzinza ya Zebuloni iribe kuthamangisa wanthu omwe ambakhala muthaundi ya Kitironi na thaundi ya Nahaloli, mwakuti Akanani mwawo adapitiriza kukhala pakati pawo ndipo wa dzinza ya Zebuloni adayamba kuwaphatisa basa ya ukapolo Akanani mwawo.

31 Dzinza ya Aseri iribe kuthamangisa wanthu omwe ambakhala ku Ako na wanthu omwe ambakhala ku Sidoni, Arabu, Akizibu, Heliba, Afiki na ku Rehobu. 32 Mwakuti dzinza ya Aseri idapitiriza kukhala na Akanani omwe ambakhala mu dziko mwiyo, ndawa alibe kuwathamangisa.

33 Dzinza ya Nafitali iribe kuthamangisa wanthu omwe ambakhala m’mathaundi ya Beti-semesi na Beti-anati, koma iwo adapitiriza kukhala na Akanani wakumuko. Ndipo dzinza ya Nafitali idayamba kuphatisa basa ya ukapolo wanthu omwe ambakhala m’mathaundi ya Beti-semesi na Beti-anati.

34 Aamori ambapanikizira wanthu wa dzinza ya Dani ku dera ya mapiri ndipo alibe kuwabvumiza kuti apolikire muchigwa. 35 Pamwapo Aamori adangingimira kukhala m’phiri ya Herese na m’mathaundi ya Aijaloni na Saalibimu. Koma pomwe wana wa Yosefe adayamba kukhala na mphanvu zizinji, adayamba kuwaphatisa basa ya ukapolo Aamori mwawo. 36 Dera ya Aamori idayambira ku dera yotunthumuka ya Akirabimu, komasoti ku Sela kuyenda chakuntunthu.