Oweruza

18 Muntsiku mwezo mu Izirayeli mwenze mulibe mpfumu. Ndipo panthawe mweyi dzinza ya Dani imbafuna malo yakuti ikakhaleko, ndawa yenze ikanati yatambira malo yawo pakati pa madzinza ya Izirayeli.

2 Wanthu wa dzinza ya Dani adatumiza amuna 5 wa m’banja yawo, amuna olimba ntima ochokera ku Zora na ku Esitaoli kuti akafagefage va malo mwayo. Adawauza kuti: “Yendani mukafagefage va malo mwayo.” Padafika kudera yamapiri ya Efuraimu, kunyumba ya Mika, adagona kumuko. 3 Pomwe ambafika pa nyumba ya Mika adabva Mlevi wachilumbwana ule ankuyankhula ndipo adazindikira mawu yake.* Pamwapo adayenda kunyumba muko nkumubvunza kuti: “Ko wabwera na mbani kuno ndipo wabwera kudzatani? Unkufunako chani kuno?” 4 Iye adadawira kuti: “Tidapangana na Mika kuti aninembe basa yakuti nikhale wantsembe wake.” 5 Pamwapo iwo adamuuza kuti: “Tibvunzire kwa Mulungu kuti tidziwe peno ulendo wathu muyu tifambe bwino.” 6 Wantsembe muyo adawauza kuti: “Yendani, ayi kudandaula. Yahova ali namwe pa ulendo moyu.”

7 Pamwapo amuna 5 wale adapitiriza ulendo wawo ndipo adafika muthaundi ya Laisi. Adawona kuti wanthu wa muthaundi mwiyo ambakhala mosathemba aliyese, ninge momwe ambakhalira Asidoni. Iwo ambakhala mosagunduzika ndipo palibe yemwe adawawina nkumbawalamulira mwankhanza panango kuwasokoneza. Ambakhala kutali maninge na Asidoni ndipo ambafambiranalini na wanthu anango.

8 Padabwerera kwa abale wawo ku Zora na ku Esitaoli, abale wawo mwawo adawabvunza kuti: “Mwafamba tani?” 9 Iwo adadawira kuti: “Naboni tiyende tikamenyane nawo, ndawa isepano tawona kuti malo mwayo ni yabwino maninge. Ayi kuti tiwayewaye. Ayi kuti muchebwe, naboni tiyende tikatenge malo mwayo kuti yakhale yathu. 10 Mukakafika, mukagumane wanthu okhala mosagunduzika ndipo malo yake ni yakulu maninge. Malo mwayo ni yosasowa kalikose kogumanika padziko yapasi, ndipo Mulungu wakupasani.”

11 Pavidateno, amuna 600 okhala na vitsulo va nkhondo, ochokera m’banja ya Dani, adanyamuka ku Zora na ku Esitaoli. 12 Wanthu mwawa adayenda kukamanga nsasa ku Kiriyati-yearimu ku Yuda. Ndipomwapa malo mwaya, yomwe yali kumaulo kwa Kiriyati-yearimu, yadziwika kuti Mahane-dani* mpakana lero. 13 Padachoka pamwapo, adakafika kudera yamapiri ya Efuraimu ndipo adayenda kumuyi kwa Mika.

14 Pamwapo amuna 5 omwe adayenda kukawona va thaundi ya Laisi wale, adauza abale wawo mwawo kuti: “Ko munkudziwa kuti mu nyumba izi muli efodi, aterafi,* chifaniziro chosema na chifaniziro chasimbi? Manje dziwani vochita.” 15 Pamwapo adapatukira kumuko nkufika panyumba ya Mlevi wachilumbwana ule, kumuyi kwa Mika ndipo adayamba kumubvunza va moyo wake. 16 Panthawe mweyi nkuti amuna 600 okhala na vitsulo vankhondo, wa dzinza ya Dani wale, ali imirire pansuwo wa mpanda. 17 Amuna 5 omwe adayenda kukawona malo wale adayenda kuti akatenge chifaniziro chosema, efodi, aterafi* na chifaniziro chasimbi. (Wantsembe ule wenze adaimirira pansuwo wa mpanda na amuna 600 okhala na vitsulo vankhondo wale.) 18 Iwo adangena munyumba ya Mika nkutenga chifaniziro chosema, efodi, aterafi* na chifaniziro chasimbi. Padateno wantsembe muyo adawabvunza kuti: “Ko munkuchita chani?” 19 Iwo adamudawira kuti: “Khala chete. Funga pakamwa pako ndipo uyende nase kuti ukakhale mulangizi* na wantsembe wathu. Ko chabwino ni chani kuti ukhale wantsembe munyumba ya munthu m’bodzi, nakuti ukakhale wantsembe wa banja na dzinza yose mu Izirayeli?” 20 Wantsembe muyo adabverana navo ndipo adatenga efodi, aterafi* na chifaniziro chosema nkunyamuka na wanthu mwawo.

21 Padateno adapitiriza ulendo wawo ndipo adaikha patsogolo wana, viweto na vinthu vodula maninge. 22 Padafamba kansenga kuchokera panyumba ya Mika, wanthu wa m’nyumba zapafupi na nyumba ya Mika adasonkhana nkuyamba kutewera wanthu wa dzinza ya Dani mpakana kuwagumana. 23 Padawachemera, wanthu wa dzinza ya Dani mwawo adachungunuka nkubvunza Mika kuti: “Ko bvuto yako ni chani? Ndawa chani mwatengana gulu teneuyu?” 24 Iye adadawira kuti: “Mwatenga milungu yangu yomwe nidakonza komasoti wantsembe. Ko inepano nikhale na chani? Manje munganibvunze tani kuti: ‘Bvuto yako ni chani?’” 25 Wanthu wa dzinza ya Dani adamuuza kuti: “Khala chete. Ayi kuti tibve pomwe mawu yako, ndawa wanthu okalipa* angakudzongeni ndipo panango angakuphe iwepo komasoti wanthu wa m’banja yako.” 26 Pavidateno wanthu wa dzinza ya Dani adapitiriza ulendo wawo ndipo Mika padawona kuti wanthu mwawo enze na mphanvu kuposha iye, adandochungunuka nkumbayenda kumuyi kwake.

27 Wanthu wa dzinza ya Dani padatenga vomwe Mika adakonza komasoti wantsembe wake, adapitiriza ulendo wawo wa ku Laisi kukamenyana na wanthu osagunduzika wale. Padafika kumuko adapha wanthu mwawo na chibemba nkushoka thaundi mweyo. 28 Iwo enze alibe owapulumusa ndawa thaundi mwiyo yenze kutali na Sidoni ndipo ambafambiranalini na wanthu anango. Komasoti thaundi mwiyo yenze muchigwa cha Beti-rehobu. Pamwapo wanthu wa dzinza ya Dani adamanga pomwe thaundi mwiyo nkumbakhalamo. 29 Kuingizira mwapo, thaundi mwiyo adaipasa dzina yakuti Dani, kutengera dzina ya ababa wawo yakuti Dani, yemwe wenze mwana wa Izirayeli. Koma dzina yoyamba ya thaundi mweyi yenze Laisi. 30 Patsogolo pake wanthu wa dzinza ya Dani adaimisa chifaniziro chosema chire. Yonatani mwana wa Gerisomu, mwana wa Mose, komasoti wana wake adakhala antsembe wa dzinza ya Dani mpakana ntsiku yomwe wanthu okhala kumuko adatengewa kuyenda ku ukapolo. 31 Ndipo chifaniziro chosema chomwe Mika adakonza chidapitiriza kukhala pamwapo panthawe yose yomwe nyumba ya Mulungu chaiye yenze ku Silo.