Oweruza
17 Penze mwamuna munango wakudera yamapiri ya Efuraimu, dzina yake Mika. 2 Iye adauza amayi wake kuti: “Kobiri zanu zasiliva zokwana 1100 zomwe zidasowa zire ndipo mudatemberera munthu yemwe adaziba uyo inepano nikubva, ziri na inepano. Ndinepano yemwe nidatenga.” Padateno amayi wake mwawo adati: “Yahova akudalise mwana wangu.” 3 Pamwapo adabwezera kobiri zasiliva zokwana 1100 zire kwa amayi wake. Koma amayi wake wale adanena kuti: “Kobiri mwezi nizipereke kwa Yahova kuti zikhale zopatulika. Nikufuna kuti iwepo uphatise basa kobiri mwezi kukakonzesa chifaniziro chosema komasoti chifaniziro chasimbi. Ndipomwapa nikupase kobiri mwezi.”
4 Mika padabwezera kobiri mwezo kwa amayi wake, amayi wake mwawo adatenga kobiri zasiliva 200 nkuzipereka kwa wokonza siliva. Wokonza siliva muyo adakonza vifaniziro viwiri. Vifaniziro mwevi adaviikha m’nyumba ya Mika. 5 Mika wenze na nyumba ya milungu ndipo adakonza efodi na aterafi,* komasoti adapasa m’bodzi wa wana wake udindo wakuti akhale wantsembe wake. 6 Pa nthawe mwiyo mu Izirayeli mwenze mulibe mpfumu. Aliyese ambandochita vomwe ankuwona kuti ni vabwino.
7 Manje ku Betelehemu wa ku Yuda kwenze mulumbwana munango, wa m’banja ya Yuda. Iye wenze Mlevi ndipo adakhala kumuko kwa nthawe ikulu. 8 Mulumbwana muyo adachoka muthaundi ya Betelehemu wa ku Yuda, kuti akagumane malo yokhala. Ali pa ulendo moyu, adafika mudera yamapiri ya Efuraimu, kumuyi kwa Mika. 9 Manje Mika adamubvunza kuti: “Ko wachokera kuponi?” Iye adadawira kuti: “Ndine Mlevi, nachokera ku Betelehemu wa ku Yuda ndipo ninkufagafaga malo yokhala.” 10 Padateno Mika adamuuza kuti: “Tani umbakhale na inepano ndipo ukhale mulangizi* komasoti wantsembe wangu? Nimbakupase kobiri zasiliva 10 pa gole, vovala komasoti chakudya.” Padateno Mlevi muyo adangena m’nyumba. 11 Pamwapo Mlevi muyo adabvuma kukhala na Mika ndipo adakhala ninge m’bodzi wa wana wake. 12 Kuingizira mwapo, Mika adapasa Mlevi muyo udindo wakuti akhale wantsembe wake ndipo ambakhala m’nyumba ya Mika. 13 Patsogolo pake Mika adati: “Manje nadziwa kuti Yahova ambanichitire vabwino, ndawa wantsembe wangu ni Mlevi.”