Oweruza
10 Abimeleki padafa, padabwera Tola mwana wa Puwa yemwe wenze mwana wa Dodo wa dzinza ya Isakara ndipo adapulumusa Izirayeli. Iye ambakhala ku Samiri m’dera yamapiri ya Efuraimu. 2 Tola adaweruza Izirayeli kwa magole 23. Patsogolo pake adamwalira ndipo adaikhiwa ku Samiri.
3 Tola padamwalira, padabwera Yairi wa ku Giliyadi ndipo adatonga Izirayeli kwa magole 22. 4 Iye wenze na wana amuna 30 omwe aliyese ambafambira pa bulu wakewake ndipo iwo enze na mathaundi 30. Mpakana manjeuno mathaundi mwaya yadziwika kuti Havoti-yairi ndipo yali ku Giliyadi. 5 Patsogolo pake Yairi adamwalira ndipo adaikhiwa ku Kamoni.
6 Aizirayeli adayamba pomwe kuchita vinthu voipa pamaso pa Yahova, ndipo adayamba kutumikira Abaala, mafano ya Asitoreti, milungu ya ku Aramu,* milungu ya ku Sidoni, milungu ya ku Mowabu, milungu ya Aamoni na milungu ya Afilisiti. Iwo adasiya Yahova ndipo adaleka kumutumikira. 7 Pavidateno, Yahova adakalipa maninge ndawa ya Aizirayeli mwakuti adawapereka* kwa Afilisiti na kwa Aamoni. 8 Manje, wanthu mwawo adadzudza na kuboneresa maninge Aizirayeli gole mwiyo. Kwa magole 18, adaboneresa Aizirayeli wose omwe enze kumachibese kwa Yorodano, mudziko ya Aamori yomwe yenze ku Giliyadi. 9 Aamoni ambayambuka pomwe Yorodano kukamenyana na dzinza ya Yuda, ya Benjamim na ya Efuraimu, mwakuti Aizirayeli ambabonera maninge. 10 Pavidateno Aizirayeli adakumbira Yahova kuti awathandize. Iwo adati: “Takuchimwirani imwepo Mulungu wathu, ndawa tidakusiyani nkuyamba kutumikira Abaala.”
11 Koma Yahova adauza Aizirayeli kuti: “Ko niribe kukupulumusani pomwe Aiguputo, Aamori, Aamoni, Afilisiti, 12 Asidoni, Aamaleki na Amidiyani ambakuboneresani? Pomwe mudanilirira nidakupulumusani m’manja mwawo. 13 Koma mudanisiya nkuyamba kutumikira milungu yanango. Ndipomwapa, nikupulumusenilini pomwe. 14 Yendani, mukakumbire thandizo kwa milungu yomwe mwasankhula. Milungu mwayo yakupulumuseni panthawe yomwe munkubonera iyi.” 15 Koma Aizirayeli adauza Yahova kuti: “Tachimwa. Imwepo mutichite chirichose chomwe mukuwona kuti ni chabwino. Koma manjeuno pulizi tipulumuseni.” 16 Padateno, iwo adachosa milungu yose yachilendo yomwe enze nayo ndipo adayamba kutumikira Yahova, mwakuti iye alibe kubvuma kuti Aizirayeli apitirize kubonera.
17 Paidapita nthawe, Aamoni adasonkhana nkumanga nsasa wawo ku Giliyadi. Pavidateno, nawombo Aizirayeli adasonkhana nkumanga nsasa wawo ku Mizipa. 18 Manje wanthu na otsogolera wa ku Giliyadi adayamba kubvunzana kuti: “Ni mbani wati atitsogolere pakuyenda kukamenyana na Aamoni? Muyo akhaliretu mtsogoleri wa wanthu wose omwe akhala mu Giliyadi.”