Oweruza
11 Manje Yefita wa ku Giliyadi wenze nsocha wamphanvu. Amayi wake enze hule ndipo ababa wake enze Giliyadi. 2 Koma nkazi wa Giliyadi adamuberekera pomwe wana amuna. Wana mwawo padakula, adathamangisa Yefita nkumuuza kuti: “Iwepo udzatambirelini chuma cha ababa wathu, ndawa ndiwe mwana wa amayi anango.” 3 Pamwapo Yefita adathawa azibale wake mwawo ndipo adakakhala ku Tobu. Kumuko wanthu wosowa vochita adabverana na Yefita ndipo ambayenda naye pabodzi kukamenyana na azondi wawo.
4 Paidapita nthawe, Aamoni adayamba kumenyana na Aizirayeli. 5 Aamoni padayamba kumenyana na Aizirayeli, nthawe mweyo akulu wa ku Giliyadi adayenda kukatenga Yefita ku Tobu. 6 Iwo adauza Yefita kuti: “Nabo ukakhale mtsogoleri wa gulu yathu ya nkhondo ndipo tikamenyane na Aamoni.” 7 Koma Yefita adauza akulu wa ku Giliyadi mwawo kuti: “Ko ndimwepolini mumbazondana nane maninge mpakana kunithamangisa kumuyi kwa ababa wangu? Manje mwanifuna lero ndawa mwagumana na mabvuto?” 8 Akulu wa ku Giliyadi adadawira Yefita kuti: “Shuwadi, ndipomwapa tabwera kwa iwepo. Peno ungayende nase kukamenyana na Aamoni, ukhaliretu mtsogoleri wathu ku Giliyadi kose.” 9 Pamwapo Yefita adauza akulu wa ku Giliyadi kuti: “Peno munkunitenga kuti tikamenyane na Aamoni ndipo Yahova nkukanithandiza kuwawina, nidzakhaledi mtsogoleri wanu.” 10 Akulu wa ku Giliyadi adadawira Yefita kuti: “Yahova akhale mboni peno tidzachitelini mobverana na vomwe wanena ivi.” 11 Pamwapo Yefita adayenda na akulu wa ku Giliyadi ndipo wanthu adamuikha kukhala mtsogoleri wawo komasoti nkulu wa masocha. Manje Yefita adabwerezera pomwe kunena mawu yake yale pamaso pa Yahova ku Mizipa.
12 Patsogolo pake Yefita adatumiza mawu kwa mpfumu ya Aamoni yakuti: “Nakuyambani chani kuti mubwere kwathu kuno kudzamenyana nane?” 13 Manje mpfumu ya Aamoni idauza wanthu omwe adatumiwa na Yefita mwawo kuti: “Ni ndawa yakuti Aizirayeli adanitengera dziko yangu padachoka ku Iguputo. Adanitengera dziko mweyi kuyambira ku Arinoni nkukafika ku Yaboki mpakana pomwe ku Yorodano. Manje munibwezere dziko mweyi mwantendere.” 14 Koma Yefita adatumiza pomwe wanthu kwa mpfumu ya Aamoni 15 kukaiuza kuti:
“Yefita wanena kuti: ‘Aizirayeli alibe kutenga dziko ya Mowabu na dziko ya Aamoni 16 ndawa padachoka ku Iguputo adagwata muchipululu kukafika ku Nyanja Ifuwira mpakana ku Kadesi. 17 Patsogolo pake adatumiza mawu kwa mpfumu ya Edomu yakuti: “Tibvumizeni tindogwatako na mu dziko yanu,” koma mpfumu ya Edomu idalamba. Adatumiza pomwe mawu kwa mpfumu ya Mowabu, koma nayombo iribe kubvuma. Pamwapo Aizirayeli adapitiriza kukhala ku Kadesi. 18 Pambagwata muchipululu, adalambalala dziko ya Edomu na ya Mowabu. Adagwata chakumachibese kwa dziko ya Mowabu nkukamanga misasa muchigawo cha Arinoni. Iwo alibe kungena mudera ya Mowabu ndawa Arinoni ndiyo yenze malire ya Mowabu.
19 Patsogolo pake Aizirayeli adatumiza mawu kwa Sihoni mpfumu ya Aamori, ya ku Hesiboni, yakuti: “Tingapiteko na mu dziko yanu pakuyenda ku dziko yathu?” 20 Koma Sihoni alibe kukhulupirira kuti Aizirayeli ambafuna kundogwatirako mudziko yake. Pamwapo Sihoni adasonkhanisa wanthu wake wose nkumanga misasa ku Yahazi ndipo adayamba kumenyana na Aizirayeli mwawo. 21 Pavidateno, Yahova Mulungu wa Aizirayeli adapereka Sihoni na wanthu wake wose m’manja mwa Aizirayeli. Pamwapo adawawina nkutenga dziko yose ya Aamori omwe ambakhala kumuko. 22 Adatenga chigawo cha Aamori kuchokera ku Arinoni kukafika ku Yaboki komasoti kuchokera kuchipululu kukafika ku Yorodano.
23 Yahova Mulungu wa Aizirayeli ndiye adawina Aamori pamaso pa wanthu wake Aizirayeli, manje iwepo unkufuna kuwathamangisa? 24 Ko chirichose chomwe mulungu wako Kemosi wakupasa, ndicholini chomwe ukhala nacho? Ndipo isembo tithamangisa aliyese yemwe Yahova Mulungu wathu wamuthamangisa pamaso pathu. 25 Manje iwepo wasiyana paponi na Balaki mwana wa Zipori, mpfumu ya Mowabu? Ko iye adakwanisa kulimbana na Aizirayeli panango adayesa olo pang’ono kumenyana nawo? 26 Pomwe Aizirayeli ambakhala ku Hesiboni na m’mamiyi yake yozungulira, ku Aroweli na m’mamiyi yake yozungulira na m’mathaundi yose yam’mbalim’mbali mwa nyanja ku Arinoni kwa magole 300, ndawa chani mulibe kukwanisa kuwatengera mathaundi mwaya panthawe mweyo? 27 Inepano niribe kukuchimwira, koma iwepo unkuphonya ndawa unkuniyamba. Yahova yemwe ni Woweruza, aweruze lero pakati pa Aizirayeli na Aamoni.’”
28 Koma mpfumu ya Aamoni iribe kubvera mawu yomwe Yefita adatumiza.
29 Mzimu wa Yahova udapasa mphanvu Yefita ndipo adapita na mudera ya Giliyadi na ya Manase nkukafika mudera ya ku Mizipe wa ku Giliyadi. Padafika mudera ya ku Mizipe wa ku Giliyadi adapitiriza mpakana kukafika kwa Aamoni.
30 Pamwapo Yefita adapolomisa Yahova kuti: “Mukapereka Aamoni m’manja mwangu, 31 aliyese yemwe adzabule m’nyumba mwangu kudzanichunguzira pomwe ninkubwera mwantendere kuchokera kwa Aamoni, nidzamupereke kwa imwepo Yahova kuti akhale ntsembe yoshoka.”
32 Pavidateno, Yefita adayenda kukamenyana na Aamoni ndipo Yahova adawapereka m’manja mwake. 33 Iye adapha Aamoni azinji m’mathaundi 20, kuyambira ku Aroweli mpakana ku Miniti ndipo adafika pomwe ku Abele-kerami. Pamwapo Aizirayeli adawina Aamoni.
34 Patsogolo pake Yefita adabwerera kwawo ku Mizipa ndipo ali kunjira adandowona mwana wake nkazi ankubwera kudzamuchunguzira, ankuimba maseche* uku ankuvina. Iye wenze mwana m’bodzi yekha basi yemwe wenze naye. Wenze alibe pomwe mwana munango mwamuna panango nkazi. 35 Padandomuwona, adang’amba vovala vake nkunena kuti: “Mama ine mwana wangu! Vinkuniwawa maninge muntima mwangu ndawa ninkukuchosa pamuyi. Napolomisa kwa Yahova ndipo ningakwaniselini pomwe kubweza mawu yangu.”
36 Koma iye adati: “Ababa, peno mwapolomisa kwa Yahova, nichitireni mobverana na vomwe mwanena ivo, ndawa Yahova wakumenyerani nkhondo pobwezera azondi wanu Aamoni.” 37 Padateno adauza pomwe ababa wake mwawo kuti: “Nikundokumbira kuti munibvumize niyambe nachoka kwa minyezi yawiri, inepano na atsikana anzangu, niyende kumapiri kukalirira unamwali wangu.”*
38 Yefita adamudawira kuti: “Yenda!” Pamwapo adamubvumiza kuti achoke kwa minyezi yawiri. Iye na anzake mwawo adayenda kumapiri kukalirira unamwali wake. 39 Payadamala minyezi yawiri mwayo, adabwerera kwa ababa wake ndipo ababa wake mwawo adakwanirisa polomisi yawo yolewa va iye. Mtsikana moyu alibe kugonako na mwamuna. Manje vomwe vimbachitika mu Izirayeli ni vakuti, 40 gole iriyose, atsikana wa mu Izirayeli ambayenda kukatembeja mwana nkazi wa Yefita wa ku Giliyadi, maulendo 4 pa gole.