Oweruza

9 Paidapita nthawe, Abimeleki mwana wa Yerubaala, adayenda ku Sekemu kwa azimalume wake omwe enze azibale wawo wa amayi wake. Ndipo adawauza azimalume wake mwawo na wa m’banja yose ya ababa wa amayi wake kuti: 2 “Pulizi bvunzani azitsogoleri* wose wa ku Sekemu kuti: ‘Chabwino ni chani kwa imwepo, kuti wana wose 70 wa Yerubaala ambakutongeni, nakuti ambakutongeni ni munthu m’bodzi? Ndipo ayi kuyebwa kuti inepano na imwepo ndise magazi yabodzi.’”

3 Pamwapo azilongosi wa amayi wake wale adayenda kukauza azitsogoleri wose wa ku Sekemu vimwevi, ndipo mitima yawo yadayamba kutewera Abimeleki, ndawa adati: “Ni m’bale wathu peno moyu.” 4 Patsogolo pake iwo adatenga kobiri 70 mu kachisi wa Baala-beriti n’kumupasa. Abimeleki adaphatisa basa kobiri zimwezi pakunemba ganyu wanthu wachipiringu na wosowa vochita kuti ambamutewere. 5 Padateno adayenda kumuyi kwa ababa wake ku Ofira n’kukapha azibale wake, wana wachimuna okwana 70 wa Yerubaala, ndipo adawaphera pa mwala ubodzi. Yemwe adapulumuka wenze Yotamu yekha, mwana mng’ono pa wana amuna wa Yerubaala, ndawa wenze adabishala.

6 Patsogolo pake atsogoleri wose wa ku Sekemu na wanthu wose wa ku Beti-milo adasonkhana komwe kwenze chipilala pafupi na muti ukulu ku Sekemu. Kumuko adamuyikha Abimeleki kukhala mpfumu.

7 Yotamu padauziwa vomwe vidachitika, nthawe mwiyo adayenda padzulu pa phiri ya Gerizimu nkuyankhula mokuwa kuti: “Nibvesereni, imwe atsogoleri wa ku Sekemu, ndipo mukateno Mulungu akubvereni.

8 Penze miti yomwe yambafuna kusankhula mpfumu yawo. Pamwapo yadauza muti wa maolivi kuti: ‘Ukhale mpfumu yathu.’ 9 Koma muti wa maolivi muyo udadawira kuti: ‘Mufuna kuti nisiye kubulisa mafuta yomwe ayaphatisa basa pakutamanda Mulungu na wanthu n’kuyenda kuti nimbakagunduzike padzulu pa miti yanango?’ 10 Patsogolo pake miti mwayo yadauza muti wa nkuyu kuti: ‘Bwera ukhale mpfumu yathu.’ 11 Koma muti wa nkuyu muyo udadawira kuti: ‘Ko nisiye kunzuna kwangu na vipaso vangu vabwino ivi nkuyenda kuti nimbakagunduzike padzulu pa miti yanango?’ 12 Pamwapo miti mwayo yadauza muti wa uva kuti: ‘Bwera ukhale mpfumu yathu.’ 13 Muti wa uva uyo udadawira kuti: ‘Ko nisiye vinyu wangu unyowani womwe ukondweresa Mulungu na wanthu nkuyenda kuti nimbakagunduzike padzulu pa miti yanango?’ 14 Pakumalizira, miti yanango yose yadauza kamuti kaminga kuti: ‘Bwera ukhale mpfumu yathu.’ 15 Kamuti kaminga mwako kadauza miti yanango kuti: ‘Peno mukufuna kuti nikhale mpfumu yanu, bwerani kuti mudzabishale mu mthunzi wangu. Koma peno mukufunalini, moto ubule mwa ine n’kushoka miti ya mkungudza ya ku Lebanoni.’

16 Ko mukuwona kuti mwachita bwino kuyikha Abimeleki kukhala mpfumu? Ko mwachita vimwevi kuchokera pasi pa ntima? Manje Yerubaala na banja yake mwamuchitira vabwino? Ko vomwe mwamuchitira nivobverana na vomwe iye adachita? 17 Ababa wangu padakumenyerani nkhondo, adayikha moyo wawo pangozi kuti akupulumuseni kwa Amidiyani. 18 Koma imwepo lero mwachitira voipa banja ya ababa wangu ndipo mwapha wana wawo amuna 70 pa mwala ubodzi. Pamwateno mwayikha Abimeleki mwana wa kapolo wake nkazi, nkukhala mpfumu ya atsogoleri wa ku Sekemu ndawa yakuti ni m’bale wanu. 19 Peno mwachitira mwevi Yerubaala kuchokera pasi pa ntima ndipo munkuwona kuti mwachita bwino, kondwani na Abimeleki ndipo iyembo akondwe namwe. 20 Koma peno ntenolini, moto ubule mwa Abimeleki nkushoka atsogoleri wa ku Sekemu na wa ku Beti-milo, komasoti moto ubule mwa atsogoleri wa ku Sekemu na wa ku Beti-milo nkushoka Abimeleki.”

21 Patsogolo pake Yotamu adathawira ku Beere, ndipo adakhala kumuko ndawa yogopa m’bale wake Abimeleki.

22 Abimeleki adatonga Aizirayeli kwa magole yatatu. 23 Pamwapo Mulungu adabvuma kuti pakhale chizondo pakati pa Abimeleki na atsogoleri wa ku Sekemu, mwakuti azitsogoleri mwawo adayamba kuchitira Abimeleki vinthu viribe chilungamo. 24 Vimwevi vidachitika kuti wanthu womwe enze na mulandu wa magazi abwezerewe nkhanza zomwe adachitira wana amuna 70 wa Yerubaala. Vidachitika pomwe kuti Abimeleki alangiwe ndawa yakuti adapha azibale wake komasoti kuti atsogoleri wa ku Sekemu alangiwe ndawa yothandiza Abimeleki kuti aphe azibale wake. 25 Pamwapo atsogoleri wa ku Sekemu adatumiza wanthu kuti akamubishalire padzulu pa mapiri ndipo wanthu mwawo ambatenga vinthu va munthu aliyese yemwe wapitira njira mweyo. Paidapita nthawe, Abimeleki adauziwa vimwevi.

26 Patsogolo pake Gaala mwana wa Ebedi adabwera ku Sekemu pabodzi na abale wake ndipo atsogoleri wa ku Sekemu adayamba kumukhulupirira. 27 Iwo adayenda kumunda kukathyola uva nkuziponda, patsogolo pake adachita chikondwerero. Padateno, adangena m’nyumba ya mulungu wawo ndipo adayamba kudya, kumwa na kutemberera Abimeleki. 28 Manje Gaala mwana wa Ebedi adati: “Abimeleki ni mbani ndipo Sekemu ni mbani kuti timutumikire? Ko iye ni mwanalini wa Yerubaala ndipo ntumiki wake ni Zebulilini? Mbatumikirani wana wa Hamori ababa wa Sekemu. Koma isepano timbatumikire Abimeleki ndawa chani? 29 Adakati inepano ndine ninkutonga wanthu mwawa, sembe namuchosa kale Abimeleki.” Pamwapo adauza Abimeleki kuti: “Ingizira masocha yako ndipo ubwere tidzamenyane.”

30 Zebuli wonyang’anira chigawo padabva mawu ya Gaala mwana wa Ebedi, adakalipa maninge. 31 Pamwapo adatumiza wanthu mobisa* kuti akauze Abimeleki kuti: “Gaala mwana wa Ebedi na azibale wake abwera ku Sekemu ndipo akulimbikisa wanthu wa muthaundi mweyi kuti akupandukireni. 32 Imwepo na wanthu wanu mubwere usiku ndipo mukamubishalire kuthengo. 33 Manje mangwana dzuwa ikandodzabula mudzamuke nkumenya nkhondo muthaundi mweyi. Ndipo iye na wanthu omwe ali naye akandodzabula kuti adzamenyane namwe, mudzachite vose vamungakwanise kuti mumuwine.”

34 Manje Abimeleki na wanthu wose omwe enze naye adamuka usiku nkubishala kunja kwa thaundi ya Sekemu, aligawane magulu 4. 35 Gaala mwana wa Ebedi padabula nkuyima pa nsuwo wa thaundi, Abimeleki na wanthu omwe enze naye adabula pa malo yomwe enze adabishala. 36 Gaala padawona wanthu mwawo adauza Zebuli kuti: “Onani, kunkubwera wanthu kuchokera padzulu pa mapiri.” Koma Zebuli adati: “Ni wanthulini wale iwe, undowona vibvulibvuli va mapiri.”

37 Paidapita nthawe, Gaala adanena pomwe kuti: “Onani wanthu akubwera kuchokera pakatikati apo ndipo gulu ibodzi yapita na njira yoyenda ku muti ukulu wa Meyonenimu.” 38 Zebuli adamudawira kuti: “Ndiwelini umbadzikwiza kuti ‘Abimeleki ni mbanimbo kuti timbamutumikire? Amwawa ni wanthulini wale waudalamba? Manje yenda ukamenyana nawo tiwone.”

39 Manje Gaala adatsogolera azitsogoleri wa ku Sekemu nkuyamba kumenyana na Abimeleki. 40 Abimeleki adayamba kuthamangisa Gaala ndipo Gaala adathawa. Wanthu azinji adaphewa ndipo wanthu wakufa ambagumanika palipose mpakana kukafika kunsuwo wa thaundi.

41 Abimeleki adapitiriza kukhala ku Aruma, ndipo Zebuli adathamangisa Gaala na abale wake ku Sekemu. 42 Mangwana yake wanthu adayenda kunja kwa thaundi ndipo Abimeleki adauziwa va nkhani mweyi. 43 Padabva vimwevi adatenga wanthu wake nkuwagawa magulu yatatu ndipo adabishalira wanthu mwawo kuthengo. Padawona wanthu akubula mu thaundi mweyo, adayenda kukawapha. 44 Abimeleki na magulu yomwe wenze nayo adathamanga nkukayima pa nsuwo pa thaundi, koma magulu yawiri yadathamangira kwa wanthu omwe enze kunja kwa thaundi, ndipo adayamba kuwapha. 45 Pamwapo Abimeleki adamenyana na wanthu wa mu thaundi mweyo ntsiku yose nkuwatengera thaundi mweyo. Adapha wanthu womwe enze mu thaundi mumo ndipo adaigwesa nkuthira munyu padothi ya thaundi mweyo.

46 Atsogoleri wose womwe ambakhala mu nyumba ya mdzulu ya Sekemu padabva vimwevi, nthawe mwiyoletu adangena mu chipinda chotetezeka cha m’nyumba ya Eli-beriti. 47 Abimeleki padauziwa kuti atsogoleri wose womwe ambakhala m’nyumba ya mdzulu ya Sekemu asonkhana pabodzi, 48 iye pabodzi na wanthu wose womwe ambakhala naye adayenda ku phiri ya Zalimoni. Abimeleki adatenga mbadzo, nkugwata nthawi ya muti nkuyinyamula paphewa. Padateno adauza wanthu omwe enze naye kuti: “Vati muwone inepano nikuchita, imwembo muchitembo vimwevo mwakankulumize!” 49 Pamwapo aliyese adagwata nthawi yake nkutewera Abimeleki. Patsogolo pake aliyese adayikha nthawi mwezi* pachipinda chotetezeka mwicho nkuchigasa moto. Pamwapo wanthu wose omwe enze mu nyumba ya mdzulu ya Sekemu, amuna na akazi othamangira 1000, adafa.

50 Abimeleki adayenda ku Tebezi komwe adamenyana na wanthu wa mu thaundi mweyo nkuitenga. 51 Pakati pa thaundi mwiyo penze nyumba ya mdzulu yolimba ndipo amuna na akazi wose komasoti atsogoleri wose wa mu thaundi mweyo adathawira mu nyumba mweyo. Padangena mumo, adafunga nsuwo nkukwera padenga ya nyumba mweyo. 52 Abimeleki adayenda pa nyumba ya mdzulu mwiyo nkuyamba kuigwesa. Padateno adayenda pa nsuwo pa nyumba ya mdzulu mweyo kuti aishoke na moto. 53 Pavidateno, mayi munango adaponya mwala wa mphero pa nsolo wa Abimeleki nkuuphwanya. 54 Pavidateno, Abimeleki adachemera ntumiki wake yemwe ambamunyamulira vinthu, nkumuuza kuti: “Tenga chibemba chako uniphe kuti osati wanthu adzanene kuti adaphewa na nkazi.” Ntumiki wake muyo adamulasa na chibemba, ndipo adafa.

55 Wanthu wa mu Izirayeli padawona kuti Abimeleki wafa, aliyese adayenda kwawo. 56 Pamwapo Mulungu adabwezera Abimeleki voipa vomwe adachitira ababa wake ndawa yakupha abale wake 70. 57 Mulungu adachitisa pomwe kuti voipa vose va amuna wa ku Sekemu viwabwerere pa nsolo pawo. Pamwapa vomwe Yotamu mwana wa Yerubaala adanena pakuwatemberera vidakwanirisiwa.