Deuteronomo
7 “Yahova Mulungu wanu akadzakungenesani mudziko yomwe mwakhala pang’ono kuitenga kuti ikhale yanu, adzakuchosereni pomwe mitundu yakuluyakulu. Adzakuchosereni Ahiti, Agirigasi, Aamori, Akanani, Aperezi, Ahivi na Ayebusi, mitundu 7 yakuluyakulu na yamphanvu kuposha imwepo. 2 Yahova Mulungu wanu adzayapereke kwa imwepo ndipo mudzawawine. Shuwadi mudzawadzonge ndipo ayi kudzachita nawo pangano iriyose panango kuwakomera ntima. 3 Ayi kudzachita nawo mbverano uliwose wa ukwati.* Ayi kudzapereka wana wanu akazi kwa wana wawo amuna ndipo ayi kudzatenga wana wawo akazi nkuwapereka kwa wana wanu amuna. 4 Ndawa adzachitise kuti wana wanu amuna aleke kunilondola ndipo adzatumikire milungu yanango. Pamwapo ukali wa Yahova udzakugakireni ndipo adzakudzongeni mwakankulumize.
5 Koma imwepo mudzawachitire vinthu ivi: Mudzagwese maguwa yawo yantsembe na kuphwanya vipilala vawo vopatulika. Mudzagwate miti yawo yopatulika* na kushoka vifaniziro vawo vogoba. 6 Ndawa ndimwe wanthu ochena kwa Yahova Mulungu wanu. Yahova Mulungu wanu adakusankhulani kuti mukhale wanthu wake, chuma chake chapadera, pa wanthu wose okhala padziko yapasi.
7 Sikuti Yahova adakuwonesani chikondi na kukusankhulani ndawa yakuti mwenze azinji kuposha mitundu yose, ndawa pa mitundu yose, ntundu wanu wenze ung’ono. 8 Koma Yahova adakubulisani na djanja yamphanvu kuti akupulumuseni m’nyumba ya ukapolo na djanja yamphanvu m’manja mwa Farao* mpfumu ya Iguputo, ndawa Yahova adakukondani, komasoti ndawa yosunga lumbiro yake yomwe adalumbirira azibereki wanu. 9 Imwepo munkudziwa bwino kuti Yahova Mulungu wanu ni Mulungu chaiye, Mulungu wokhulupirika, yemwe asunga pangano yake ndipo awonesa chikondi chokhulupirika kwa wanthu omwe amukonda na kubvera malamulo yake ku mibadwo 1000. 10 Koma wanthu omwe amuzonda adzawabwezere pakuwadzonga. Iye adzazezelini kupereka chilango kwa wanthu omwe amuzonda koma adzawabwezere pakuwadzonga. 11 Ndipomwapa mumbawonesese kuti munkubvera malamulo, malangizo na vigamulo vomwe ninkukupasani lero, pakuvitewedza.
12 Peno mupitirize kubvera vigamulo mwivi na kuvitewedza, Yahova Mulungu wanu adzasunge pangano na kukuwonesani chikondi chokhulupirika, vomwe adalumbira kwa azibereki wanu. 13 Iye adzakukondeni, kukudalisani na kukuwandisani. Shuwadi adzakudaliseni pakukupasani wana azinji,* adzadalise vokolola vanu, mbewu zanu, vinyu wanu unyowani, mafuta yanu, wana wa ng’ombe zanu na wana wa nkhosa zanu, mudziko yomwe adalumbira kwa azibereki wanu kuti adzakupaseni. 14 Pa wanthu wose, imwepo mudzakhale odalisika maninge. Pakati panu padzagumanikelini mwamuna, nkazi panango chipfuwo chosabereka. 15 Yahova adzakuchosereni matenda yose ndipo adzakugweserenilini matenda yaliyose yopasa mantha yomwe mudayaona ku Iguputo. Koma adzagwesere wanthu wose omwe akuzondani. 16 Mudzonge wanthu wa makhaindi yose omwe Yahova Mulungu wanu ankuwapereka kwa imwepo. Ayi kuwachitira chifundo ndipo ayi kutumikira milungu yawo ndawa kuchita vimwivi kudzakhale msampha kwa imwepo.
17 Mukaganiza muntima mwanu kuti: ‘Wanthu wa makhaindi aya ni azinji kuposha isepano. Ko tingakwanise tani kuwathamangisa?’ 18 Ayi kuchita nawo mantha. Nthawe zose mumbakumbukire vomwe Yahova Mulungu wanu adachitira Farao na dziko yose ya Iguputo. 19 Mumbakumbukire viweruzo vamphanvu vomwe* maso yanu yadawona, vizindikiro, vodabwisa, djanja yamphanvu na djanja yopfuthula yomwe Yahova Mulungu wanu adaiphatisa basa pakukubulisani mudziko mwiyo. Vimwivi ndivo vomwe Yahova Mulungu wanu adzachite na wanthu wa makhaindi yose omwe munkuwagopa. 20 Yahova Mulungu wanu adzachitise mantha mitima yawo mpakana wose omwe adakhala na omwe adabishala pamaso panu adzadzongewe. 21 Ayi kuchita nawo mantha ndawa Yahova Mulungu wanu, Mulungu wamphanvu na wopasa mantha, ali pakati panu.
22 Yahova Mulungu wanu adzathamangisire makhaindi mwaya kutali na imwepo, nkuyachosa pamaso panu pang’onopang’ono. Adzakubvumizenilini kuti muyadzonge mwakankulumize, kuchitira kuti vilombo vakuthengo vingawande nkukudzongani. 23 Yahova Mulungu wanu adzayapereke kwa imwepo ndipo mudzayawine mobwerezabwereza mpakana yose kumala. 24 Adzapereke mafumu yawo m’manja mwanu, ndipo imwepo mudzapfudze madzina yawo padziko yapasi. Palibe yemwe adzalimbane namwe mpakana mudzawadzonge. 25 Mudzashoke pamoto vifaniziro vogoba va milungu yawo. Ayi kudzakhumbwira siliva na golide wawo panango kutenga vinthu vimwivi kuti vikhale vanu, kuchitira kuti vingadzakhale msampha kwa imwepo ndawa vinthu vimwivi ni vonyantsa kwa Yahova Mulungu wanu. 26 Ayi kubweresa vinthu vonyantsa m’nyumba mwanu ndawa imwepombo mungadzafunike kudzongewa ninge vinthu vimwivo. Mumbanyantsiwe navo maninge na kuipidwa navo ndawa vinthu vimwivi vifunika kudzongewa.”