Deuteronomo
8 “Muwonesese kuti munkubvera lamulo iriyose yomwe ninkukupasani lero, kuti mupitirize kukhala na moyo na kuti muwande, nkuyenda kukatenga dziko yomwe Yahova adalumbira kwa azibereki wanu. 2 Mumbakumbukire njira itali yomwe Yahova Mulungu wanu adakufambisani muchipululu magole 40 yose mwaya. Iye adakufambisani muchipululu kuti akupfunziseni kudzichepesa na kukuyesani pakufuna kudziwa vomwe venze muntima mwanu, kuti awone peno mungabvere malamulo yake panango neye. 3 Adakupfunzisani kudzichepesa pakubvuma kuti mukhale na njala nkukudyesani mana, yomwe imwepo na azibereki wanu mumbayadziwalini. Adachita vimwivi kuti mudziwe kuti munthu angakhalelini na moyo na chakudya chokha, koma na mawu yaliyose yochokera nkamwa mwa Yahova. 4 Vovala vomwe mudavala viribe kumala ndipo mapazi yanu yalibe kutupa pa magole 40 mwaya. 5 Imwepo munkudziwa bwino muntima mwanu kuti Yahova Mulungu ambakulangizani, ninge momwe baba alangizira mwana wake.
6 Manje mumbabvere malamulo ya Yahova Mulungu wanu pakufamba munjira zake na kumugopa. 7 Ndawa Yahova Mulungu wanu ankukungenesani mudziko yabwino, dziko ya tukamadzi twamadzi, ntsantsa na madzi yazinji yomwe yankufamba mu vigwa na m’madera yamapiri, 8 dziko ya tirigu, balere, uva, miti ya nkuyu na makangaza,* dziko ya maolivi yokonzera mafuta na dziko ya uchi, 9 mudziko yomwe mudzasowelini chakudya ndipo mudzasowelini chirichose, dziko yomwe minyala yake akonzera visimbi, yomwe m’mapiri yake mudzakumbemo kobre.*
10 Mukadzadya nkukhuta, mudzatamande Yahova Mulungu wanu ndawa ya dziko yabwino yomwe wakupasani. 11 Samalani kuti osati muyebwe Yahova Mulungu wanu pakukangira kubvera malamulo, vigamulo na malangizo yake yomwe ninkukupasani lero. 12 Mukadzadya nkukhuta, kumanga nyumba zabwino nkukhalamo, 13 ng’ombe zanu na nkhosa zanu nkuwanda, siliva na golide wanu nkuingizirika komasoti nkukhala na vinthu vizinji, 14 ayi kukabvuma kuti ntima wanu ukayambe kumeka nkukuchitisani kuyebwa Yahova Mulungu wanu yemwe adakubulisani mudziko ya Iguputo, m’nyumba ya ukapolo, 15 yemwe adakufambisani muchipululu chikulu na chochitisa mantha, chokhala na nyoka zapoizoni,* akalize* na dothi youma iribe madzi. Iye adachitisa kuti madzi yabule pamwala wolimba, 16 adakudyesani mana muchipululu, chakudya chomwe azibereki wanu ambachidziwalini, kuti akupfunziseni kudzichepesa na kukuyesani kuti vinthu vidzakufambireni bwino kutsogolo. 17 Peno muntima mwanu munganene kuti: ‘Chuma ichi nachigumana ndawa ya mphanvu zangu ndipo ndine wolimbikira basa,’ 18 mumbakumbukire kuti Yahova Mulungu wanu ni yemwe akupasani mphanvu kuti mugumane chuma, kuti akwanirise vomwe adalumbira kwa azibereki wanu, ninge mwaviriri lero.
19 Koma mukadzayebwa Yahova Mulungu wanu nkulondola milungu yanango, kuyatumikira na kuyagwadira, ninkukuchenjezerantuni lero kuti mudzamale. 20 Mudzamale ninge makhaindi yomwe Yahova ankuyadzonga pamaso panu, ndawa mulibe kubvera mawu ya Yahova Mulungu wanu.”