Deuteronomo
6 “Manje mwaya ni malamulo, malangizo na vigamulo vomwe Yahova Mulungu wanu wanipasa kuti nikupfunziseni, kuti mumbakatewedze mukayambuka kamadzi ka Yorodano nkungena mudziko yomwe munkuyenda kukaitenga kuti ikhale yanu, 2 kuti mumbagope Yahova Mulungu wanu na kutewedza malangizo yake na malamulo yake yomwe ninkukuuzani, imwepo, wana wanu na azizukulu wanu, ntsiku zose za moyo wanu, na cholinga chakuti mukhale na moyo kwa nthawe itali. 3 Ndipo imwepo Aizirayeli, mumbatetekere na kutewedza malangizo na malamulo yake mwayo mosamala, kuti vinthu vikufambireni bwino nakuti muwande maninge mudziko yoyerera nkaka na uchi, mobverana na vomwe Yahova, Mulungu wa azibereki wanu adakupolomisani.
4 Imwe Aizirayeli, tetekerani: Yahova Mulungu wathu ni Yahova m’bodzi. 5 Mumbakonde Yahova Mulungu wanu na ntima wanu wose, moyo wanu wose na mphanvu zanu zose. 6 Mawu yomwe ninkukulamulani lero aya yambakhale muntima mwanu, 7 ndipo mumbayakhomerere* muntima mwa wana wanu. Mumbayankhule nawo va mawu mwayo mukakhala pasi m’nyumba mwanu, mukambafamba munsewu, mukambagona komasoti mukamuka. 8 Muyamange padjanja yanu kuti mumbayakumbukire, ndipo yambakhale ninge chomanga pankuma panu.* 9 Muyanembe pamaferemu ya nyumba zanu na pamisuwo ya mpanda wa thaundi yanu.
10 Manje Yahova Mulungu wanu akadzakungenesani mudziko yomwe adalumbira kwa azibereki wanu Abulahamu, Isaki na Yakobo kuti adzakupaseni, dziko ya mathaundi yakuluyakulu yabwino yomwe ndimwepolini mudayamanga, 11 ya nyumba zodzala na vinthu vosiyanasiyana vabwino vomwe mulibe kuviphatira basa, vitsime vomwe mulibe kuvikumba ndimwepo, minda ya uva na miti ya maolivi yomwe mulibe kubzala ndimwepo, manje mukakadya nkukhuta, 12 mukasamale kuti osati mukayebwe Yahova yemwe adakubulisani mudziko ya Iguputo, m’nyumba ya ukapolo. 13 Mumbagope Yahova Mulungu wanu nkumbamutumikira, ndipo mumbalumbire padzina yake. 14 Ayi kumbalondola milungu yanango, milungu yaliyose ya wanthu omwe akuzungulirani, 15 ndawa Yahova Mulungu wanu yemwe ali pakati panu ni Mulungu yemwe afuna kuti wanthu ambadzipereke kwa iye yekha basi. Mukambalondola milungu yanango, ukali wa Yahova Mulungu wanu udzakugakireni ndipo adzakupfudzeni padziko yapasi.
16 Ayi kumbayesa Yahova Mulungu wanu ninge momwe mudamuyesera ku Masa. 17 Mumbawonesese kuti munkubvera malamulo ya Yahova Mulungu wanu, vikumbuso vake na malangizo yake yomwe wakulamulani kuti mumbayatewedze. 18 Mumbachite vinthu vabwino pamaso pa Yahova kuti vinthu vikufambireni bwino komasoti kuti mukangene mudziko yomwe Yahova adalumbira kwa azibereki wanu, nkuitenga kuti ikhale yanu, 19 pakuthamangisa azondi wanu wose mobverana na vomwe Yahova adapolomisa.
20 Mtsogolo mwana wanu akadzakubvunzani kuti: ‘Ko vikumbuso, malangizo na vigamulo vomwe Yahova Mulungu wathu adakupasani vitanthauza chani?’ 21 Mwana wanu muyo mudzamudawire kuti: ‘Tenze akapolo wa Farao ku Iguputo, koma Yahova adatibulisa ku Iguputo muko na djanja yamphanvu. 22 Pamwapo Yahova adapitiriza kuchita vizindikiro na vodabwisa vikuluvikulu komasoti vodzonga mu Iguputo mose, kwa Farao na kwa wanthu wose wa m’nyumba mwake, isepano tinkuwona. 23 Ndipo adatibulisa kumuko nkutibweresa kuno kudzatipasa dziko yomwe adalumbira kwa azibereki wathu. 24 Pamwapo Yahova adatilamula kuti timbatewedze malangizo yose mwaya nakuti timbagope Yahova Mulungu wathu kuti vinthu vimbatifambire bwino nthawe zose, komasoti kuti tikhale na moyo ninge momwe viliri lero. 25 Ndipo tikambatewedza malamulo yose mwaya mosamala maninge pakubvera* Yahova Mulungu wathu mobverana na vomwe adatilamula, ndiye kuti tinkuchita chilungamo pamaso pake.’”