Deuteronomo
33 Manje aya ni madaliso yomwe Mose, munthu wa Mulungu chaiye, adanena akalibe kufa kuti Aizirayeli adzatambire. 2 Iye adati:
“Yahova adabwera kuchokera ku Sinai,
Adagaka kuchokera ku Seiri.
Adagaka mwaulemerero kuchokera kudera ya mapiri ya Parana,
Ndipo wenze na angelo wake azinji maninge,*
Kumakulu kwake kwenze masocha yake.
3 Iye ambakonda wanthu wake,
Wanthu ochena wose mwawo enze m’manja mwanu.
Amwawa adakhala pamapazi yanu.
Adayamba kubvesera mawu yanu.
4 (Mose adatipasa chilamulo,
Chomwe ni chuma cha mpingo wa Yakobo.)
5 Mulungu adakhala mpfumu mu Yesuruni,*
Pomwe atsogoleri wa wanthu adasonkhana pabodzi,
Pabodzi na madzinza yose ya Izirayeli.
6 Rubeni akhale na moyo ndipo osati afe,
Ndipo wanthu wake osati akhale ang’onong’ono.”
7 Iye adanena kuti Yuda adzatambire madaliso aya:
“Imwe Yahova, bvani mawu ya Yuda,
Ndipo mumubwezere kwa wanthu wake.
Iye wateteza* vinthu vake na manja yake,
Mumuthandize kumenyana na wanthu omwe amuzonda.”
8 Pakunena va Levi adati:
“Tumimu na Urimu wanu* ni va munthu wokhulupirika kwa imwepo,
Yemwe mudamuyesa pa Masa.
Mudayamba kushupana naye pafupi na madzi ya ku Meriba.
9 Munthu yemwe adauza ababa wake na amayi wake kuti: ‘Niribe kuwonesa kuti ninawo basa.’
Olo azibale wake alibe kuwaikhira nzeru,
Ndipo wana wake adakhala ninge ankuwadziwalini.
Ndawa adatewedza mawu yanu,
Ndipo adasunga pangano yanu.
10 Amwawa ambalangize Yakobo pa vigamulo vanu.
Na kulangiza Izirayeli va Chilamulo chanu.
Ambapereke ntsembe zofukiza kuti zikhale kapfungo kabwino kwa imwepo,*
Na ntsembe yantero paguwa yanu yantsembe.
11 Imwe Yahova dalisani mphanvu zake,
Ndipo mukondwe na basa ya manja yake.
Phwanyani minyendo ya omwe ankumuchita nkhondo,
Kuti yemwe azondana naye osati akwanise pomwe kuimirira.”
12 Pakunena va Benjamim adati:
“Yemwe akondewa na Yahova ambakhale wotetezewa na iye,
Pomwe ankumuteteza ntsiku yose,
Iye adzakhale pakati pa mapikiti yake.”
13 Pakunena va Yosefe adati:
“Dziko yake idalisiwe na Yahova.
Idalisiwe na vinthu vabwino maninge vakudzulu,
Na mame komasoti madzi yochokera mu ntsantsa zapasi.
14 Idalisiwe pomwe na vinthu vabwino maninge, vochokera kudzuwa,
Na vokolola vabwino maninge mwezi uliwose,
15 Idalisiwe na vinthu vabwino maninge vam’mapiri yakalekale.*
Na vinthu vabwino maninge va m’mapiri yomwe yadzakhaleko mpakana kalekale.
16 Idalisiwe na vinthu vabwino maninge va padziko yapasi, na chuma chake chose,
Komasoti mobvumiziwa na iye yemwe adawonekera mu chitsamba chaminga.
Madaliso mwaya yakhale pansolo pa Yosefe,
Pampsoma pa munthu yemwe adasankhuliwa pakati pa azibale wake.
17 Ulemerero wake ni wolingana na wa mwana mwamuna wa ng’ombe woyamba kubadwa,
Ndipo minyanga yake ni minyanga ya ng’ombe imuna ya m’thengo.
Minyanga mwayo adzagwinye* nayo wanthu.
Adzagwinye nayo wanthu wose pabodzi mpakana kukafika kumalekedzero ya dziko yapasi
Minyanga mwayo ni wanthu mamidyau yazinji ya dzinza ya Efuraimu,
Na wanthu mamidyau wa dzinza ya Manase.”
18 Pakunena va Zebuloni adati:
“Kondwa Zebuloni iwe, pa maulendo yako,
Kondwambo iwepo Isakara, m’matenti yako.
19 Adzachemerere mitundu ya wanthu kuphiri.
Kumuko adzapereke ntsembe zachilungamo.
Ndawa adzatenge chuma* kuchokera pa chuma chizinji cha m’nyanja,
Na chuma chobisika cha munchenga.”
20 Pakunena va Gadi adati:
“Wopfuthula malire ya Gadi ni wodalisiwa.
Iye adzagone kumuko ninge mphondolo,
Wokonzeka kukhwadzula djanja, na kung’amba nsolo pampsoma.
21 Iye adzasankhule gawo yabwino maninge kuti ikhale yake,
Ndawa gawo yoperekewa na wopereka malamulo idasungiwa kumuko.
Atsogoleri wa wanthu adzaungane pabodzi.
Iye adzachite chilungamo cha Yahova,
Na vigamulo vake volewa va Izirayeli.”
22 Pakunena va Dani adati:
“Dani ni mwana wa mphondolo.
Adzamoge kuchokera ku Basana.”
23 Pakunena va Nafitali adati:
“Nafitali waonewa kuti ni wobvumizika ndipo vimwivi vamukwanira,
Ndipo madaliso ya Yahova yamuwandira.
Tenga chigawo cha kumaulo na ku sul.”*
24 Pakunena va Aseri adati:
“Aseri adamudalisa pakumupasa wana amuna.
Azibale wake amukomere ntima,
Ndipo apondese* mapazi yake m’mafuta.
25 Chisimbi na kobre* ni vokhiyira nsuwo wako wa mpanda,
Ndipo udzakhale wotetezeka ntsiku zose za moyo wako.*
26 Palibe angalingane na Mulungu chaiye wa Yesuruni,
Yemwe afamba mumlengalenga kuti akuthandize,
Yemwe afamba pamitambo mu ulemerero wake.
27 Mulungu ni malo yako yothawirako kuyambira kalekale,
Iye wakunyamula m’manja yake yomwe yadzakhalepo mpakana kalekale.
Adzathamangise wokuzonda pamaso pako,
Ndipo adzanene kuti: ‘Adzongeni!’
28 Izirayeli adzakhale motetezeka,
Ntsantsa ya Yakobo idzakhale motetezeka,
Mudziko yokhala na chakudya na vinyu unyowani,
Yomwe kudzulu kwake kudzagwese mame.
29 Ndiwe wokondwa iwepo Izirayeli!
Ni mbani angalingane nawe,
Wanthu omwe ankupulumusiwa na Yahova,
Chovikira chako chokuteteza,
Na chibemba chako champhanvu?
Wanthu omwe akuzonda adzakhale mwamantha ndawa ya iwepo,
Ndipo iwepo udzaponde misana yawo.”*