Deuteronomo
32 “Bveserani imwe kudzulu, ndipo inepano niyankhule,
Dziko yapasi ibve mawu ya pakamwa pangu.
2 Malangizo yangu yadzagwe ninge nvula,
Mawu yangu yadzabuluke ninge mame,
Ninge nvula yowaza pa uswa,
Ninge pomwe nvula yamphanvu pa vomera.
3 Ndawa nidzalalikire dzina ya Yahova.
Wanthu imwe, lalikirani va momwe Mulungu wathu aliri nkulu!
4 Iye ni Dwale, ndipo basa yake ni yochena,
Njira zake zose ni zolungama.
Mulungu wokhulupirika, yemwe achitalini vinthu viribe chilungamo.
Iye ni wolungama na wothamuka.
5 Iwo ndiwo anchita vinthu voipa.
Iwo ni wana wakelini, anabvuto ndiwo.
Iwo ni m’badwo wosokonezeka maganizo na wochita vinthu viribe chilungamo!
6 Wanthu opusa na osowa nzeru imwe,
Ko mufunika kumuchitira vimwivi Yahova?
Ko iye ni Baba wanulini yemwe adakulengani,
Yemwe adakukonzani na kukukhazikisani ninge ntundu?
7 Kumbukirani ntsiku za kalekale,
Ganizirani magole ya mibadwo ya m’mambuyo.
Bvunzani ababa wanu ndipo akuuzeni,
Amuna wachikulire pakati panu, ndipo akufotokozereni.
8 Pomwe Wam’dzulum’dzulu adapereka vinthu kumitundu ya wanthu,
Pomwe adakheta wana wa Adamu,*
Adaikha malire ya wanthu wose
Poganizira chiwerengero cha wana wa Izirayeli.
9 Ndawa wanthu wa Yahova ni gawo yake.
Yakobo ndiye chuma chake.
10 Adamugumana mudziko yachipululu,
Muchipululu mulibe chinthu, momwe mulira vilombo.
Adamuzungulira kuti amuteteze, adamusamalira,
Ndipo adamuteteza ninge mboni ya diso yake.
11 Ninge momwe mphungu igunduzira chisa chake,
Momwe imbululukira padzulu pa wana wake,
Momwe ipfuthulira maphaphiro yake kuti itenge wana mwawo,
Nkuwanyamula pamaphaphiro yake,
12 Ni Yahova yekha yemwe adapitiriza kumutsogolera,*
Palibe mulungu wachilendo yemwe wenze naye.
13 Adamuyendesa pamapiri ya dziko yapasi,
Mwakuti adadya vokolola va m’munda.
Adamudyesa uchi wochokera m’mwala,
Na mafuta yochokera m’mwala wa nsangalabwi.
14 Adamudyesa pomwe mafuta ya nkaka wa ng’ombe na nkaka wa nkhosa,
Pabodzi na nkhosa zabwino maninge,*
Komasoti nkhosa zimuna za ku Basana na mbuzi zimuna,
Pabodzi na tirigu wabwino maninge.*
Ndipo mudamwa vinyu wochokera m’magazi ya uva.*
15 Yesuruni* padanenepa, adapandukira abwana wake.
Iwepo wanenepa, wakula thupi, wakhuta mopitirira malire.
Ndipomwapa iye adasiya Mulungu yemwe adamukonza,
Ndipo adanyoza Dwale ya chipulumuso chake.
16 Adamukalipisa na milungu yachilendo.
Ambamukalipisa na vinthu vonyantsa.
17 Iwo ambapereka ntsembe kwa viwanda, osati kwa Mulungu.
Adapereka ntsembe kwa milungu yomwe ambayadziwalini,
Kwa milungu yanyowani yomwe yandobwera manjemanje,
Na kwa milungu yomwe azibereki wanu ambayadziwalini.
18 Mudayebwa Dwale yomwe idakuberekani,
Ndipo mulibe kukumbukira Mulungu yemwe adakuberekani.
19 Yahova padawona vimwivi adawalamba
Ndawa yakuti wana wake amuna na akazi adamukalipisa.
20 Manje iye adati: ‘Niwabisire nkhope yangu,
Nifuna niwone kuti viwamalire tani.
Ndawa iwo ni m’badwo wokonda voipa,
Wana osakhulupirika.
21 Iwo anikalipisa* na milungu yabodza.
Anikalipisa na mafano yawo yalibe na basa.
Manje inepano niwachitise ntsanje na wanthu alibe na basa,
Niwakwinyiririse na ntundu wopusa.
22 Ukali wangu wagasa moto
Womwe udzagake mpakana kukafika pasi chaipo pa Manda,*
Ndipo udzashoke dziko yapasi na vokolola vake,
Ndipo udzagase fundasau ya mapiri.
23 Nidzaingizire matsoka yawo,
Tumikondo twangu tose twa uta nidzathusire iwo.
24 Adzafoke* na njala
Ndipo adzabonere na kupsa thupi kopasa mantha ndipo adzadzongewe nkumaliratu.
Nidzawatumizire vilombo va manu yataliyatali
Na nyoka zapaizoni za m’pfumbi.
25 Kunja, chibemba chidzawachitise kuti akhale oferewa.
M’nyumba, wanthu adzakhale na mantha
Vimwivi vidzachitikire mulumbwana, namwali,
Mwana mng’ono na munthu wa invi.
26 Nidakanena kuti: “Nidzawamwaze,
Nidzachitise kuti wanthu osati awakumbukire pomwe,”
27 Koma nimbagopa vomwe wonizonda anganene,
Ndawa onizonda mwawo angaganize vophonyeka.
Iwo anganene kuti: “Tawina ndawa ya mphanvu zathu,
Sikuti ni Yahova yemwe wachita vose vimwivi.”
28 Ndawa iwo ni ntundu ulibe nzeru,*
Ndipo ni osazindikira.
29 Vidakakhala bwino adakakhalako na nzeru, ndawa adakaganizira maninge vimwivi.
Adakaganizira kuti viwamalire tani.
30 Ko munthu m’bodzi angathamangise tani wanthu 1000,
Panango wanthu awiri angathamangise tani wanthu 10 000?
Ni vosakwanisika, pokhapokha Dwale yawo iwagulise,
Komasoti peno Yahova wawapereka.
31 Ndawa dwale yawo ni yosalingana na Dwale yathu,
Ndipo wanthu omwe atizonda ankudziwa bwino vimwivi.
32 Muti wawo wa uva ni wochokera ku muti wa uva wa ku Sodomu,
Na kumaminda ya m’mapiri ya ku Gomora.
Vipaso vawo va uva ni vikolakola
Ndipo ni vowawa.
34 Ko inepano nilibe kusunga vimwivi,
Nkuviikha chidindo m’nyumba yangu yosungira vinthu?
35 Kubwezera ni kwangu, chilango pomwe ni changu.
Vimwivi vidzachitike panthawe yoikhiwiratu phazi yawo ikadzaterereka,
Ndawa ntsiku ya tsoka yawo yafendera,
Ndipo vowagwera vifike mwakankulumize.’
36 Pakuti Yahova adzaweruze wanthu wake,
Ndipo adzachitire chifundo atumiki wake
Akadzawona kuti mphanvu zawo zamala,
Nkuwona pomwe kuti kwandosala wanthu obonera na ofoka.
37 Manje iye adzanene kuti: ‘Yali kuponi milungu yawo,
Dwale yomwe adathawirako,
38 Milungu yomwe yambadya mafuta ya ntsembe zawo,*
Na kumwa vinyu wa ntsembe zawo zachakumwa?
Yabwere kudzakuthandizani.
Yakhale malo yanu yothawirako.
39 Onani manje kuti ndine Mulungu,
Ndipo palibe Mulungu munango koma inepano nekha.
Nikupha ndipo nipereka moyo.
Nidzonga, ndipo nidzapolese,
Palibe aliyese yemwe angapulumuse munthu m’manja mwangu.
40 Nakwiza djanja yangu kudzulu
Ndipo ninkulumbira kuti: “Ine, Mulungu yemwe alipo mpakana kalekale, ninkulumbira pa dzina yangu,”
41 Nikanoza chibemba changu choyetima,
Nkukonzekeresa djanja yangu kuti ipereke chiweruzo,
Nidzabwezere wanthu omwe anizonda,
Ndipo nidzapereke chilango kwa omwe anizonda.
42 Nidzaledzerese na magazi tumikondo twangu twa uta,
Ndipo chibemba changu chidzadye nyama,
Na magazi ya wanthu ophewa na ophatiwa,
Na misolo ya atsogoleri wa wanthu omwe anizonda.’
43 Imwepo wanthu wa makhaindi yanango, kondwani pabodzi na wanthu wake,
Ndawa adzabwezere magazi ya atumiki wake,
Ndipo adzabwezere chilango kwa wanthu omwe amuzonda,
Komasoti adzapsyimphirize machimo ya dziko ya wanthu wake.”*
44 Manje Mose adabwera nkuyankhula mawu yose ya nyimbo mwiyi wanthu wose ankubva, iye pabodzi na Hoshiya* mwana wa Nuni. 45 Mose padamaliza kuyankhula mawu yose kwa Aizirayeli wose, 46 adawauza kuti: “Ganizirani mopfatsa mawu yose yokuchenjezani yomwe ninkuyankhula namwe lero, kuti muuze wana wanu kuti ambawonesese kuti ankuchita vomwe mawu yose ya Chilamulo ichi yankunena. 47 Ndawa mawu mwaya ni mawulini yalibe basa kwa imwepo, koma yangakuthandizeni kukhala na moyo. Mukambatewedza mawu mwaya mudzakhale na moyo utali mudziko yomwe munkuyenda kukaitenga kukhala yanu mukayambuka Yorodano.”
48 Yahova adayankhula na Mose pa ntsiku mwiyi kuti: 49 “Kwera m’phiri iyi ya Abarimu, phiri ya Nebo, yomwe iri m’dziko ya Mowabu, monyang’anana na Yeriko, ndipo uwone dziko ya Kanani yomwe ninkupereka kwa Aizirayeli kuti ikhale yawo. 50 Patsogolo pake ukafere m’phiri mwiyi yomwe unkufuna kukwera ndipo ukaikhiwe m’manda ninge mwavidakhalira na azibereki wako,* ninge mwavidakhalira pomwe na Aroni m’bale wako yemwe adafera paphiri ya Hora nkuikhiwa m’manda ninge mwavidakhalira na azibereki wake. 51 Viri teno ndawa awiri imwe mulibe kukhala okhulupirika kwa inepano pakati pa Aizirayeli kumadzi ya pa Meriba ku Kadesi, muchipululu cha Zini, ndawa mulibe kunilemekeza pamaso pa Aizirayeli. 52 Iwepo udzaiwone dziko mwiyo uli patali, koma udzangenelini mudziko yomwe ninkuipereka kwa Aizirayeli.”