Deuteronomo

34 Patsogolo pake Mose adachoka muchipululu cha Mowabu nkuyenda m’phiri ya Nebo, padzulu pa Pisiga, monyang’anana na Yeriko. Ndipo Yahova adamuwonesa dziko yose, kuchokera ku Giliyadi mpakana ku Dani. 2 Adamuwonesa pomwe dziko yose ya Nafitali, dziko ya Efuraimu, dziko ya Manase na dziko yose ya Yuda mpakana ku nyanja yakumaulo.* 3 Adamuwonesa Negebu na chigwa cha Yorodano kuphatanidzapo chigwa cha Yeriko, thaundi ya miti ya kanjedza, mpakana ku Zowari.

4 Manje Yahova adamuuza kuti: “Iyi ni dziko yomwe nidalumbira kwa Abulahamu, Isaki na Yakobo kuti: ‘Nidzaipereke kwa mbadwa* zanu.’ Nakubvumiza kuti uiwone na maso yako koma uyambukelini nkukangena mudziko mwiyo.”

5 Patsogolo pake Mose ntumiki wa Yahova adafera pamwapo mudziko ya Mowabu, mobverana na vomwe Yahova adanena. 6 Mulungu adamuikha m’manda nchigwa mudziko ya Mowabu monyang’anana na Beti-peori, ndipo Palibe yemwe ankudziwa pomwe pali manda yake mpakana lero. 7 Mose adamwalira na magole 120. Panthawe mwiyo maso yake yenze yadakali kuwona bwinobwino ndipo wenze adakali na mphanvu. 8 Aizirayeli adalira maliro ya Mose kwa ntsiku 30 muchipululu cha Mowabu. Patsogolo pake ntsiku zose zolira maliro ya Mose zidamala.

9 Yoswa mwana wa Nuni wenze adadzadziwa na mzimu wanzeru, ndawa Mose adaikha manja yake pa iye. Aizirayeli adayamba kumubvera ndipo adachita mobverana na vomwe Yahova adalamula Mose. 10 Koma mu Izirayeli mulibe kukhalako mneneri aliyese wolingana na Mose, yemwe Yahova ambamudziwa bwino maninge.* 11 Iye adachita vizindikiro na vodabwisa vose vomwe Yahova adamutuma kukachita mudziko ya Iguputo kwa Farao, atumiki wake wose na dziko yake yose. 12 Mose adachita vimwivi na djanja ya mphanvu komasoti na mphanvu zizinji pamaso pa Aizirayeli wose.