Deuteronomo

31 Patsogolo pake Mose adayenda kukauza Aizirayeli wose mawu aya, 2 kuti: “Manje ninamagole 120. Ningakwaniselini pomwe kukutsogolerani* ndawa Yahova waniuza kuti: ‘Uyambukelini Yorodano uyu.’ 3 Yahova Mulungu wanu ankuyambuka patsogolo panu kuti akutsogolereni. Iye adzadzonge mitundu mwaya patsogolo panu ndipo imwepo mudzayathamangise. Yoswa ndiye wati akutsogolereni nkukuyambusani, mobverana na vomwe Yahova wanena. 4 Yahova adzachitire mitundu mwaya vomwe adachitira Sihoni na Ogi, mafumu ya Aamori, na vomwe adachitira dziko yawo pomwe adawadzonga. 5 Yahova adzakuwinireni mitundu mwaya, ndipo mudzayachitire mobverana na malamulo yose yomwe nakupasani. 6 Limbani ntima ndipo muchite vinthu mwamphanvu. Ayi kuwagopa panango kuchita nawo mantha, Yahova Mulungu wanu ndiye ankufamba patsogolo panu. Iye adzakutayenilini panango kukusiyani olo pang’ono.”

7 Patsogolo pake Mose adachemera Yoswa nkumuuza pamaso pa Aizirayeli wose kuti: “Limba ntima ndipo uchite vinthu mwamphanvu, ndawa iwepo ndiwe wati udzangenese wanthu awa mudziko yomwe Yahova adalumbira kwa azibereki wawo kuti adzawapase. Ndipo iwepo ndiwe wati udzawagawire dziko mwiyo kuti ikhale yawo. 8 Yahova ndiye ankufamba patsogolo panu ndipo apitirize kufamba namwe. Adzakutayenilini panango kukusiyani olo pang’ono. Ndipomwapa ayi kugopa panango kuchita mantha.”

9 Patsogolo pake Mose adanemba Chilamulo chimwichi nkuchipereka kwa antsembe, omwe ni Alevi, omwe anyamula likasa ya pangano ya Yahova, komasoti kwa akulu wose wa Izirayeli. 10 Manje Mose adawalamula kuti: “Kumapeto kwa magole 7 yaliyose, panthawe yomwe idaikhiwiratu mugole yakuti wanthu wa vikwerete amasuke, Pachikondwerero cha Misasa, 11 Aizirayeli wose akabwera pamaso pa Yahova Mulungu wanu pamalo yomwe iye adzasankhule, mumbadzawerenge Chilamulo ichi pamaso pa Aizirayeli wose kuti achibve. 12 Unganidzani wanthu, amuna, akazi, wana na alendo omwe ankukhala m’mathaundi yanu,* kuti abvesere nakuti apfunzire va Yahova Mulungu wanu, kuti ambamugope nakuti ambatewedze mosamala mawu yose ya Muchilamulo mwichi. 13 Akateno wana wawo omwe ankudziwalini Chilamulo ichi adzabvesere ndipo adzapfunzire kugopa Yahova Mulungu wanu, ntsiku zose zomwe mudzakhale mudziko yomwe munkuyenda kukaitenga kuti ikhale yanu mukayambuka Yorodano.”

14 Patsogolo pake Yahova adauza Mose kuti: “Ona, nthawe yakuti ufe yafendera. Chemera Yoswa, ndipo mukaime pachihema chogumanako kuti nikamuikhe kukhala mtsogoleri.” Pamwapo Mose na Yoswa adayenda nkukaima pachihema chogumanako. 15 Manje Yahova adawonekera kuchihema muko mu chipilala cha ntambo chomwe chidaima pafupi na msuwo wa chihema.

16 Manje Yahova adauza Mose kuti: “Iwepo wakhala pang’ono kufa,* ndipo wanthu awa adzakhale osakhulupirika kwa inepano ndipo adzayambe kutumikira milungu yachilendo yomwe yali mudziko yomwe ankuyenda. Iwo adzanisiye nkuleka kutewedza pangano yomwe nidachita nawo. 17 Panthawe mwiyo ukali wangu udzawagakire ndipo nidzawasiye nkuwabisira nkhope yangu mpakana adzadzongewe. Manje akadzagumana na matsoka komasoti mabvuto yazinji adzanene kuti: ‘Matsoka mwaya yankutigwera ndawa yakuti Mulungu wathu alilini nase pabodzi.’ 18 Koma inepano nidzapitirize kuwabisira nkhope yangu pantsiku mwiyo ndawa ya voipa vose vomwe achita pakuchungunukira kwa milungu yanango.

19 Manje munembe nyimbo iyi nkupfunzisa Aizirayeli. Muwapfunzise* nyimbo mwiyi kuti ikhale mboni yangu pamaso pa Aizirayeli mwawo. 20 Nikadzawangenesa mudziko yomwe nidalumbira kwa azibereki wawo, dziko yoyerera nkaka na uchi, ndipo akadzadya nkukhuta, vinthu nkuyamba kuwafambira bwino,* adzachungunukire kwa milungu yanango nkuyamba kuyatumikira. Iwo adzanichitire mwano komasoti nkuleka kutewedza pangano yangu. 21 Manje akadzagumana na matsoka komasoti mabvuto yazinji, nyimbo mwiyi idzawakumbuse vomwe nidawachenjeza, (ndawa mbadwa zawo zifunikalini kuiyebwa nyimbo mwiyi), ndawa ninkudziwa kale ntima womwe ayamba kukhala nawo olo nikalibe nawangenesa mudziko yomwe nidawalumbirira.”

22 Pamwapo Mose adanemba nyimbo mwiyi pantsiku mwiyo nkupfunzisa Aizirayeli.

23 Manje Mulungu adaikha Yoswa mwana wa Nuni kuti akhale mtsogoleri ndipo adamuuza kuti: “Limba ntima ndipo uchite vinthu mwamphanvu, ndawa iwepo ndiwe wati udzangenese Aizirayeli mudziko yomwe nawalumbirira ndipo inepano nidzapitirize kukhala nawe.”

24 Mose padandomaliza kunemba mawu yose ya Chilamulo ichi m’bukhu, 25 Mose adalamula Alevi omwe ambanyamula likasa ya pangano ya Yahova kuti: 26 “Tengani bukhu iyi ya Chilamulo ndipo muiikhe pambali pa likasa ya pangano ya Yahova Mulungu wanu, ndipo idzakhale mboni ya Mulungu yokutsutsani. 27 Inepano ninkudziwa bwino khalidwe yanu yopanduka na kuuma ntima* kwanu. Peno mwakhala munkupandukira Yahova pomwe ninamoyo, manje kuli tani nikafa! 28 Unganidzani akulu wose wa madzinza yanu na atsogoleri wanu, kuti abve mawu aya yomwe ninkufuna kuyankhula nawo, ndipo ninkuikha kudzulu na dziko yapasi kuti vikhale mboni zangu pamaso pawo. 29 Ndawa ninkudziwa bwino kuti nikafa, shuwadi mudzachite vinthu voipa nkupatuka kusiya njira yomwe nakulamulani. Manje pamapeto pake tsoka idzakugwereni, ndawa mudzachite voipa pamaso pa Yahova ndipo mudzamukalipise na basa za manja yanu.”

30 Manje mpingo wose wa Izirayeli unkubva, Mose adayamba kuyankhula mawu ya mu nyimbo iyi, kuchokera poyambirira mpakana pamapeto kuti: