Deuteronomo
30 “Mawu yose mwaya yakadzakwanirisiwa pa imwepo, madaliso na matemberero yomwe naikha pamaso panu, ndipo mukadzayakumbukira* muli kumitundu yose komwe Yahova Mulungu wanu adzakunyalusireni, 2 imwepo nkubwerera kwa Yahova Mulungu wanu na kubvera mawu yake na ntima wanu wose na moyo wanu wose, mobverana na vose vomwe ninkukulamulani lero, imwepo na wana wanu, 3 Yahova Mulungu wanu adzabwezere kwawo wanthu wa ntundu wanu omwe adaphatiwa nkuyendesewa ku dziko inango, ndipo adzakuchitireni chifundo nkukuunganidzani pabodzi kuchokera pakati pa wanthu wose komwe Yahova Mulungu wanu adakunyalusirani. 4 Olo wanthu wa ntundu wanu omwe adamwaziwa mpakana kumalekedzero ya dziko yapasi, Yahova Mulungu wanu adzawaunganidze nkuwabwezeresa. 5 Yahova Mulungu wanu adzakubwereseni mudziko yomwe azibereki wanu adaitenga nkukhala yawo, ndipo idzakhale yanu. Iye adzachitise kuti vinthu vikufambireni bwino ndipo adzakuwandiseni maninge kuposha azibereki wanu. 6 Yahova Mulungu wanu adzachenese* mitima yanu na mitima ya wana wanu kuti mumbakonde Yahova Mulungu wanu na ntima wanu wose komasoti moyo wanu wose ndipo mudzakhale na moyo. 7 Manje Yahova Mulungu wanu adzabwerese matemberero yose mwaya kwa wanthu omwe ambakuzondani na kukudzudzani.
8 Patsogolo pake imwepo mudzabwerere nkubvera mawu ya Yahova na kutewedza malamulo yake yose yomwe ninkukupasani lero. 9 Yahova Mulungu wanu adzachitise kuti vinthu vikufambireni bwino maninge pa basa iriyose ya manja yanu. Adzawandise wana wanu, vipfuwo vanu, vokolola vanu, ndawa Yahova adzakomedzewe pomwe kuchitisa kuti vinthu vikufambireni bwino ninge momwe adachitira na azibereki wanu. 10 Ndawa pa nthawe mwiyo mudzabvere mawu ya Yahova Mulungu wanu na kusunga malamulo na malangizo yake yomwe yadanembewa mubukhu iyi ya Chilamulo, ndipo mudzabwerere kwa Yahova Mulungu wanu na ntima wanu wose na moyo wanu wose.
11 Lamulo yomwe ninkukupasani lero iyi ni yosashupa kwa imwepo kuti muitewedze, ndipo irilini pamalo yakuti mungakwaniselini kuigumana.* 12 Irilini kudzulu kuti munene kuti: ‘Mbani wati ayende kudzulu kukatitengera lamulo mwiyo kuti isepano tidzaibve nkuitewedza?’ 13 Ndipo irilini tsidya inango ya nyanja kuti munene kuti: ‘Mbani wati ayambuke nkuyenda tsidya inango ya nyanja kuti akatitengere lamulo mwiyo kuti isepano tidzaibve nkuitewedza?’ 14 Ndawa mawu ya muchilamulo mwayo yali pafupi maninge na imwepo, yali nkamwa mwanu na muntima mwanu kuti muyatewedze.
15 Onani, ine ninkuikha pamaso panu lero moyo na vinthu vabwino, impfa na vinthu voipa. 16 Mukadzabvera malamulo ya Yahova Mulungu wanu, yomwe ninkukupasani lero, pakukonda Yahova Mulungu wanu, kufamba munjira zake, na kusunga malamulo yake, malangizo yake na vigamulo vake, mudzakhale na moyo, mudzawande ndipo Yahova Mulungu wanu adzakudaliseni mudziko yomwe munkuyenda kukaitenga kuti ikhale yanu.
17 Koma ntima wanu ukachungunukira kunango na kuleka kubvera mwakuti mwatengeka nkugwadira milungu yanango nkumbayatumikira, 18 ninkukuuzani lero kuti mudzamaliretu. Mudzakhalelini nthawe itali mudziko yomwe munkuyenda kukaitenga kuti ikhale yanu mukayambuka Yorodano. 19 Lero naikha moyo na impfa, daliso na temberero pamaso panu. Kudzulu na dziko yapasi ni mboni pa vochita vanu. Manje imwepo na mbadwa zanu sankhulani moyo kuti mupitirize kukhala na moyo. 20 Sankhulani moyo mwa kukonda Yahova Mulungu wanu, kubvera malamulo yake na kukhala okhulupirika kwa iye, ndawa iye ni yemwe apereka moyo ndipo angakuthandizeni kuti mukhale na moyo kwa nthawe itali mudziko yomwe Yahova adalumbira kuti adzaipereke kwa azibereki wanu, Abulahamu, Isaki na Yakobo.”