Deuteronomo

29 Aya ni mawu ya pangano yomwe Yahova adalamula Mose kuti achite na Aizirayeli mudziko ya Mowabu, kuingizira pa pangano yomwe adachita nawo ku Horebe.

2 Pamwapo Mose adachemera Aizirayeli wose nkuwauza kuti: “Imwepo mudawona mwekha mudziko ya Iguputo vose vomwe Yahova adachitira Farao, atumiki wake wose na dziko yake yose, 3 viweruzo vamphanvu vomwe maso yanu yadawona, panango kuti vizindikiro vikuluvikulu na vodabwisa. 4 Koma Yahova alibe kukupasani ntima wakuti mukwanise kubvesa vinthu, maso yakuti mukwanise kuwona na matu yakuti mukwanise kubva, mpakana lero. 5 ‘Panimbakutsogolerani kwa magole 40 muchipululu, vovala vanu viribe kusakala ndipo ntsapato zanu ziribe kusakala kumapazi yanu. 6 Mulibe kudya nkate, mulibe kumwa vinyu panango vakumwa vinango voledzeresa, kuti mudziwe kuti inepano ndine Yahova Mulungu wanu.’ 7 Manje mudafika pamalo yano, ndipo Sihoni mpfumu ya Hesiboni na Ogi mpfumu ya Basana adabwera kudzamenyana nase, koma tidawawina. 8 Patsogolo pake tidatenga dziko yawo nkuipereka kwa dzinza ya Rubeni, dzinza ya Gadi na hafu ya dzina ya Manase kuti ikhale yawo. 9 Manje mumbasunge mawu ya pangano iyi na kuyabvera kuti vose vomwe mumbachite vimbakufambireni bwino.

10 Mose imwepo mwaima pano lero pamaso pa Yahova Mulungu wanu, imwepo atsogoleri wa madzinza, akulu, atsogoleri wamasocha, mwamuna aliyese wa mu Izirayeli, 11 wana wanu, akazi wanu, mulendo yemwe ankukhala munsasa wanu, kuyambira yemwe akutemerani nkhuni mpakana yemwe akutapirani madzi. 12 Imwepo muli pano kuti mulumbire nkuchita pangano na Yahova Mulungu wanu, pangano yomwe Yahova Mulungu wanu ankuchita namwe lero. 13 Cholinga chake ni chakuti lero akuchitiseni kukhala wanthu wake nakuti iye akhale Mulungu wanu, mobverana na vomwe adakupolomisani komasoti mobverana na vomwe adalumbira kwa azibereki wanu, Abulahamu, Isaki na Yakobo.

14 Manje ninkuchitalini pangano mwiyi na kulumbirisa imwepo mwekha, 15 koma ninkuchita pomwe vimwivi na wanthu omwe ali imirire nase pano lero pamaso pa Yahova Mulungu wathu, na wanthu omwe tirilini nawo pano lero. 16 (Pakuti imwepo munkudziwa bwino momwe timbakhalira mudziko ya Iguputo na momwe tidagwatira pakati pa wanthu wa makhaindi yanango paulendo wathu muyu. 17 Imwepo mumbaona vinthu vawo vonyantsa, mafano yawo yonyantsa* yamiti na yaminyala, yasiliva na yagolide yomwe yenze pakati pawo.) 18 Samalani kuti pakati panu lero osati pagumanike mwamuna, nkazi, banja panango dzinza yomwe ntima wake wapatuka kusiya Yahova Mulungu wathu nkuyenda kukatumikira milungu yamakhaindi yanango kuti pakati panu osati pagumanike muju wobulisa chipaso chapoizoni na chitsamba chowawa.

19 Koma peno munango wabva mawu ya lumbiro mwiyi nkuyankhula modzikwiza muntima mwake kuti: ‘Ninantendere podiya kuti ninkupitiriza kufamba motewedza vofuna va ntima wangu,’ vomwe vidzachitise kuti aliyese yemwe ali naye pafupi adzongewe, 20 Yahova adzakhululukirelini munthu wateno. Koma ukali ukulu wa Yahova udzamugakire, ndipo matemberero yose yomwe yadanembewa m’bukhu iyi yadzamugwere, ndipo Yahova adzachoseretu dzina ya munthu muyo padziko yapasi. 21 Patsogolo pake Yahova adzamupatule pa madzinza yose ya Izirayeli kuti amubweresere tsoka, mobverana na matemberero yose yomwe yadzagwere wanthu osatewedza pangano yomwe yanembewa m’bukhu ya Chilamulo iyi.

22 M’badwo wa m’tsogolo wa wana wanu na mulendo wochokera kudziko yakutali akadzawona miliri na matenda yomwe Yahova wabweresa mudziko mwiyi—* 23 akadzaona kuti dziko yose yadzongewa na sulufule, munyu na kupsa, mwakuti mudziko mumo mungabzaliwelini mbewu, mungaphukirelini kalikose ndipo mungamerelini chomera chirichose ndipo inkuwoneka ninge Sodomu na Gomora, Adima na Zeboyimu, mathaundi yomwe Yahova adayadzonga na ukali wake—* 24 wana wanu na alendo komasoti wanthu wamakhaindi yose adzanene kuti: ‘Ndawa chani Yahova wachitira dziko mwiyi vimwivi? Nchani chachitisa kuti ukali wake ugake maninge tene? 25 Pamwapo iwo adzanene kuti: ‘Ni ndawa yakuti alibe kutewedza pangano ya Yahova, Mulungu wa azibereki wawo, yomwe adapangana nawo panthawe yomwe ambawabulisa mudziko ya Iguputo. 26 Koma iwo adayenda kukatumikira milungu yanango na kuyagwadira, milungu yomwe ambayadziwalini na yomwe alibe kuwabvumiza kuti ambayatumikire. 27 Pavidateno, ukali wa Yahova udagakira dziko mwiyi ndipo adaibweresera matemberero yose yomwe yadanembewa m’bukhu iyi. 28 Pamwapo Yahova adawazula* mudziko yawo ali wokalipa maninge nkuwayendesa kudziko inango, komwe ali lero.’

29 Yahova Mulungu wathu adziwa vinthu vose vobisika, koma aulula vinthu kwa isepano na kwa azizukulu wathu kumibadwomibadwo, kuti titewedze mawu yose ya Chilamulo ichi.”