Deuteronomo

28 “Mukabveradi mawu ya Yahova Mulungu wanu pakuwonesesa kuti munkutewedza malamulo yake yose yomwe ninkukupasani lero, Yahova Mulungu wanu adzakukwizenidi padzulu pa mitundu yose ya padziko yapasi. 2 Mudzatambire madaliso yose mwaya ndipo vinthu vabwino vose vimwivi vidzakhale vanu, mukapitiriza kubvera mawu ya Yahova Mulungu wanu:

3 Mudzakhale odalisiwa muthaundi ndipo mudzakhale pomwe odalisiwa m’munda.

4 Wana wanu adzakhale odalisiwa,* chipaso cha mudziko yanu, wana wa vipfuwo vanu, wana wa ng’ombe zanu na wana wa nkhosa zanu.

5 Dengu yanu na chombo chanu chokanyiramo ufa vidzakhale vodalisiwa.

6 Mudzakhale odalisiwa pa vochita vanu vose.

7 Yahova adzachitise kuti wanthu omwe akuzondani omwe ankufuna kuchita namwe nkhondo, awiniwe pamaso panu. Pakubwera kudzamenyana namwe adzapite na njira ibodzi, koma pakuthawa pamaso panu adzapite na njira 7 zosiyanasiyana. 8 Yahova adzadalise nyumba zanu zosungiramo vinthu komasoti chirichose chomwe munkuchita ndipo adzakudaliseni mudziko yomwe Yahova Mulungu wanu ankukupasani. 9 Yahova adzakuchitiseni kukhala wanthu wake ochena, mobverana na vomwe iye adalumbira kwa imwepo, ndawa munkupitiriza kubvera malamulo ya Yahova Mulungu wanu ndipo munkufamba munjira zake. 10 Wanthu wose padziko yapasi adzawone kuti munkudziwika na dzina ya Yahova, ndipo adzachite namwe mantha.

11 Yahova adzakupaseni wana azinji na vipfuwo vizinji ndipo dothi ya mudziko yomwe Yahova adalumbira kwa azibereki wanu kuti adzakupaseni, idzabereke vipaso vizinji. 12 Yahova adzakufungulireni kudzulu, nyumba yake yabwino yosungiramo vinthu, kuti akupaseni nvula pa nthawe yake mudziko yanu na kudalisa chirichose chomwe munkuchita. Mudzakweretese vinthu mitundu yazinji koma imwepo mudzafunikelini kukwereta kanthu kwa iwo. 13 Yahova adzakuchitiseni kuti mukhale nsolo osati nchira ndipo mudzakhale padzulu osati m’nyantsi, mukapitiriza kubvera malamulo ya Yahova Mulungu wanu yomwe ninkukupasani lero kuti mumbayaphatise basa na kuyatewedza. 14 Ayi kupatuka nkusiya kutewedza mawu yose yomwe ninkukulamulani lero, nkuyenda kumakulu panango kumadzere kuti mulondole milungu yanango nkuyatumikira.

15 Koma mukaleka kubvera mawu ya Yahova Mulungu wanu pakuwonesesa kuti munkutewedza malamulo yake yose na malangizo yake yomwe ninkukupasani lero, mudzatembererewe ndipo vinthu voipa vomwe vidzakuchitikireni ni ivi:

16 Mudzakhale otembererewa muthaundi ndipo mudzakhale pomwe otembererewa m’munda.

17 Dengu yanu komasoti chombo chanu chokanyiramo ufa vidzakhale votembererewa.

18 Wana wanu adzakhale ang’onong’ono,* ndipo vokolola va m’munda mwanu vidzakhale ving’onong’ono, wana wa ng’ombe zanu na wana wa nkhosa zanu adzakhale ang’onong’ono.

19 Mudzakhale otembererewa pa vochita vanu vose.

20 Yahova adzakutumizireni matemberero, chisokonezo na chilango pa chirichose chomwe munkuchita mpakana pomwe mudzadzongewe nkumala mwakankulumize, ndawa ya vinthu voipa vomwe munkuchita ndawa yakuti mwanisiya. 21 Yahova adzachitise kuti matenda yakungingimireni mpakana adzakupfudzeni mudziko yomwe munkuyenda kukaitenga kuti ikhale yanu. 22 Yahova adzakulangeni na chifuwa chikulu, kupsa thupi kopasa mantha, kutupa, nthawe yotentha,* chibemba, mphepo yakupsa yodzonga mbewu na matenda ya mbewu. Vimwivi vidzakubonereseni mpakana mudzamaliretu. 23 Kudedza komwe kuli padzulu pa nsolo wanu kudzakhale ninge kobre* ndipo dothi yanu idzakhale ninge chisimbi. 24 Yahova adzakugwesereni nchenga na pfumbi ninge nvula mudziko yanu. Adzakugwesereni vimwivi kuchokera kudzulu mpakana mudzadzongeke. 25 Yahova adzachitise kuti wanthu omwe azondana namwe akuwineni. Pakuyenda kukamenyana nawo mudzapite na njira ibodzi, koma pakuthawa mudzapite na njira 7 zosiyanasiyana. Mafumu yose ya padziko yapasi yadzachite mantha yakadzawona vinthu voipa vomwe vakuchitikirani. 26 Mukadzaphewa mudzadyewe na mbalani zose zomwe zimbululuka m’dzulu na vilombo vofamba pasi ndipo padzagumanikelini wovigopsya.

27 Yahova adzakulangeni na vithuza vaku Iguputo, matenda ya muyi,* vipere na vironda pakhanda ndipo mudzapolelini matenda mwaya. 28 Yahova adzakupengeseni, kukukhalisani lombe na kukuchitisani kuti musokonezeke. 29 Masikati mudzampsampsadzire ninge momwe lombe* ampsampsadzirira mumdima ndipo chirichose chomwe mudzachite chidzakufambirenilini bwino. Nthawe zose wanthu ambadzakubereni na kukutengerani vinthu vanu palibe munthu wokupulumusani. 30 Mudzapolomise nkazi kuti mumulowole koma mwamuna munango adzamuponderere. Mudzamange nyumba koma mudzakhalemolini. Mudzabzale miti ya uva koma mudzadyelini vipaso vake. 31 Ng’ombe yanu idzaphewe imwepo munkuwona koma mudzadyelini nyama yake. Bulu wanu adzabewe imwepo munkuwona ndipo mudzamuwonelini pomwe. Nkhosa yanu idzaperekewe kwa wanthu omwe akuzondani ndipo padzakhale palibe wokupulumusani. 32 Wana wanu amuna na wana wanu akazi adzaperekewe kwa wanthu anango imwepo munkuwona ndipo nthawe zose mudzafunisise kuwawona, koma mudzakhale mulibe mphanvu. 33 Wanthu omwe munkuwadziwalini adzadye vipaso va mudziko yanu na mbewu zanu zose ndipo nthawe zose mumbadzaberewe komasoti kujererewa. 34 Mudzasokonezeke ndawa ya vomwe mudzawone.

35 Yahova adzakulangeni na vithuza vowawa na vosapola mu nkhongono na m’minyendo mwanu. Matenda mwaya yadzayambire kumapazi mpakana pampsoma. 36 Yahova adzakuthamangiseni pabodzi na mpfumu yanu yomwe mudzaikhe kuti imbakutongeni, nkukuyendesani kwa ntundu wa wanthu omwe imwepo olo azibereki wanu alibe kuudziwa. Kumuko mudzatumikire milungu yanango, milungu yamuti na ya mwala. 37 Wanthu adzachite mantha akadzawona vomwe vakuchitikirani ndipo mudzanenewe na kunyozewa pakati pa mitundu yose ya wanthu, komwe Yahova ankukuthamangisirani.

38 Mudzabzale mbewu zizinji m’munda, koma mudzakolole zing’onong’ono ndawa abombo wa dzombe adzadye mbewu mwizo. 39 Mudzalime nkubzala miti ya uva koma mudzathyolelini uva panango kumwa vinyu wake ndawa vikonye vidzadye uva muyo. 40 Mudzakhale na miti ya maolivi mudera yanu yose, koma mudzadzolelini mafuta ndawa maolivi yanu yadzayoyoke. 41 Mudzabereke wana amuna na akazi, koma adzakhalelini wanu ndawa adzatengewe nkuyenda ku ukapolo. 42 Tulombo tomwe tukhala tuzinji tudzadzonge miti yanu yose na vipaso va mudziko yanu. 43 Mulendo yemwe ankukhala pakati panu adzapitirize kukhala wamphanvu, koma imwepo mphanvu zanu zidzapitirize kucheperachepera. 44 Iye adzakukwereteseni vinthu koma imwepo mudzakwaniselini kumukweretesa. Iye adzakhale nsolo koma imwepo mudzakhale nchira.

45 Matemberero yose mwaya yadzakugwereni ndipo vinthu voipa vose vimwivi vidzakuchitikireni mpakana mudzadzongeke, ndawa mulibe kubvera mawu ya Yahova Mulungu wanu mwa kusaphatisa basa malamulo na malangizo yomwe adakupasani. 46 Matemberero mwaya yadzapitirize kugwera imwepo na wana wanu ninge chizindikiro na chenjezo kwa imwepo mpakana kalekale, 47 ndawa yakuti mulibe kutumikira Yahova Mulungu wanu mokondwa komasoti na ntima wokondwera, pomwe mwenze na chirichose na vinthu vizinji. 48 Yahova adzakutumizireni wanthu omwe akuzondani kuti akuchiteni nkhondo ndipo mudzawatumikire munanjala, nyota, usiwa komasoti munkusowa chirichose. Iye adzakumangeni djoko yasimbi m’khosi mwanu mpakana adzakudzongeni.

49 Yahova adzatumize ntundu wakutali kuchokera kumalekedzero ya dziko yapasi kuti adzakuchiteni nkhondo. Ntundu muyo udzamenyane namwe mofulumiza maninge ninge momwe mphungu iphatira nyama. Chiyankhulo cha ntundu muyo mudzachibvelini, 50 ntundu wowoneka mopasa mantha womwe udzabverelini ntsisi munthu wachikulire panango kuchitira chifundo mulumbwana. 51 Iwo adzadye wana wa vipfuwo vanu na vipaso volimiwa m’munda mwanu mpakana mudzadzongeke. Adzakusiyirenilini mbewu iriyose, vinyu unyowani panango mafuta, mwana wa ng’ombe panango mwana wa nkhosa mpakana adzakudzongeni. 52 Adzakuzingeni nkukufungirani m’mathaundi yanu* yose, mpakana mipanda yanu yataliyatali na yolimba maninge yomwe munkuthemba yadzagwe. Shuwadi adzakuzingeni m’mathaundi yanu yose mudziko yanu yomwe Yahova Mulungu wanu wakupasani. 53 Vikadzateno mudzadye wana wanu chaiwo,* nyompfu wa wana wanu amuna na wana wanu akazi omwe Yahova Mulungu wanu wakupasani, ndawa ya mabvuto yopasa mantha yomwe mudzagumane nayo wanthu omwe akuzondani akadzakuzingani.

54 Olo mwamuna yemwe ni wachifundo komasoti wopfatsa pakati panu, adzachitirelini chifundo m’bale wake, nkazi wake wapamoyo na wana wake amuna omwe asala, 55 ndipo adzawapasekolini m’nyompfu uliwose wa wana wake amuna omwe adzawadye, pakuti adzakhale alibiretu chirichose ndawa ya mabvuto yopasa mantha yomwe mudzagumane nayo, wanthu omwe akuzondani akadzazinga mathaundi yanu. 56 Ndipo nkazi yemwe adakulira pabwino na molekererewa,* yemwe akalibe waganizako voponda pasi ndawa yakuti adakulira pabwino, adzachitirelini chifundo mwamuna wake wapamoyo, mwana wake mwamuna na mwana wake nkazi. 57 Iye adzafunelini kuwapasako vobula m’mimba mwake patsogolo pakuti wabereka komasoti m’nyompfu wa wana wake amuna omwe wabereka, pakuti adzawadye mobisa ndawa ya mabvuto yopasa mantha yomwe mudzagumane nayo wanthu omwe akuzondani akadzazinga mathaundi yanu.

58 Peno mudzatewedzelini mosamala mawu yose ya Chilamulo ichi yomwe yanembewa mu bukhu iyi, ndipo peno mudzagopelini dzina yaulemerero yopasa mantha mwiyi, dzina ya Yahova Mulungu wanu, 59 Yahova adzabwerese miliri yopasa mantha pa imwepo na wana wanu. Miliri mwayo yadzakhale yakulu maninge na yokhalisa, ndipo mudzaphatiwe na matenda yopasa mantha na yokhalisa. 60 Adzakubweresereni matenda yose ya ku Iguputo yomwe mumbachita nayo mantha, ndipo mudzapolelini. 61 Kuingizira pamwapo, Yahova adzakubweresereni matenda yaliyose na muliri uliwose womwe ukalibe wanembewako mu bukhu ya Chilamulo iyi, mpakana mudzadzongewe. 62 Olo kuti mwawanda ninge nyenyezi zakudzulu, mudzakhale ang’onong’ono ndawa yakuti mulibe kubvera mawu ya Yahova Mulungu wanu.

63 Ninge momwe Yahova adakondwera pakuchitisa kuti vinthu vikufambireni bwino na kuchitisa kuti muwande, Yahova adzakondwe pomwe kuti akudzongeni nkukupfudzani ndipo mudzamaliretu mudziko yomwe munkuyenda kukaitenga kuti ikhale yanu.

64 Yahova adzakunyaluseni pakati pa mitundu yose, kuchokera kumalekedzero ya dziko mpakana kumalekedzero yanango ya dziko. Kumuko mudzatumikire milungu ya miti na milungu ya minyala yomwe imwepo panango azibereki wanu alibe kuyadziwa. 65 Mudzasowe ntendere pakati pa mitundu mwayo ndipo mudzagumanelini malo yakuti phazi yanu iponde kuti ipumule. Koma Yahova adzachitise kuti mumbandokhala na nkhawa, adzachitise kuti maso yanu yambawone moshupikira ndipo adzakuchitiseni kuti mukhale mulibe chidikhiro. 66 Moyo wanu udzakhale pangozi yopasa mantha ndipo mudzakhale mwamantha usiku na masikati, mwakuti mudzakhalelini otsimikiza kuti peno mudzapitirize kukhala na moyo. 67 Machibese mudzanene kuti: ‘Vidakakhala bwino kudakakhala maulo!’ ndipo maulo mudzanene kuti: ‘Vidakakhala bwino kudakandokhala machibese!’ ndawa ya mantha yomwe mudzakhale nayo, komasoti ndawa ya vomwe mudzawone. 68 Yahova adzakubwezereni ku Iguputo pa barko nkupita na njira yomwe nidakuuzani kuti: ‘Mudzaiwonelini pomwe.’ Kumuko mudzafunisise kudzigulisa kwa wanthu omwe akuzondani kuti mukhale akapolo amuna na akazi, koma adzasowe wokugulani.”