Deuteronomo

22 “Mukaona ng’ombe panango nkhosa ya m’bale wanu yasokera, ayi kumbandoisiya koma mumbaibweze. Mumbaipese nkuiyendesa kwa m’bale wanu muyo. 2 Koma peno munikachiro akhalalini pafupi na imwepo panango munkumudziwalini, mumbatenge chipfuwo mwicho nkuyenda nacho kumuyi kwanu. Mumbasunge chipfuwo mwicho mpakana munikachiro adzabwere nkudzachifagafaga ndipo mumbamubwezere. 3 Mumbachite vimwivi na bulu wa m’bale wanu, nguwo yake, panango chirichose chomwe m’bale wanu wataya imwepo nkuchigumana. Ayi kumbandochisiya teno, koma mumbachilokote.

4 Mukaona bulu wa m’bale wanu panango ng’ombe yake yagwa pansewu, ayi kumbandoisiya. Mumbamuthandize m’bale wanu muyo pakuiyimiririsa.

5 Nkazi osati ambavale chovala cha mwamuna ndipo mwamuna osati ambavale chovala cha nkazi. Ndawa aliyese wochita vimwivi ni wonyantsa kwa Yahova Mulungu wanu.

6 Peno mwagumana chisa cha mbalani m’mbali mwa nsewu peno chiri m’muti panango pasi, peno munavikanda panango mazayi, mayi ali undatire vikanda panango ali bwamire mazayi, ayi kumbatenga mayi na vikanda vake. 7 Mumbaonesese kuti mwathamangisa mayi muyo, koma vikanda mungavitenge. Mumbachite vimwivi kuti vinthu vikufambireni bwino nakuti mukhale na moyo kwa nthawe itali.

8 Mukamanga nyumba inyowani, mumbamange pomwe kampanda padenga ya nyumba mwiyo, kuchitira kuti wanthu wapamuyi panu angakhale na mulandu wakupha munthu peno munthu angagwe kuchokera padenga mwapo.

9 M’munda wanu wa uva ayi kumbabzalamo mbewu za mitundu yanango. Ndawa mukachita vimwivo, vokolola vanu vose na uva wanu vidzaperekewe kumalo yopatulika.

10 Ayi kumbamanga ng’ombe na bulu padjoko ibodzi kuti vigaule.

11 Ayi kumbavala chovala chomwe adachikonza pakuphatanidza ukuse wa nkhosa na usalu wa thonje.

12 Mumbamange usalu m’makhona yanayi ya chovala chanu.

13 Mwamuna akatenga nkazi nkugona naye koma waleka kumukonda,* 14 ndipo ankunena kuti adachita khalidwe yoipa na kumuipisira mbiri yake pakunena kuti: ‘Inepano nidatenga nkazi uyu koma panidagona naye, niribe kugumana umboni uliwose wakuti wenze namwali.’ 15 Vikakhala teno, ababa na amayi wa mtsikana muyo ambayendese umboni wowonesa kuti mtsikana muyo wenze namwali kwa akuluakulu wa thaundi, kunsuwo wa thaundi mwiyo. 16 Ababa wa mtsikana muyo ambauze akuluakulu mwawo kuti: ‘Inepano nidapereka mwana wangu nkazi kwa mwamuna uyu kuti akhale nkazi wake koma ankumuzonda,* 17 ndipo ankunena kuti anamulandu wochita khalidwe yoipa nkumbati: “Nawona kuti palibe umboni wowonesa kuti mwana wanu uyu wenze namwali.” Koma umboni wowonesa kuti mwana wangu wenze namwali ni uyu.’ Akachita teno ambapfuthule chofunika pamaso pa akuluakulu wa thaundi mwiyo. 18 Manje akuluakulu wa thaundi mwiyo ambaphate mwamuna muyo nkumupasa chilango. 19 Akachita teno, ambamulipirise masekeli* 100 yasiliva, ndipo ambapereke kobiri mwizo kwa ababa wa mtsikana muyo ndawa waipisa mbiri ya namwali wa mu Izirayeli. Mtsikana muyo apitirize kukhala nkazi wake ndipo adzabvumiziwelini kumusiya kwa moyo wake wose.

20 Koma peno vatsimikizirika kuti ni chaivodi ndipo palibe umboni wowonesa kuti mtsikana muyo wenzedi namwali, 21 ambabwerese mtsikana muyo pansuwo wa nyumba ya ababa wake ndipo amuna wa muthaundi mwiyo ambamuphwanye na minyala kuti afe, ndawa wachita chinthu chopasa manyazi mu Izirayeli, pakuchita uhule* adakali pamuyi pa ababa wake. Mumbachose woipa muyo pakati panu.

22 Peno mwamuna wagumaniwa ankugona na nkazi wa munikachiro, wose awiri, mwamuna yemwe ambagona na nkazi muyo na nkazi yemwe ambagona naye, ambafere pabodzi. Mumbachose woipa mwawo mu Izirayeli.

23 Peno namwali adapolomisiwa na mwamuna kuti adzamulowole, ndipo mwamuna munango wamugumana muthaundi nkugona naye, 24 wose awiri mumbawayendese kunsuwo wa thaundi nkuwaphwanya na minyala kuti afe. Mtsikana muyo afe ndawa yakuti alibe kukuwa muthaundi mwiyo ndipo mwamuna muyo afe ndawa yakuti waipisa nkazi wa munzake. Mumbachose woipa mwawo pakati panu.

25 Koma peno mwamuna muyo adagumana mtsikana wopolomisiwa kulowolewa muyo kuthengo nkumuponderera, mwamuna muyo afe yekha. 26 Mtsikana muyo ayi kumuchita chirichose. Iye alibe kuchita chimo yomwe ingachitise kuti afe. Mulandu muyu unkulingana na wa munthu yemwe waphindukira munzake nkumupha. 27 Ndawa yakuti adamugumana kuthengo, ndipo mtsikana muyo adakuwa koma penze palibe womupulumusa.

28 Peno mwamuna wagumana na namwali yemwe alibe kupolomisiwa na mwamuna kuti adzamulowole ndipo wamuphata nkugona naye, ndipo aphatiwa, 29 mwamuna muyo ambapereke masekeli yasiliva 50 kwa ababa wa mtsikana muyo, ndipo ambakhale nkazi wake. Ndawa yakuti wamuchitisa manyazi, adzabvumiziwelini kumusiya kwa moyo wake wose.

30 Osati pambagumanike mwamuna aliyese wolowola nkazi wa ababa wake ndawa angachitise manyazi ababa wake.”*