Deuteronomo
21 “Peno mwagumana munthu wakufa pathengo, mudziko yomwe Yahova Mulungu wanu ankukupasani kuti ikhale yanu, ndipo yemwe wapha munthu muyo ankudziwikalini, 2 akulu na oweruza wanu ambayende kukapima nsenga kuchokera pomwe pali munthu wakufa muyo mpakana kukafika kumathaundi yose yozungulira malo yomwe munthu muyo wagumanika. 3 Ndipo akulu wa thaundi yomwe iri pafupi na pomwe pagumanika munthu wakufa muyo, ambatenge ng’ombe ing’ono ikazi yomwe ikalibe kuphatako basa, yomwe ikalibe yamangiwako padjoko nkuguza chinthu. 4 Akulu wa muthaundi mwiyo ambatenge ng’ombe mwiyo nkuyenda nayo kuchigwa chomwe chinamadzi yomwe yankuyerera. Chigwa mwichi chikhale kuti chikalibe chalimiwako panango kubzaliwa mbewu. Akafika kumuko ambaphe ng’ombe ing’ono mwiyo pakuchita kuithyola khosi.
5 Antsembe omwe ni Alevi, ambafike pafupi ndawa ndiwo omwe Yahova Mulungu wanu wawasankhula kuti ambamutumikire komasoti ambadalise mudzina ya Yahova. Iwo ndiwo omwe afunika kunena njira yomalisira nkangano uliwose wa vinthu vankhanza* vomwe vachitika. 6 Manje akulu wose wa muthaundi yomwe iri pafupi na munthu wakufa muyo ambasambe m’manja padzulu pa ng’ombe ire yomwe yathyolewa khosi muchigwa. 7 Ndipo iwo ambanene kuti: ‘Manja yathu yalibe kupha munthu muyu, ndipo maso yathu yalibe kuwona munthu muyu ankuphewa. 8 Imwe Yahova, ayi kupasa mulandu wanthu wanu Aizirayeli omwe mudawawombola, ndipo ayi kubvuma kuti mulandu wa magazi ya munthu wosaphonya ukhale pa wanthu wanu Aizirayeli.’ Akadzachita teno adzapasiwelini mulandu wakupha munthu. 9 Mukadzachita vimwivi mudzachose mulandu wakupha munthu wosaphonya pakati panu, ndawa mudzakhale kuti mwachita vinthu vabwino pamaso pa Yahova.
10 Mukayenda kunkhondo kukamenyana na wanthu omwe muzondana nawo, ndipo Yahova Mulungu wanu nkukuwinirani wanthu mwawo, imwepo nkuwatenga kuti akhale akapolo, 11 ndipo pakati pa wanthu ophatiwa mwawo mwaonapo nkazi wokhuza ndipo mwamusirira* mwakuti mukufuna kumutenga kuti akhale nkazi wanu, 12 mungamutenge nkungena naye m’nyumba mwanu. Patsogolo pake ambagere tsitsi yake nkusamalira ntchala* zake. 13 Ambachinje vovala vomwe wenze adavala panthawe yomwe adaphatiwa kuti akhale kapolo ndipo ambakhale m’nyumba mwanu. Ambalire maliro ya ababa wake na amayi wake kwa mwezi wantero, patsogolo pake mungagone naye. Imwepo mudzakhale mwamuna wake ndipo iye adzakhale nkazi wanu. 14 Koma peno munkukondwalini naye mumbamubvumize kuchoka nkuyenda kulikose komwe ankufuna. Koma mufunikalini kumugulisa panango kumuchitira nkhanza, ndawa mwamuchitisa manyazi.
15 Peno mwamuna ali na akazi awiri, koma akonda m’bodzi kuposha munango,* ndipo akazi wose mwawo amuberekera wana amuna, koma mwana woyamba kubadwa ni wa nkazi wosakondewa, 16 pantsiku yomwe adzagawe chuma chabanja kwa wana wake amuna, adzabvumiziwelini kuona mwana mwamuna wa nkazi wokondewa ule ninge mwana wake woyamba kubadwa m’malo mwa mwana mwamuna wa nkazi wosakondewa ule, yemwe ni woyambadi kubadwa. 17 Ambabvume kuti mwana mwamuna wa nkazi wake wosakondewa uyo ndiye woyamba kubadwa, nkumupasa magawo yawiri pa chirichose chomwe anacho ndawa iye ni chiyambi cha mphanvu zake zobereka. Mwana muyo ndiye woyenerera kutambira udindo wa mwana woyamba kubadwa.
18 Peno munthu anamwana mwamuna wosabvera ndipo ni wopanduka, yemwe abveralini ababa wake panango amayi wake, ndipo ayesesa kumulangiza koma alamba kuwabvera, 19 ababa wake na amayi wake ambamuphate nkuyenda naye kwa akuluakulu wa kunsuwo wa thaundi yawo, 20 ndipo ambauze akuluakulu wa thaundi mwawo kuti: ‘Mwana wathu uyu akubvalini, ni wopanduka ndipo alamba kutibvera. Ni wolungwa ndipo ni chidakwa.’ 21 Patsogolo pake, amuna wose wa muthaundi yawo ambamuponyere minyala nkumupha. Mumbachose woipa muyo pakati panu, ndipo Aizirayeli wose adzabve nkuchita mantha.
22 Peno munthu wachita chimo yofunika kuti aphewe, patsogolo pake munthu muyo waphewadi, ndipo mwamumanika pamuti, 23 chitanda chake osati chimbakhale pamuti mwapo usiku wose. Koma mumbaonesese kuti mwamuikha m’manda ntsiku mwiyo, ndawa munthu aliyese womanikiwa pamuti ni wotembererewa kwa Mulungu. Ayi kuipisa dziko yomwe Yahova Mulungu wanu ankukupasani kuti ikhale yanu.”