Deuteronomo
23 “Mwamuna yemwe adathenewa pakuchita kuphwanyiwa mavalo yake panango yemwe adagwatiwa vidzo voberekera, osati ambangene mumpingo wa Yahova.
2 Mwana wanchigololo* osati ambangene mumpingo wa Yahova. Olo mpakana m’badwo wachi 10, mbadwa zake osati zimbangene mumpingo wa Yahova.
3 Mbadwa ya Amoni panango ya Mowabu osati imbangene mumpingo wa Yahova. Olo mpakana m’badwo wachi 10, mbadwa zawo osati zidzangene mumpingo wa Yahova mpakana kalekale, 4 ndawa yakuti alibe kukupasani chakudya na madzi kuti akuthandizeni pemwenze paulendo wochoka ku Iguputo, komasoti ndawa yakuti adanemba ganyu Balamu mwana wa Beori, yemwe kwawo ni ku Petori ku Mesopotamiya kuti akutemberereni. 5 Koma Yahova Mulungu wanu adalamba kubvera Balamu. Ndipo Yahova Mulungu wanu adakuchinjirani temberero nkukhala daliso, ndawa Yahova Mulungu wanu adakukondani. 6 Ayi kumbachita chirichose pakufuna kuwathandiza kuchitira kuti angambakhale mwantendere nakuti vinthu vingambawafambire bwino ntsiku zose za moyo wanu.
7 Ayi kumbazonda m’badwa ya Edomu, ndawa ni m’bale wanu.
Ayi kuti mumbazonde munthu waku Iguputo ndawa mwenze alendo mudziko yawo. 8 Wana wawo wa m’badwo wachitatu angangene mumpingo wa Yahova.
9 Mukamanga nsasa kuti mumenyane na wanthu omwe muzondana nawo, mumbapewe chirichose chopsyipiza.* 10 Peno mwamuna wapsyipiziwa ndawa yochoka umuna usiku, ambayende kunja kwa nsasa ndipo osati ambangene pomwe mu nsasa mumo. 11 Manje kumaulo ambasambe na madzi ndipo patsogolo pake angabwerere munsasa dzuwa ikachoma. 12 Mumbakhale na malo* kunja kwa nsasa, komwe mumbayende mukafuna kuyenda kuthengo.* 13 Pa vitsulo vanu pambakhale pomwe chokumbira. Manje mukafuna kuyenda kuthengo kunja kwa nsasa, mumbakumbe dindi na chokumbira mwicho ndipo mukamaliza mumbafuchire voipa ivo. 14 Ndawa yakuti Yahova Mulungu wanu ankufambafamba munsasa mwanu kuti akupulumuseni nakuti apereke m’manja mwanu wanthu omwe muzondana nawo. Ndipomwapa nsasa wanu umbakhale wochena, kuti osati awone choipa chirichose pakati panu nkusiya kufamba namwe pabodzi.
15 Kapolo akathawa kwa abwana wake nkubwera kwa imwepo, osati mumbamubweze kwa abwana wake mwawo. 16 Iye ambakhale namwe pabodzi pamalo yaliyose yomwe angasankhule muthaundi ibodzi pamathaundi yanu kulikose komwe wafuna ndipo ayi kumbamuboneresa.
17 Mwana nkazi aliyese wachi Izirayeli osati ambakhale hule yapakachisi. Ndipo mwana mwamuna aliyese wachi Izirayeli osati ambakhale hule yapakachisi. 18 Ayi kumbabweresa malipiro ya hule ikazi panango malipiro ya hule imuna* m’nyumba ya Yahova Mulungu wanu kuti mukwanirise polomisi iriyose, ndawa malipiro yose mwayo ni yonyantsa kwa Yahova Mulungu wanu.
19 M’bale wanu ayi kumbamulipirisa kalowa pa kobiri, chakudya panango pa chirichose chomwe munthu angafune kalowa. 20 Mulendo mungamulipirise kalowa, koma m’bale wanu ayi kumbamulipirisa kalowa, kuti Yahova Mulungu wanu akudaliseni pa chirichose chomwe munkuchita mudziko yomwe munkuyenda kukaitenga kuti ikhale yanu.
21 Mukapolomisa chinthu kwa Yahova Mulungu wanu, ayi kumbachebwa kukwanirisa vomwe mwapolomisa ivo. Ndawa Yahova Mulungu wanu adzafune kuti mukwanirise vomwe mwapolomisa ivo. Mukaleka kuchita teno mudzakhale kuti mwachimwa. 22 Koma mukaleka kupolomisa, mudzachimwelini. 23 Mumbasunge mawu ya pakamwa panu ndipo mumbakwanirise vomwe mudapolomisa na pakamwa panu ninge ntsembe yaufulu yoperekewa kwa Yahova Mulungu wanu.
24 Mukangena m’munda wa uva wa munzanu mungadye uva mwamungakwanisire kuti mukhute, koma ayi kuikha unango m’sakha mwanu.
25 Mukangena m’munda wa tirigu wa munzanu, mungapulule tirigu yemwe wakhuma, koma ayi kuchita kumweta na djeko tirigu wa munzanu.”