Deuteronomo
20 “Mukayenda kunkhondo kukamenyana na wanthu omwe muzondana nawo, nkuona kuti anamakavalo, ngolo zankhondo na masocha yazinji kuposha imwepo, ayi kuchita nawo mantha ndawa Yahova Mulungu wanu, yemwe adakubulisani mudziko ya Iguputo ali namwe pabodzi. 2 Mukakhala pang’ono kuyamba nkhondo, wantsembe ambafike pafupi nkuyankhula na wanthu. 3 Iye ambawauze kuti: ‘Imwe Aizirayeli, bveserani. Mwakhala pang’ono kumenyana na wanthu omwe muzondana nawo. Ayi kuchita mantha. Ayi kugopa, kuchita mantha panango kunjenjemera ndawa ya iwo, 4 ndawa Yahova Mulungu wanu ankufamba namwe pabodzi kuti akumenyereni nkhondo nkukupulumusani kwa wanthu omwe muzondana nawo.’
5 Nawombo atsogoleri ambauze wanthu kuti: ‘Ko pali yemwe wamanga nyumba inyowani koma akalibe wayamba kukhalamo? Abwerere kunyumba yake mwiyo, kuchitira kuti angafe kunkhondo, ndipo munthu munango angakhalemo. 6 Ko pali yemwe walima munda wa uva koma akalibe kuyamba kuthyola vipaso vake? Abwerere kumuyi kwake, kuchitira kuti angafe kunkhondo ndipo munthu munango angathyole vipaso mwivo. 7 Ko pali yemwe adapolomisa nkazi kuti adzamulowole koma akalibe kumulowola? Abwerere kumuyi kwake, kuchitira kuti angafe kunkhondo ndipo nkazi muyo angalowolewe na mwamuna munango.’ 8 Atsogoleri mwawo ambabvunze pomwe wanthu mwawo kuti: ‘Ko pali wamantha na wosalimba ntima pano? Abwerere kumuyi kwake, kuchitira kuti angachitise mantha azibale wake ninge momwe iye wachitira.’ 9 Atsogoleri mwawo akamaliza kuyankhula na wanthu, ambasankhule akuluakulu wa magulu yankhondo kuti ambatsogolere wanthu mwawo.
10 Mukafenderera thaundi kuti mumenyane nayo, mumbauze wanthu wamuthaundi mwiyo kuti munkufuna kukhala nawo pantendere. 11 Peno wanthu wa muthaundi mwiyo akudawirani mwantendere nkukufungulirani misuwo yawo ya mipanda, wanthu wose omwe ali muthaundi mwiyo ambakhale wanu kuti ambakuphatireni basa yaukapolo ndipo ambakutumikireni. 12 Peno wanthu mwawo alamba kukhala namwe pantendere, ndipo ankuchita namwe nkhondo, imwepo mumbazinge thaundi mwiyo, 13 Mosakaikira, Yahova Mulungu wanu adzaipereke m’manja mwanu, ndipo mukachita teno mudzaphe mwamuna aliyese na chibemba. 14 Koma mumbatenge akazi, wana ang’onoang’ono, vipfuwo na chirichose chogumanika muthaundi mwiyo kuti vikhale vanu, ndipo mumbadye vomwe mwatenga kwa wanthu omwe muzondana nawo omwe Yahova Mulungu wanu wakupasani.
15 Mumbachite vimwivi na mathaundi yose yomwe yali kutali maninge na imwepo, yomwe yalilini pakati pa mathaundi ya makhaindi mwaya yomwe yali namwe pafupi. 16 Koma m’mathaundi ya wanthu mwawo, yomwe Yahova Mulungu wanu ankukupasani kuti yakhale yanu, ayi kubvuma kuti mukhale chamoyo chirichose. 17 Koma mudzadzonge wanthu wose. Mudzadzonge Ahiti, Aamori, Akanani, Aperezi, Ahivi na Ayebusi, mobverana na vomwe Yahova Mulungu wanu adakulamulani. 18 Mukawadzonge kuti osati akakupfunziseni kuchita vinthu vose vonyantsa vomwe achitira milungu yawo nkukuchitisani kuti muchimwire Yahova Mulungu wanu.
19 Mukazungulira thaundi na cholinga chakuti muitenge ndipo mwakhala munkumenyana nayo kwa ntsiku zizinji, ayi kugwata miti yake na mbadzo.* Mungadye vipaso va miti mwayo koma mufunikalini kuyagwata. Ko mutimbo wa m’munda ni munthu kuti mungachite naye nkhondo? 20 Mungandodzonga muti womwe munkuudziwa kuti ubereka vikolakola.* Muti wateno mungaugwate nkumangira mpanda wozungulira thaundi ya wanthu omwe akuchita namwe nkhondo, mpakana thaundi mwiyo idzagwe.”