Deuteronomo
19 “Yahova Mulungu wanu akadzadzonga mitundu ya mudziko yomwe Yahova Mulungu wanu ankukupasani, imwepo nkuwatengeradi dziko mwiyo na kukhala m’mathaundi yawo komasoti m’nyumba zawo, 2 mudzapatule mathaundi yatatu pakati pa dziko yomwe Yahova Mulungu wanu ankukupasani kuti ikhale yanu. 3 Dziko yomwe Yahova Mulungu wanu wakupasani kuti ikhale yanu, mudzaigawe vigawo vitatu ndipo mudzakonze misewu yoyenda kumathaundi mwayo kuti aliyese wakupha munthu ambathawire kumathaundi mwayo.
4 Manje vomwe vimbachitike na munthu yemwe wapha munzake nkuthawira kumuko kuti akhale na moyo ni ivi: Peno wapha munzake mwangozi ndipo ambazondanalini naye, 5 mwakulinganiza, munthu akayenda na munzake kuthengo kukafaga nkhuni, ndipo wasamula* djanja yake kuti agwate muti na mbadzo, koma mbadzo mwiyo yaguluka nkutema munzake muyo mpakana kumupha, yemwe wapha munzake muyo ambathawire kuthaundi ibodzi pa mathaundi mwaya kuti akhale na moyo. 6 Akaleka kuthawa, ndawa yakuti wobwezera magazi ni wokalipa maninge,* angathamangise wakupha munthu muyo nkumugumana patsogolo pake nkumupha ndawa yakuti nsenga woyenda kuthaundi mwiyo ungamutalimphire. Koma wakupha munzake muyo mwangozi ambafunikalini kufa ndawa yakuti ambazondanalini naye munzake muyo. 7 Ndipomwapa ninkukulamulani kuti: ‘Mupatule mathaundi yatatu.’
8 Yahova Mulungu wanu akadzaingizira dziko yanu mobverana na vomwe adalumbira kwa azibereki wanu, nkukupasani dziko yose yomwe adapolomisa azibereki wanu kuti adzawapase, 9 (peno mungatewedze mokhulupirika malamulo yose mwaya yomwe ninkukupasani lero, yakuti mumbakonde Yahova Mulungu wanu na kufamba munjira zake nthawe zose) mudzaingizire mathaundi yanango yatatu pa mathaundi mwaya. 10 Mukambachita vimwivi mudzaphelini munthu wosaphonya mudziko yomwe Yahova Mulungu wanu ankukupasani kuti ikhale yanu ndipo mudzakhalelini na mulandu wakupha munthu.
11 Koma peno munthu ambazonda munzake ndipo wamubishalira panjira nkumupweteka maninge mpakana munzake muyo kufa, iye nkuthawira kuthaundi ibodzi pa mathaundi mwaya, 12 akuluakulu wa muthaundi yakwawo ambamuchemerese kuchokera kumuko nkumupereka m’manja mwa wobwezera magazi ndipo ambamuphe. 13 Ayi kumuchitira* chifundo ndipo mumbachose mulandu wamagazi ya munthu wosaphonya mu Izirayeli kuti vinthu vikufambireni bwino.
14 Mukadzatambira malo mudziko yomwe Yahova Mulungu wanu ankukupasani kuti ikhale yanu, ayi kumbadzafutusa vizindikiro va malire ya munzanu, pamalo yomwe azibereki wanu adaikha kale malire.
15 Mboni ibodzi ni yosakwana kuti mutsimikizire kuti munthu waphonyadi panango kuchita chimo iriyose. Mumbatsimikizire nkhani mwiyo mukabva umboni wa wanthu awiri panango atatu. 16 Peno munthu wamuchitira chiwembu munzake ndipo wapereka umboni wabodza wakuti waphwanya lamulo, 17 wanthu awiri mwawo omwe ankugegedzana ambaime pamaso pa Yahova, panango kuti pamaso pa antsembe na oweruza omwe ankutonga milandu ntsiku mwizo. 18 Oweruza mwawo ambafufuze nkhani mwiyo mosamala ndipo peno munthu yemwe adapereka umboni muyo wadziwika kuti ambanama ndipo wanamizira m’bale wake mulandu wabodza, 19 mumbamuchitire vomwe ambafuna kuti vichitikire m’bale wake muyo, ndipo mumbachose woipa muyo pakati panu. 20 Wanthu wose adzabve nkuchita mantha, ndipo adzachitelini pomwe choipa chirichose ninge mwichi pakati panu. 21 Ayi kumbachita* chifundo. Pambakhale moyo kulipira moyo, diso kulipira diso, dzinu kulipira dzinu, djanja kulipira djanja, phazi kulipira phazi.”