Deuteronomo

16 “Mumbakumbukire kuti mwezi wa Abibu* ni wofunika ndipo mumbachite chikondwerero cha Pasika kwa Yahova Mulungu wanu, ndawa m’mwezi wa Abibu Yahova Mulungu wanu adakubulisani mu Iguputo usiku. 2 Ndipo mumbapereke ntsembe ya Pasika kwa Yahova Mulungu wanu. Mumbapereke nkhosa na ng’ombe pamalo yomwe Yahova adzasankhule kuikhapo dzina yake. 3 Ayi kumbadya ntsembe mwiyo pabodzi na chirichose chokhala na vofufumisa. Kwa ntsiku 7 mumbadye nkate ulibe vofufumisa, womwe ni nkate wamabvuto, ndawa mudabula mwakankulumize mudziko ya Iguputo. Mumbachite vimwivi kuti mumbakumbukire ntsiku yomwe mudabula mudziko ya Iguputo, ntsiku zose za moyo wanu. 4 Ayi kumbagumanika na ntanda wa ufa wokhala na vofufumisa m’dziko yanu yose kwa ntsiku 7. Nyama iriyose yomwe mwapereka ntsembe maulo, pantsiku yoyamba, osati imbagone mpakana machibese. 5 Mudzabvumiziwelini kupereka ntsembe ya Pasika muthaundi yanu iriyose yomwe Yahova Mulungu wanu ankukupasani. 6 Koma mumbadzapereke ntsembe ya Pasika mwiyo pamalo yomwe Yahova Mulungu wanu adzasankhule kuikhapo dzina yake. Mumbadzapereke ntsembe mwiyo maulo, dzuwa ikandochoma, panthawe yolingana na yomwe mudabula mu Iguputo. 7 Mumbadzaiwotche nkuidyera pamalo yomwe Yahova Mulungu wanu adzasankhule, ndipo machibese yake, mumbadzabwerere kumatenti yanu. 8 Mumbadye nkate ulibe vofufumisa kwa ntsiku 6 ndipo pantsiku yachi 7 mumbachitire Yahova Mulungu wanu nsonkhano wapadera. Pantsiku mwiyi ayi kumbaphata basa.

9 Mumbawerenge masondo 7. Mumbayambe kuwerenga masondo 7 mwayo kuchokera panthawe yomwe mwayamba kumweta tirigu. 10 Manje mumbachitire Yahova Mulungu wanu Chikondwerero cha Masondo, pakupereka ntsembe zaufulu zomwe mungakwanise, mobverana na momwe Yahova Mulungu wanu wakudalisirani. 11 Ndipo mumbadzakondwe pamaso pa Yahova Mulungu wanu, imwepo, mwana wanu mwamuna, mwana wanu nkazi, kapolo wanu mwamuna, kapolo wanu nkazi, Mulevi yemwe ankukhala muthaundi yanu,* mulendo yemwe ankukhala pakati panu, mwana wamasiye na nkazi wamasiye yemwe ankukhala pakati panu. Mumbadzakondwe pamalo yomwe Yahova Mulungu wanu adzasankhule kuikhapo dzina yake. 12 Mumbakumbukire kuti mwenze akapolo ku Iguputo, ndipo mumbasunge na kutewedza malamulo mwaya.

13 Mumbachite Chikondwerero cha Misasa kwa ntsiku 7, mukambatuta vokolola kuchokera pamalo yopulira mbewu, pamalo yosikinyira mafuta na pamalo yopondera uva. 14 Mumbakondwe pa chikondwerero chimwicho, imwepo, mwana wanu mwamuna, mwana wanu nkazi, kapolo wanu mwamuna, kapolo wanu nkazi, Mulevi, mulendo yemwe ankukhala pakati panu, mwana wamasiye na nkazi wamasiye yemwe ankukhala muthaundi yanu. 15 Mumbachitire Yahova chikondwerero mwichi kwa ntsiku 7 pamalo yomwe Yahova adzasankhule. Mumbachite chikondwerero mwichi ndawa yakuti Yahova Mulungu wanu adzadalise vokolola vanu vose na chirichose chomwe manja yanu yankuchita, ndipo imwepo mudzakhale okondwa maninge.

16 Mwamuna aliyese pakati panu ambakawonekere pamaso pa Yahova Mulungu wanu katatu pagole, pamalo yomwe Mulungu adzasankhule. Ambakawonekere pa chikondwerero cha Nkate Ulibe Vofufumisa, Chikondwerero cha Masondo na pa Chikondwerero cha Misasa. Palibe aliyese wa iwo yemwe afunika kukawonekera kwa Yahova alibe chinthu.* 17 Mphaso yomwe aliyese afunika kubweresa imbakhale yobverana na madaliso yomwe Yahova Mulungu wanu wakupasani.

18 Musankhule oweruza na atsogoleri wa dzinza iriyose m’mathaundi yose yomwe* Yahova Mulungu wanu ankukupasani ndipo ambaweruze wanthu mwachilungamo. 19 Ayi kumbakhonesa* chilungamo, ayi kumbakondera panango kutambira chifunga pakamwa, ndawa chifunga pakamwa chichitisa wanthu wanzeru kukhala osaona komasoti kupotoza mawu ya wanthu olungama. 20 Mumbachite vinthu mwachilungamo kuti mukhale na moyo nkukatenga dziko yomwe Yahova Mulungu wanu ankukupasani.

21 Ayi kudzabzala muti uliwose kuti ukhale muti* wopatulika pafupi na guwa yantsembe ya Yahova Mulungu wanu yomwe mudzakonze.

22 Ndipo ayi kudzaimisa chipilala chopatulika, chinthu chomwe Yahova Mulungu wanu achizonda.”