Deuteronomo
15 “Kumapeto kwa magole 7 yaliyose mumbakhululukire* wanthu omwe adakwereta vinthu vanu. 2 Pakukhululukira munthu yemwe anachikwerete uyo mumbachite ivi: Munthu aliyese ambakhululukire munzake yemwe anachikwerete chake. Osati ambachichimize munzake panango m’bale wake kuti abweze chikwerete mwicho, ndawa chilengezo chakuti wanthu wa vikwerete amasuke chaperekewa pakutewedza lamulo ya Yahova. 3 Mulendo mungamuchichimize kuti abwezere chikwerete, koma peno m’bale wanu wakwereta chinthu chanu chirichose, ayi kumbamuchichimiza kuti achibweze. 4 Pakati panu osati pagumanike munthu wosauka, ndawa Yahova adzakudalisenidi mudziko yomwe Yahova Mulungu wanu ankukupasani kuti ikhale yanu. 5 Adzakudaliseni pokhapokha peno mumbabvere mosamala mawu ya Yahova Mulungu wanu na kutewedza mokhulupirika malamulo yose mwaya yomwe ninkukupasani lero. 6 Yahova Mulungu wanu adzakudaliseni mobverana na vomwe adakupolomisani ndipo mitundu yazinji yadzakwerete vinthu vanu,* koma imwepo mudzafunikelini kukwereta chinthu. Mudzalamulire mitundu yazinji koma mitundu mwayo yadzakulamulirenilini.
7 Peno m’bodzi pa azibale wanu wasauka pakati panu, muthaundi ibodzi pa mathaundi yanu mudziko yomwe Yahova Mulungu wanu ankukupasani, ayi kumuumira ntima panango kumuumisira djanja yanu. 8 Koma mumbathandize m’bale wanu muyo mokoma ntima, ndipo mulimose momwe vingakhalire, mumbamukweretese* chirichose chomwe ankufuna panango chomwe ankusowa. 9 Samalani kuti osati mukhale na maganizo yoipa aya muntima mwanu yakuti: ‘Gole yachi 7 yakuti wanthu wachikwerete amasuke yafendera,’ nkukangira kuthandiza m’bale wanu wosauka muyo mokoma ntima, ne kumupasa chirichose. Peno angalirire Yahova ndawa ya vomwe imwepo mwamuchitira, mudzakhale kuti mwachimwa. 10 Mumbamupase mokoma ntima vomwe ankufuna ivo, ndipo ayi kumbamupasa* vinthu mwivo modandaula. Mukambachita vimwivi, Yahova Mulungu wanu adzakudaliseni pa chirichose chomwe munkuchita na basa zanu zose. 11 Mudziko yanu mudzapitirize kugumanika wanthu osauka. Ndipomwapa ninkukulamulani kuti: ‘Mumbakhale okoma ntima kwa m’bale wanu wobonera na wosauka mudziko yanu.’
12 Peno m’bale wanu adagulisiwa kwa imwepo, peno ni mwamuna panango nkazi wa Chiheberi, ndipo wakutumikirani kwa magole 6, mugole yachi 7 mumbamumasule nkumubvumiza kuti achoke. 13 Ndipo mukamumasula ayi kumubvumiza kuti achoke alibe chinthu. 14 Mumbamupase mokoma ntima nkhosa zanu zinango, mbewu zochokera pamalo yanu yopulira, mafuta yochokera pamalo yosikinyira na vinyu wochokera moponderamo uva. Mumbamupase mobverana na momwe Yahova Mulungu wanu wakudalisirani. 15 Mumbakumbukire kuti mwenze akapolo mudziko ya Iguputo ndipo Yahova Mulungu wanu adakuwombolani. Ndipomwapa lero ninkukulamulani kuti mumbachite vinthu mwivi.
16 Koma kapolo wanu muyo akakuuzani kuti: ‘Inepano nikusiyenilini!’ ndawa yakuti akukondani komasoti akonda banja yanu, ndipo akhala wokondwa akambakhala na imwepo, 17 mumbatenge chobowolera nkubowola dzitu yake ali pansuwo, mpakana chobowolera mwicho chigume kunsuwo ndipo ambakhale kapolo wanu kwa moyo wake wose. Mumbachite pomwe vimwivi na kapolo wanu nkazi. 18 Ayi kumbaona kuti palibe kuchitika chilungamo peno kapolo wanu mwamumasula iye nkuchoka, ndawa basa yomwe wakuphatirani kwa magole 6 ni ikulu kubwerezera kawiri kuposha ya munthu waganyu, ndipo Yahova Mulungu wanu wakudalisani pa chirichose.
19 Mwana mwamuna aliyese woyamba kubadwa wa ng’ombe panango wa nkhosa mumbamupatule nkumupereka kwa Yahova Mulungu wanu. Mwana woyamba kubadwa wa ng’ombe* ayi kumbamuphatisa basa iriyose, panango kugera ukuse wa mwana woyamba kubadwa wa nkhosa. 20 Gole iriyose imwepo na banja yanu mumbadzadye mwana woyamba kubadwa wa ng’ombe panango wa nkhosa pamaso pa Yahova Mulungu wanu, pamalo yomwe Yahova adzasankhule. 21 Koma peno nyama mwiyo inabvuto, ninge kupunduka, kusawona, panango chilema chirichose chikulu, ayi kuipereka ntsembe kwa Yahova Mulungu wanu. 22 Mumbaidyere muthaundi yanu* ninge momwe mudyera nyasa na bawala. Munthu wopsipiziwa na munthu wochena angadyembo nyama mwiyo. 23 Koma ayi kumbadya magazi yake. Mumbayathire pasi ninge madzi.”