Deuteronomo
17 “Ayi kumbapereka kwa Yahova Mulungu wanu ntsembe ya ng’ombe panango ya nkhosa yomwe ni yopunduka panango inabvuto iriyose, ndawa idzakhale yonyantsa kwa Yahova Mulungu wanu.
2 Peno pakati panu pagumanika mwamuna panango nkazi yemwe akuchita vinthu voipa pamaso pa Yahova Mulungu wanu, muthaundi ibodzi pa mathaundi yanu yomwe Yahova Mulungu wanu ankukupasani ndipo ankuphwanya pangano ya Mulungu, 3 mwakuti wasokera ndipo ankutumikira milungu yanango nkumbayagwadira, panango kugwadira dzuwa, mwezi panango gulu yose ya vinthu vakudzulu, vomwe inepano niribe kukulamulani, 4 manje munthu munango akakuuzani vimwivi panango mwabva vomwe vachitika, mumbafufuze nkhani mwiyo mosamala. Mukatsimikizira kuti chinthu choipa mwichi chachitikadi mu Izirayeli, 5 mumbatenge mwamuna panango nkazi yemwe wachita chinthu choipa muyo nkuyenda naye kunja kwa thaundi ndipo mumbakamuponyere minyala kuti afe. 6 Munthu muyo ambaphewe peno pali umboni wa wanthu awiri panango atatu. Osati ambaphewe peno ni munthu m’bodzi yekha yemwe wachitira umboni. 7 Manja ya mboni mwizo yambakhale yoyamba kumuponyera minyala kuti afe, ndipo wanthu anango wose ambabwere m’mambuyo. Pamwapo mumbachose woipa muyo pakati panu.
8 Peno muthaundi ibodzi pa mathaundi yanu muli mulandu woshupa maninge kuutonga, peno ni mulandu wakupha, mulandu yemwe munthu wayenda kukakashali, mulandu wandewo panango kugegedzana, mumbanyamuke nkuyenda kumalo yomwe Yahova Mulungu wanu adzasankhule. 9 Mumbayende kwa Alevi omwe ni antsembe na kwa oweruza omwe ankutumikira muntsiku mwizo. Mumbawafotokozere nkhani mwiyo ndipo iwo ambakuuzeni chigamulo. 10 Ndipo mumbachite mobverana na chigamulo chomwe akuuzani kumalo yomwe Yahova adzasankhule. Mumbawonesese kuti munkuchita vose vomwe akulangizani. 11 Mumbachite mobverana na lamulo yomwe akuwonesani komasoti chigamulo chomwe akuuzani. Ayi kupatukira kumakulu panango kumadzere pa chigamulo chomwe akupasani. 12 Munthu yemwe adzachite vinthu modzikuza pakulamba kubvera wantsembe yemwe ankutumikira Yahova Mulungu wanu panango woweruza, afunika kufa. Mumbachose woipa muyo mu Izirayeli. 13 Wanthu wose adzabve mwivo nkuchita mantha ndipo adzachitelini pomwe vinthu modzikuza.
14 Mukakangena mudziko yomwe Yahova Mulungu wanu ankukupasani nkuitenga kukhala yanu ndipo nkukhalamo, basi imwepo nkunena kuti: ‘Tisankhule mpfumu ninge mitundu yanango yose yomwe yatizungulira,’ 15 mudzasankhule mpfumu yomwe Yahova Mulungu wanu adzasankhule. Mudzasankhule mpfumu mwiyo kuchokera pakati pa abale wanu. Ayi kusankhula mulendo yemwe ni m’bale wanulini. 16 Koma iye osati adzakhale na makavalo yazinji panango kuchitisa wanthu kuti abwerere ku Iguputo kuti akatenge makavalo yazinji ndawa Yahova adakuuzani kuti: ‘Ayi kudzabwerera pomwe na njira iyi.’ 17 Osati adzakhale pomwe na akazi azinji kuchitira kuti ntima wake ungapatuke, ndipo osati adzakhale na siliva na golide uzinji. 18 Akakhala pampando wachifumu, afunika kukopera bukhu yakeyake ya Chilamulo ichi, kuchokera mu bukhu yomwe* Alevi omwe ni antsembe asunga.
19 Bukhu mwiyi ambakhale nayo nthawe zose ndipo ambaiwerenge ntsiku zose za moyo wake, kuti apfunzire kugopa Yahova Mulungu wake na kubvera mawu yose ya Chilamulo mwichi komasoti kutewedza malangizo yake. 20 Akachita mwivi adzadzikwizelini pamaso pa abale wake, komasoti adzachokelini pachilamulo nkupatukira kumakulu panango kumadzere, kuti iye na wana wake apitirize kukhala mafumu mu Izirayeli kwa nthawe itali.”