Deuteronomo
12 “Aya ni malangizo na vigamulo vomwe mufunika kuvitewedza mosamala, ntsiku zose zomwe mudzakhale mudziko yomwe Yahova Mulungu wa azibereki wanu adzakupaseni kuti ikhale yanu. 2 Mukadzongeretu malo yose yomwe mitundu yomwe mukuyenda kukayatengera dziko yawo ambatumikirirapo milungu yawo, peno ni pamapiri yataliyatali, pamitunthu na m’nyantsi mwa muti uliwose ukulu wa masamba yopsyipirira. 3 Mukagwese maguwa yawo yantsembe nkuphwanya vipilala vawo vopatulika. Mukashoke miti yawo yopatulika* nkugwata vifaniziro vawo vogoba va milungu yawo, ndipo mukachoseretu madzina yawo pamalo mwayo.
4 Ayi kumbamutumikira tene Yahova Mulungu wanu. 5 Koma mumbadzafagefage Yahova Mulungu wanu pamalo yaliyose yomwe adzasankhule kuti aikhepo dzina yake komasoti malo yomwe ambadzakhale pakati pa madzinza yanu yose, ndipo mumbadzayende kumuko. 6 Ntsembe zanu zoshoka na ntsembe zinango, vopereka vanu va chakhumi,* chopereka chochokera m’manja mwanu, ntsembe zomwe munkupereka pakukwanirisa polomisi, ntsembe zanu zaufulu, wana oyamba kubadwa wa ng’ombe na wa nkhosa zanu, vose mwivi mumbadzayende navo kumalo mwayo. 7 Imwepo na mabanja yanu mumbadzadye vimwivi kumalo yamwayo pamaso pa Yahova Mulungu wanu, ndipo mumbadzakondwe na vochita vanu vose ndawa Yahova Mulungu wanu wakudalisani.
8 Osati mumbakachite vomwe tinkuchita kuno lero, aliyese nkumbadochita vomwe ankuganiza kuti nivabwino, 9 ndawa mukalibe kufika kumalo yanu yopumulira nkutenga vose vomwe Yahova Mulungu wanu ankukupasani. 10 Mukakayambuka Yorodano nkukakhala mudziko yomwe Yahova Mulungu wanu ankukupasani kuti ikhale yanu, adzakutetezeni kwa wanthu wose okuzungulirani omwe akuzondani ndipo mumbadzakhale otetezeka. 11 Mumbadzabwerese vinthu vose vomwe ninkukulamulani kumalo yomwe Yahova Mulungu wanu adzasankhule kuti kukhale dzina yake. Mumbadzabwerese ntsembe zanu zoshoka na ntsembe zinango, vopereka vanu va chakhumi, chopereka chochokera m’manja mwanu na ntsembe zose zomwe munkupereka pakukwanirisa polomisi yomwe mudachita kwa Yahova. 12 Mudzakondwe pamaso pa Yahova Mulungu wanu, imwepo na wana wanu amuna, wana wanu akazi, akapolo wanu amuna, akapolo wanu akazi na Mulevi yemwe ankukhala muthaundi yanu,* ndawa iye alibe kupasiwa gawo panango malo ninge imwepo. 13 Samalani kuti osati mumbadzapereke ntsembe zanu zoshoka pamalo yanango yaliyose yamungaone. 14 Mumbadzapereke ntsembe zanu zoshoka pamalo yomwe Yahova adzasankhule mudera ibodzi pa madera ya madzinza yanu, ndipo pamalo mwayo mumbadzachite chirichose chomwe nakulamulani.
15 Peno munkufuna kudya nyama, mungaphe chipfuwo chanu nkudya nyama yake nthawe iriyose, mobverana na madaliso yomwe Yahova Mulungu wanu wakupasani m’mathaundi yanu yose.* Munthu wopsyipiziwa na munthu wosapsyipiziwa angadye nyama mwiyo, ninge momwe mungadyere nyasa na bawala. 16 Koma ayi kudya magazi yake. Mumbayathire pasi ninge madzi. 17 Mudzabvumiziwelini kudyera m’mathaundi yanu* chakhumi cha mbewu zanu, vinyu wanu unyowani, mafuta yanu, wana oyamba kubadwa wa ng’ombe zanu na nkhosa zanu, iriyose pa ntsembe zomwe munkupereka pakukwanirisa polomisi yomwe mwachita, ntsembe zanu za ufulu panango chopereka chochokera m’manja mwanu. 18 Koma mumbadzadye vinthu vimwivi pamaso pa Yahova Mulungu wanu pamalo yomwe Yahova Mulungu wanu adzasankhule. Mumbadzadye vinthu vimwivi imwepo, mwana wanu mwamuna, mwana wanu nkazi, kapolo wanu mwamuna, kapolo wanu nkazi na Mulevi yemwe ankukhala muthaundi yanu.* Ndipo mumbadzakondwe pamaso pa Yahova Mulungu wanu na vochita vanu vose. 19 Samalani kuti osati mukanyalanyaze Mulevi kwa nthawe yose yati mukakhale mudziko mwiyo.
20 Yahova Mulungu wanu akadzaingizira dziko yanu mobverana na vomwe adakupolomisani ndipo imwepo nkunena kuti: ‘Ninkufuna kudya nyama,’ ndawa munkufunisisa kudya nyama, nthawe iriyose yomwe mwafunisisa kudya nyama mumbadzadye. 21 Peno malo yomwe Yahova Mulungu wanu adzasankhule kuikhapo dzina yake yadzakhale kutali maninge na imwepo, mumbadzapheko ng’ombe zanu zinango panango nkhosa zanu zomwe Yahova wakupasani, mobverana na vomwe nakulamulani ndipo nyama mwizo mumbadzazidyere muthaundi yanu* nthawe iriyose yomwe munkufuna. 22 Mungaidye ninge momwe mungadyere nyasa na bawala. Munthu wopsyipiziwa na munthu wosapsyipiziwa angadye nyama mwiyo. 23 Koma mufunika kukhala otsimikiza kuti osati mudye magazi, ndawa magazi ni moyo, ndipo osati mumbadye nyama pabodzi na moyo wake. 24 Ayi kumbadya magazi. Mumbayathire pasi ninge madzi. 25 Ayi kumbadya magazi, kuti vinthu vikufambireni bwino imwepo na wana wanu obwera patsogolo panu, ndawa yakuti mukuchita vinthu vabwino pamaso pa Yahova. 26 Pakuyenda kumalo yomwe Yahova adzasankhule, mumbadzanyamule vinthu vanu vopatulika vokha komasoti vinthu vakuti mukapereke ntsembe pakukwanirisa polomisi yomwe mudachita. 27 Kumuko mumbakapereke ntsembe zanu zoshoka, nyama na magazi, paguwa yantsembe ya Yahova Mulungu wanu. Magazi ya ntsembe zanu yambadzathiriwe pasi pafupi na guwa yantsembe ya Yahova Mulungu wanu, koma nyama mwiyo mungaidye.
28 Mumbawonesese kuti munkubvera mawu yose mwaya yomwe ninkukuuzani, kuti nthawe zose vinthu vimbakufambireni bwino, imwepo na wana wanu obwera patsogolo panu, ndawa yakuti munkuchita vinthu vabwino pamaso pa Yahova Mulungu wanu.
29 Yahova Mulungu wanu akadzadzonga mitundu yomwe munkuyenda kukayatengera dziko, imwepo nkukhala mudziko yawo mwiyo, 30 mukasamale kuti osati mukakashiwe* mu msampha wawo, patsogolo pakuti adzongewa na kuchosewa pamaso panu. Ayi kukabvunza va milungu yawo kuti: ‘Ko mitundu mwaya yambatumikira tani milungu yawo? Inembo nichite vimwivo.’ 31 Ayi kumbatumikira tene Yahova Mulungu wanu, ndawa iwo achitira milungu yawo vinthu vose vonyantsa vomwe Yahova avizonda. Iwo afika mpakana pakushoka wana wawo amuna na akazi pamoto kuti ikhale ntsembe kwa milungu yawo. 32 Mumbawonesese kuti munkutewedza mawu yose yomwe ninkukuuzani. Ayi kuingizirapo panango kuchosapo kalikose.”