Deuteronomo

11 “Mumbakonde Yahova Mulungu wanu ndipo nthawe zose mumbachite vofuna vake, kutewedza malangizo yake, vigamulo vake na malamulo yake. 2 Imwepo munkudziwa kuti lero ninkuyankhula na imwepo, osati na wana wanu omwe ankudziwalini komasoti alibe kuwonako chilango cha Yahova Mulungu wanu, ukulu wake, djanja yake yamphanvu na djanja yake yopfuthula. 3 Iwo alibe kuwona vizindikiro na vinthu vomwe adachita mudziko ya Iguputo kwa Farao mpfumu ya Iguputo komasoti dziko yake yose. 4 Alibe kuwonako pomwe vomwe Mulungu adachitira gulu ya masocha yaku Iguputo, makavalo ya Farao na ngolo zake zankhondo, zomwe zidamira m’madzi ya m’Nyanja Ifuwira pomwe ambakuthamangisani, ndipo Yahova adawadzongeratu wose. 5 Iwo alibe kuwonako vomwe Mulungu wakuchitirani muchipululu mpakana kudzafika malo yano, 6 panango vomwe adachitira Datani na Abiramu, wana wa Eliyabu, mwana wa Rubeni, pomwe dziko idafungula pakamwa pake nkuwameza pabodzi na mabanja yawo, matenti yawo na chamoyo chirichose chomwe enze nacho. Dziko idawameza Aizirayeli wose ankuona. 7 Imwepo mudawona na maso yanu vinthu vose vikuluvikulu vomwe Yahova adachita.

8 Mumbabvere malamulo yose yomwe ninkukupasani lero, kuti mukhale wamphanvu nkukangena mudziko yomwe munkuyambukira iyo kuti mukaitenge nkukhala yanu, 9 komasoti kuti mukakhale na moyo kwa nthawe itali mudziko yomwe Yahova adalumbira kwa azibereki wanu kuti adzawapase iwo na mbadwa* zawo, dziko yoyerera nkaka na uchi.

10 Dziko yomwe munkuyenda kukaitenga kuti ikhale yanu, ni yosiyana na dziko ya Iguputo komwe munkuchoka. Kumuko mumbabzala mbewu zanu mkumbathiriza na mapazi* yanu ninge munkuthiriza dimba ya muliwo wamasamba. 11 Koma dziko yomwe mwakhala pang’ono kuyambukirako nkukaitenga kuti ikhale yanu ni dziko ya mapiri na vigwa. Ikumwa madzi ya nvula yomwe yakugwa kochokera kudzulu. 12 Imwiyi ni dziko yomwe Yahova Mulungu ankuisamalira. Nthawe zose maso ya Yahova Mulungu wanu yakhala padziko mwiyi, kuchokera kumayambiriro kwa gole mpakana kumapeto.

13 Manje mukadzabvera mokhulupirika malamulo yangu yomwe ninkukupasani lero na kukonda Yahova Mulungu wanu nkumbamutumikira na ntima wanu wose, na moyo wanu wose, 14 nidzakupaseni pomwe nvula panthawe yake mudziko yanu, nvula yoyambirira na nvula yomalizira, ndipo mudzakolole mbewu zanu nkukhala na vinyu unyowani na mafuta. 15 Nidzamerese nsipu mudziko yanu kuti vipfuwo vanu vidye ndipo imwepo mudzadye nkukhuta. 16 Samalani kuti mitima yanu osati yatengeke nkupatuka na kuyamba kutumikira milungu yanango nkumbayajolimira. 17 Mukateno ukali wa Yahova udzakugakireni ndipo iye adzafunge kudzulu mwakuti nvula idzagwelini komasoti dothi idzaperekelini vokolola vake. Vikadzateno mudzamale mwakankulumize mudziko yabwino yomwe Yahova ankukupasani.

18 Mawu yangu aya muyasunge m’mitima mwanu ndipo mumbayatewedze pa moyo wanu. Muyamange padjanja yanu kuti mumbayakumbukire ndipo yakhale ninge chomanga pankuma panu.* 19 Mumbapfunzise wana wanu mawu mwaya, ndipo mumbayankhule nawo va mawu mwaya mukakhala pasi m’nyumba mwanu, mukambafamba munsewu, mukambagona komasoti mukamuka. 20 Mumbayanembe pamaferemu ya nyumba zanu na pamisuwo ya thaundi yanu, 21 kuti imwepo na wana wanu mukhale na moyo kwa nthawe itali mudziko yomwe Yahova adalumbira kwa azibereki wanu kuti adzawapase, kwa nthawe yose yomwe kudzulu kudzapitirize kukhala padzulu pa dziko yapasi.

22 Mukabvera mosamala malamulo yose mwaya yomwe ninkukupasani nkumbayatewedza, kukonda Yahova Mulungu wanu, nkufamba munjira zake zose na kupitiriza kumutumikira osasiyana naye, 23 Yahova adzathamangise mitundu yose mwaya pamaso panu ndipo mitundu yamphanvu na yakuluyakulu kuposha imwepo mudzayatengere dziko. 24 Malo yaliyose yomwe mapazi yanu yadzaponde yadzakhale yanu. Malire ya dziko yanu yadzayambire kuchipululu mpakana kukafika ku Lebanoni, kuyambira ku kamadzi ka Firate mpakana kukafika kunyanja yakumaulo.* 25 Palibe munthu yemwe adzalimbane namwe. Yahova Mulungu wanu adzachitise dziko yose yomwe mudzafambemo kukhala na mantha yakulu ndipo adzakugopeni, mobverana na momwe adakupolomisirani.

26 Onani, lero ninkuikha daliso na temberero pamaso panu: 27 Mudzatambire daliso mwiyi mukadzabvera malamulo ya Yahova Mulungu wanu, yomwe ninkukupasani lero, 28 ndipo mudzatambire temberero mwiyi peno mudzabverelini malamulo ya Yahova Mulungu wanu, nkupatuka panjira yomwe ninkukulamulani lero kuti mumbafambemo nkuyamba kulondola milungu yomwe muyadziwalini.

29 Yahova Mulungu wanu akadzakungenesani mudziko yomwe munkuyenda kukaitenga kuti ikhale yanu, mukatomole daliso mwiyi paphiri ya Gerizimu ndipo temberero mukaitomolere paphiri ya Ebala. 30 Pale mapiri mwaya yali kutsidya inango ya kamadzi ka Yorodano chakumaulo,* mudziko ya Akanani omwe ankukhala ku Araba, monyang’anana na Giligala, pafupi na miti yakuluyakulu yaku More. 31 Imwepo muyambuke Yorodano nkukangena mudziko yomwe Yahova Mulungu wanu ankukupasani kuti ikhale yanu. Mukakaitenga nkuyamba kukhalamo, 32 mumbakawonesese kuti munkubvera malamulo na vigamulo vose vomwe ninkuikha pamaso panu lero.”