Deuteronomo

13 “Pakati panu pakagumanika mneneri panango woneneratu vakutsogolo pakuphatisira basa maloto nkukupasani chizindikiro panango kuneneratu chinthu chinango chakutsogolo, 2 ndipo chizindikiro panango vomwe waneneratu ivo vachitikadi, patsogolo pake iye nkunena kuti: ‘Naboni tilondole milungu yanango,’ milungu yomwe imwepo munkuyadziwalini, ‘ndipo tiyatumikire,’ 3 ayi kubvera mawu ya mneneri muyo panango woneneratu vakutsogolo muyo, ndawa Yahova Mulungu wanu ankukuyesani kuti adziwe peno mukonda Yahova Mulungu wanu na ntima wanu wose na moyo wanu wose. 4 Mumbalondole Yahova Mulungu wanu, mumbamugope, mumbabvere malamulo yake, mumbabvere mawu yake ndipo iye ni yemwe mufunika kumbamutumikira ndipo mufunikalini kusiyana naye. 5 Koma mneneri panango woneneratu vakutsogolo muyo mumbamuphe ndawa ankulimbikisa wanthu kuti ambapandukire Yahova Mulungu wanu yemwe adakubulisani mudziko ya Iguputo na kukuwombolani m’nyumba yaukapolo. Munthu muyo ankufuna kukupatusani panjira yomwe Yahova Mulungu wanu adakulamulani kuti mumbafambemo. Ndipomwapa mumbachose woipa muyo pakati panu.

6 M’bale wanu, yemwe ni mwana mwamuna wa amayi wanu, panango mwana wanu mwamuna, mwana wanu nkazi, nkazi wanu wapamoyo panango munzanu wapamoyo, akayesa kukunyengererani mwachintsintsi pakukuuzani kuti: ‘Naboni tikatumikire milungu yanango,’ milungu yomwe imwepo panango azibereki wanu ambayadziwalini, 7 peno ni milungu ya wanthu okuzungulirani, omwe ankukhala pafupi na imwepo panango omwe ankukhala kutali na imwepo, kuchokera kumalekedzero ya dziko nkukafika kumalekedzero yanango ya dziko, 8 ayi kubvuma kuchita vomwe ankufuna ivo panango kumubvera. Ayi kumubvera ntsisi panango kumuteteza. 9 Koma shuwadi mumbamuphe. Djanja yanu imbakhale yoyamba kumuponyera* minyala kuti afe, ndipo wanthu anango wose ambabwere m’mambuyo. 10 Mumbamuponyere minyala kuti afe, ndawa ambafuna kukuchosani kwa Yahova Mulungu wanu, yemwe adakubulisani mudziko ya Iguputo, mu nyumba ya ukapolo. 11 Vikadzateno Aizirayeli wose adzabve nkuchita mantha, ndipo adzachitelini chinthu choipa chirichose ninge chimwichi pakati panu.

12 Mukadzabva muthaundi ibodzi pa mathaundi yanu, yomwe Yahova Mulungu wanu wakupasani kuti mumbakhalemo kuti: 13 ‘Pakati panu pagumanika wanthu wachabechabe omwe ankufuna kusokeresa wanthu muthaundi yawo, pakunena kuti: “Naboni tikatumikire milungu yanango,” milungu yomwe imwepo munkuyadziwalini,’ 14 mumbafufuze mosamala maninge na kubvunza anango va nkhani mwiyo. Manje vikatsimikizirika kuti chinthu chonyantsa mwicho chachitikadi pakati panu, 15 mumbaphe wanthu wa muthaundi mwiyo na chibemba. Mumbadzonge na chibemba thaundi mwiyo na chirichose chomwe chiri mumo, na vipfuwo kubodzi. 16 Patsogolo pake mumbaunjike pabodzi vinthu vose vomwe mwagumana muthaundi mwiyo, pamalo ya pakati pa thaundi nkushoka thaundi mwiyo na moto. Ndipo vinthu vomwe mwagumana muthaundi mwiyo vimbakhale ntsembe yoshoka yoperekewa kwa Yahova Mulungu wanu. Thaundi mwiyo idzakhale matongwe mpakana kalekale ndipo osati idzamangiwe pomwe. 17 Djanja yanu osati itenge chinthu chirichose chofunika kudzongewa, kuti ukali wogaka moto wa Yahova osati ukugakireni koma akuchitireni chifundo, kukubverani ntsisi na kukuwandisani, mobverana na vomwe adalumbira kwa azibereki wanu. 18 Ndipomwapa mumbabvere* Yahova Mulungu wanu, pakubvera malamulo yake yose yomwe ninkukupasani lero, mukachita teno mudzachite vinthu vabwino pamaso pa Yahova Mulungu wanu.”