Deuteronomo
10 “Panthawe mwiyo Yahova adaniuza kuti: ‘Useme minyala yawiri yolingana na yoyamba yale ndipo ukonze likasa yamatabwa. Ukachita teno ukwere m’phiri muno muli ine. 2 Paminyala mwayo nidzanembepo mawu yomwe yenze paminyala yoyamba yale, yomwe udaphwanya, ndipo udzayaikhe mulikasa mwiyo.’ 3 Pamwapo nidakonza likasa ya muti wa akasiya nkusema minyala yawiri yolingana na yoyamba yale. Patsogolo pake nidakwera m’phiri, niri nyamule minyala yawiri yale m’manja mwangu. 4 Pamwapo adanemba paminyala mwayo mawu yomwe wenze adanemba pakuyamba yale, Malamulo Khumi,* yomwe Yahova adakuuzani paphiri kuchokera m’moto, pantsiku yomwe mudasonkhana kuphiri. Padateno, Yahova adanipasa minyala mwayo. 5 Patsogolo pake nidachungunuka nkubuluka m’phiri mumo ndipo nidaikha minyala yawiri mwayo mulikasa yomwe nidakonza. Mpakana pano minyala mwayo yakali mumo, mobverana na vomwe Yahova adanilamula.
6 Pavidateno Aizirayeli adachoka ku Bene-yaakana nkuyenda ku Mosera. Kumuko ndiko komwe Aroni adafera ndipo adamuikha pomwe kumuko. Mwana wake Eleazara adayamba kutumikira ninge wantsembe m’malo mwa Aroni muyo. 7 Manje adanyamuka pamalo mwayo nkuyenda ku Gudigoda. Adachoka pomwe ku Gudigoda nkuyenda ku Yotibata, dziko ya tukamadzi tokhala na madzi.
8 Panthawe mwiyo Yahova adapatula dzinza ya Levi kuti imbanyamule likasa ya pangano ya Yahova, imbaimirire pamaso pa Yahova nkumbamutumikira nakuti imbadalise wanthu mudzina yake ninge momwe ankuchitira mpakana lero. 9 Ndipomwapa dzinza ya Levi iribe kupasiwa gawo panango chuma chabanja ninge abale wawo. Gawo yawo ni Yahova, mobverana na vomwe Yahova Mulungu wanu adawauza. 10 Inepano nidakhala m’phiri mumo kwa ntsiku 40, usiku na masikati, ninge momwe nidachitira pakuyamba pale. Panthawe mwiyi pomwe Yahova adanibvesera. Yahova ambafunalini kukudzongani. 11 Patsogolo pake Yahova adaniuza kuti: ‘Tsogolera wanthu mwawa ndipo mukonzekere ulendo, kuti akangene nkutenga dziko yomwe nidalumbirira azibereki wawo kuti nidzawapase.’
12 Manje imwepo Aizirayeli, ko Yahova Mulungu wanu ankufuna kuti mumbachite chani? Ankufuna kuti mumbachite ivi: Mumbagope Yahova Mulungu wanu, mumbafambe munjira zake zose, mumbakonde na kutumikira Yahova Mulungu wanu na ntima wanu wose komasoti moyo wanu wose, 13 nakuti mumbabvere malamulo ya Yahova na malangizo yake yomwe ninkukupasani lero, kuti vinthu vikufambireni bwino. 14 Onani, kudzulu ni kwa Yahova Mulungu wanu, olo kudzulu kwa kudzulu muko komasoti dziko yapasi na vose vomwe viri mumo ni vake. 15 Koma Yahova adafenderera azibereki wanu okha nkuwawonesa chikondi chake, ndipo wasankhula imwepo mbadwa zawo pakati pa wanthu wose, ninge momwe muliri lero. 16 Manje muchenese* mitima yanu ndipo osati mukhale pomwe akambulamatu.* 17 Ndawa Yahova Mulungu wanu ni Mulungu wa milungu na Ambuya wa ambuya. Iye ni Mulungu nkulu, wamphanvu na wopasa mantha, yemwe akonderalini munthu aliyese ndipo atambiralini chifunga pakamwa.* 18 Iye achitira chilungamo wana wamasiye na akazi wamasiye, ndipo akonda mulendo mwakuti amupasa chakudya na vovala. 19 Imwepo mumbakondembo alendo, ndawa imwepo mwenzembo alendo mudziko ya Iguputo.
20 Mumbagope Yahova Mulungu wanu, mumbamutumikire, mumbakhale naye pafupi maninge ndipo mumbalumbire pa dzina yake. 21 Iye ndiye mufunika kumutamanda.* Iye ni Mulungu wanu yemwe wakuchitirani vinthu vikuluvikulu na vochitisa mantha vose vimwivi, vomwe mwaviwona na maso yanu. 22 Azibereki wanu adayenda ku Iguputo anawanthu 70, koma pano Yahova Mulungu wanu wakuwandisani ninge nyenyezi zakudzulu.”