Mika
5 “Iwepo thaundi yomwe wazunguliriwa na wanthu omwe akuzonda,
Manje ukudzichekacheka.
Azondi atizungulira kuti atimenye nkhondo.
Iwo amenya woweruza wa Izirayeli paphutu na mpsyimbo.
2 Iwepo Betelehemu Efurata,
Thaundi ing’ono maninge mwakuti ungawerengewelini ninge ibodzi mwa mathaundi ya dzinza ya Yuda,
Mwa iwepo mudzabule munthu yemwe nidzamusankhule kuti akhale wolamulira mu Izirayeli.
Munthu moyu alipo kundoyambira kalekale, alipo kuyambira ntsiku zakalekale.
3 Manje Mulungu adzawasiye Aizirayeli,
Mpakana pomwe nkazi yemwe adzabereke, abereke.
Ndipo abale wake wose wa munthu muyo adzabwerere kwa Aizirayeli.
4 Iye adzaimirire nkuyamba kubusa nkhosa mothandiziwa na mphanvu za Yahova,
Komasoti mudzina ikulu ya Yahova Mulungu wake.
Wanthu ambadzakhale motetezeka,
Ndipo mphanvu zake zidzafike mpakana kumamaliziro ya dziko yapasi.
5 Iye adzabwerese ntendere.
Asuri akadzangena mudziko yathu, akadzaponda ntsanja zathu zolimba,
Tidzawatumizire anyakabusa 7, inde atsogoleri* 8 wa wanthu kuti akamalizane nawo.
6 Atsogoleri mwawo adzalange dziko ya Asuri na chibemba,
Komasoti dziko ya Nimurodi munjira zake zose zongenera mudziko mwiyo.
Wolamulira muyo adzatipulumuse kwa Asuri,
Asuri mwawo akadzandofika mudziko yathu nkuponda dothi yathu.
7 Mbadwa zosala za Yakobo zidzakhale pakati pa makhaindi yazinji ya wanthu,
Ninge mame yochokera kwa Yahova.
Komasoti ninge nvula yowaza yomwe ikugwa pa vomera,
Yomwe ithembalini munthu
Panango kudikhira wana wa wanthu.
8 Mbadwa zosala za Yakobo zidzakhale pakati pa makhaindi yazinji ya wanthu.
Zidzakhale pakati pa wanthu azinji.
Ninge mphondolo pakati pa nyama zakuthengo.
Komasoti ninge mphondolo yamphanvu pakati pa magulu ya nkhosa,
Yomwe ipita pakati pa nkhosa mwizo nkuzimbutira* komasoti kuzikhwadzula
Ndipo palibe wozipulumusa.
9 Djanja yanu idzakhale padzulu pa wanthu omwe akuzondani.
Ndipo wanthu omwe akuzondani wose adzaphewe.”
10 Yahova wanena kuti: “Pantsiku mwiyo,
Nidzaphe makavalo yanu ndipo ngolo zanu nidzazidzonge.
11 Nidzagwese mathaundi ya mudziko yanu.
Ndipo nidzagumule malo yanu yose yokhala na mipanda yolimba maninge.
12 Nidzamalise vamatsenga vose vomwe mukuchita,
Ndipo pakati panu padzagumanikelini pomwe wochita vamatsenga.
13 Nidzagwese vifaniziro vanu vogoba na vipilala vopatulika vomwe muli navo,
Ndipo mudzagwadirelini pomwe basa za manja yanu.
14 Nidzazule vipilala vanu vopatulika,
Nkudzonga mathaundi yanu.
15 Nidzabwezere mwachiya komasoti mwaukali
Wanthu wa makhaindi yomwe yalibe kunibvera.”