Mika
4 Muntsiku zomalizira,
Phiri ya nyumba ya Yahova
Idzakhazikike pantsonga chaipo pa mapiri yakuluyakulu,
Ndipo idzakwiziwe kupitirira mapiri yang’onoyang’ono.
Wanthu wa makhaindi yosiyanasiyana adzayende kumuko.
2 Wanthu ochokera m’makhaindi yosiyanasiyana adzabwere nkunena kuti:
“Bwerani, naboni tiyende kuphiri ya Yahova,
Tiyende kunyumba ya Mulungu wa Yakobo.
Iye akatipfunzise njira zake,
Ndipo ise tidzafambe munjira zake mwizo.”
Ndawa malamulo,* yadzapfunzisiwe mu Ziyoni
Ndipo mawu ya Yahova yadzapfunzisiwe mu Yerusalemu.
3 Mulungu adzaweruze makhaindi yazinji ya wanthu,
Ndipo adzakonze* vinthu vophonyeka va wanthu ochokera m’makhaindi yamphanvu yakutali.
Iwo adzaphule* vibemba vawo kuti vikhale milomo ya gedjo,
Komasoti mikondo yawo kuti yakhale vitsulo vogwatira miti.
Ntundu wa wanthu udzanyamulelini chibemba kuti umenyane na ntundu unzake,
Ndipo wanthu mwawo adzapfunzirelini pomwe nkhondo.
4 Aliyese adzakhale* m’nyantsi mwa muti wake wa uva na muti wake wa nkuyu,
Ndipo padzakhalelini wowagopsya,
Ndawa Yahova wa magulu yankhondo yakudzulu wanena vimwevi.
5 Wanthu wa khaindi iriyose adzafambe mudzina ya mulungu wawo.
Koma isepano tidzafambe mudzina ya Yahova Mulungu wathu mpakana kalekale.
6 Yahova wanena kuti: “Pantsiku mwiyo,
Nidzasonkhanise wanthu omwe ambafamba mogwinthama.*
Nidzasonkhanise pomwe wanthu omwe adamwazikana,
Komasoti wanthu omwe nidawalanga.
7 Wanthu omwe ambafamba mogwinthama, nidzawasonkhanise pomwe ninge wanthu wosala.
Wanthu omwe adachosewa mudziko yawo nkuyenda kutali, nidzawachitise kukhala ntundu wamphanvu.
Ndipo Yahova adzakhale mpfumu yawo mu phiri ya Ziyoni,
Kuyambira manjeuno mpakana kalekale.
8 Koma iwe ntsanja ya gulu ya nkhosa,
Malo yapadzulu ya mwana nkazi wa Ziyoni,*
Ulamuliro udzabwerere. Ulamuliro woyamba udzabwerere kwa iwepo,
Ufumu wa mwana nkazi wa Yerusalemu.*
9 Manje ndawa chani unkukuwa maninge?
Ko ulibe mpfumu?
Panango alangizi wako adzongewa?
Mwakuti unkubva kuwawa ninge nkazi yemwe ankubereka?
10 Iwe mwana nkazi wa Ziyoni udzabve ululu wogopsya,
Ninge nkazi yemwe akubereka.
Ndawa manje unkuchoka muthaundi nkuyenda kukakhala kumuyi.
Ukafike mpakana ku Babulo,
Ndipo kumuko udzapulumusiwe.
Kumuko Yahova adzakuwombole m’manja mwa wanthu omwe akuzonda.
11 Wanthu wamitundu yosiyanasiyana adzasonkhane kuti akuchitire vinthu voipa.
Wanthu mwawo adzanene kuti: ‘Naboni timudzonge,
Ndipo maso yathu yawone vimwevi vikuchitikira Ziyoni.’
12 Koma iwo ankudziwalini maganizo ya Yahova.
Iwo ankubvesalini cholinga chake.*
Ndawa adzawasonkhanise pamalo yopulira mbewu ninge momwe asonkhanisira tirigu womwe andomumweta manjemanje.
13 Iwe mwana nkazi wa Ziyoni, imirira upule tirigu.
Ndawa nyanga zako nidzazichitise kukhala chisimbi.
Vibodo vako nidzavichitise kukhala kobre.*
Ndipo udzagayegaye mitundu yazinji ya wanthu.
Phindu yomwe iwo agumana mosowa chilungamo, udzaipereke kwa Yahova.
Ndipo vinthu vawo udzavipereke kwa Ambuya chaiwo wa dziko yose yapasi.”