Mika
6 Bvani vomwe Yahova ankunena.
Nyamukani mukanene mulandu wanu kwa mapiri yakuluyakulu,
Ndipo mapiri yang’onoyang’ono yakabve mawu yanu.
2 Imwepo mapiri yakuluyakulu, bvani mulandu womwe Yahova* ali nawo pa wanthu wake.
Bveserani imwepo fundasau ya dziko yapasi,
Ndawa Yahova anamulandu na wanthu wake.
Iye atonge mulandu wa Aizirayeli, kuti:
3 “Imwepo wanthu wangu, ko nakuphonyerani chani?
Ko nachita chani kuti nikuneteseni?
Perekani umboni wonitsutsa.
4 Inepano nidakubulisani mu dziko ya Iguputo,
Nidakuwombolani m’nyumba ya ukapolo,
Ndipo nidakutumizirani Mose, Aroni na Miriamu kuti akutsogolereni.
5 Imwepo wanthu wangu, pulizi kumbukirani vomwe Balaki mpfumu ya Mowabu imbafuna kuchita.
Komasoti vomwe Balamu mwana wa Beori adamudawira.
Kumbukirani vomwe vidachitika kuyambira ku Sitimu nkukafika ku Giligala.
Kumbukirani vimwevi kuti mudziwe basa zolungama za Yahova.”
6 Ko nitenge chani pakuyenda kwa Yahova?
Nikagwade na chani kwa Mulungu wakudzulu?
Ko niyendeko na ntsembe zoshoka zantero?
Komasoti wana wa ng’ombe wa gole ibodzi?
7 Ko Yahova adzakondwe na mamidyau ya nkhosa zimuna?
Ko adzakondwe na tukamadzi twa mafuta mamidyau yazinji?
Ko nipereke mwana wangu woyamba mwamuna ndawa ya vophonya vangu?
Nipereke chipaso cha mimba yangu ndawa ya chimo yangu?
8 Munthu iwe, iye adakuuza vomwe ni vabwino.
Ko Yahova ankufuna kuti umbachite* chani?
Iye akundofuna kuti umbachite chilungamo,* umbawone kuti kukhulupirika ni kofunika,*
Komasoti umbafambe modzichepesa na Mulungu wako.
9 Mawu ya Yahova yakubveka muthaundi.
Wanthu wanzeru zophindulisa adzagope dzina yanu.
Bveserani mawu ya mpsyimbo na ya yemwe adaisankhula.*
10 Ko m’nyumba ya munthu woipa munkupitiriza kugumanika chuma chogumanika mosowa chilungamo?
Komasoti mpimo wosakwana wa efa* womwe ni wonyantsa?
11 Ko ningakhale wochena* niri na mpimo ulibe chilungamo,
Komasoti thumba ya minyala iribe chilungamo yopimira vinthu?
12 Wanthu olemera wa muthaundi mumo akonda kuchita va chipiringu.
Wanthu wake ayankhula vabodza
Ndipo lilimi yawo iribe chilungamo.
13 Pamwapo inepano nidzakumenyeni mpakana mudzakhale na vilonda,
Ndipo mudzabonere ndawa ya machimo yanu.
14 Imwepo mudzadye, koma mudzakhutelini.
Ndipo mudzapitirize kubva njala.
Mudzanyamule vinthu kuti mukavisunge pamalo yabwino, koma mudzakwaniselini kuviteteza.
Vomwe mudzatenge, nidzavipereke kwa wanthu omwe akuzondani kuti avidzonge.
15 Mudzabzale mbewu, koma mudzakololelini.
Mudzaponde maolivi, koma mudzaphatiselini basa mafuta yake.
Mudzakonze vinyu unyowani, koma mudzaumwelini.
16 Munkutewedza malamulo ya Omuri komasoti vinthu vose vomwe wanthu wa m’nyumba ya Ahabu ambachita.
Ndipo munkuphatisa basa malangizo yawo.
Ndipomwapa nidzakuchitiseni kukhala chinthu chodabwisa,
Ndipo wanthu wa muthaundi mumo adzakhale ofunika kuwalizira muluzi.
Imwepo mudzanyozewe na wanthu wa makhaindi yanango.”