Amose
8 Yahova Nkulu Maninge, adaniwonesa masomphenya aya: Nidawona dengu* ya vipaso va m’chisalo.* 2 Manje adanibvunza kuti: “Unkuwona chani Amose?” Nidadawira kuti: “Ninkuwona dengu ya vipaso va m’chisalo.” Pamwapo Yahova adaniuza kuti: “Mapeto ya wanthu wangu Aizirayeli yafika ndipo nidzawakhululukirelini pomwe. 3 ‘Pantsiku mwiyo nyimbo za mu kachisi zidzasanduke kulira mokuwa,’ wanena teno Yahova, Ambuya Nkulu Maninge. ‘Wanthu wakufa adzataiwe palipose mwakuti kudzakhale zii!’
4 Bvani ivi, imwepo wanthu omwe mupondaponda wanthu wosauka,
Na omwe mukupha wanthu wopfatsa mudziko iyi.
5 Imwepo omwe munena kuti: ‘Ko chikondwerero cha nthawe yomwe mwezi waoneka chimale nthawe yanyi kuti tiyambe kugulisa mbewu zathu?
Sondo imale nthawe yanyi kuti tiyambe kutsatsa mbewu zathu,
Kuti tibweze mpimo wa efa,
Tiingizire kulemera kwa sekeli,
Nakuti tichinje mipimo yathu kuti tibere wanthu ogula?
6 Imale nthawe yanyi kuti tigule wanthu wobonera na kobiri za siliva,
Wanthu wosauka pa mtengo wa peya ibodzi ya ntsapato,
Nakuti tigulise mbewu ziribe na basa?’
7 Yahova, yemwe ni Ulemerero wa Yakobo, walumbira mobverana na dzina yake kuti:
‘Nidzayebwelini vochita vawo vose.
8 Ndipomwapa dziko idzagunduzike,
Ndipo aliyese wokhalamo adzalire.
Dziko yose mwiyo idzafwanthukire ninge kamadzi ka Nilo,
Nkuwinduka, patsogolo pake nkuphwira ninge kamadzi ka Nilo ka ku Iguputo.’
9 Yahova, Ambuya Nkulu Maninge, wanena kuti: ‘Pantsiku mwiyo,
Nidzachitise kuti dzuwa ichome kukali masikati,
Nakuti mudziko mweyo muchite mdima dzuwa ikanati kuchoma.
10 Nidzasanduse vikondwerero vanu kukhala maliro.
Ndipo nyimbo zanu zose zidzasanduke nyimbo zapamaliro.
Nidzachitise kuti wanthu wose avale masakha ndipo misolo yose yadzagerewe mipala.
Nidzachitise kuti mulire ninge kuti mwaferewa mwana mwamuna m’bodzi yekha.
Mwakuti mapeto yake yadzakhale ninge ntsiku yowawa.’
11 Yahova, Ambuya Nkulu Maninge, wanena kuti: ‘Onani, ntsiku zinkubwera
Pomwe nidzatumize njala mudziko.
Osati njala ya chakudya panango nyota yofuna madzi,
Koma njala yofuna kubva mawu ya Yahova.
12 Wanthu adzafambe modzedzereka kuchokera kunyanja mpakana kukafika kunyanja,
Kuchokera ku norte* mpakana kukafika kumachibese.
Iwo adzayende uku na uku kufagafaga mawu ya Yahova, koma adzayagumanelini.
13 Pantsiku mweyo anamwali okhuza na alumbwana adzakomoke,
Iwo adzakomoke ndawa ya nyota.
14 Wanthu omwe alumbira pa milungu yonama ya ku Samariya nkumbati:
“Mpali mulungu wako iwe Dani,”
Nkunena pomwe kuti: “Mpali njira ya ku Beere-seba.”
Adzagwe ndipo adzamukelini pomwe.’”