Amose
7 Yahova, Ambuya Nkulu Maninge, adaniwonesa masomphenya aya: Nidamuwona ankutumiza abombo wa dzombe, pazidayamba kumera mbewu zomalizira.* Zimwezi zenze mbewu zomwe ambabzala, akamaliza kumweta udzu woyenda kwa mpfumu. 2 Dzombe mwiyo paidamaliza kudya vomera vose va mudziko, ine nidati: “Imwe Yahova, Ambuya Nkulu Maninge, pulizi khululukani. Ko Yakobo apulumuke tani pakuti ni wofoka?”
3 Manje Yahova adaiganizira* pomwe nkhani mweyi ndipo Yahova adati: “Vimwevi vidzachitikelini.”
4 Yahova, Ambuya Nkulu Maninge, adaniwonesa pomwe masomphenya aya: Yahova, Ambuya Nkulu Maninge, adalamula kuti dziko ilangiwe na moto. Moto muyo udaumisa madzi yonoka na kudzonga kambali ka dziko. 5 Manje inepano nidati: “Imwe Yahova, Ambuya Nkulu Maninge, ayi kuchita tene. Ko Yakobo apulumuke tani pakuti ni wofoka?”
6 Pamwapo Yahova adaiganizira* pomwe nkhani mweyi ndipo Yahova, Ambuya Nkulu Maninge adati: “Vimwevi pomwe vidzachitikelini.”
7 Iye adaniwonesa pomwe masomphenya aya: Yahova adaimirira padzulu pa chipupa chomwe chidamangiwa pophatisa basa chingwe chothamulira,* ndipo wenze na chingwe chothamulira m’manja mwake. 8 Manje Yahova adanibvunza kuti: “Ko unkuwona chani Amose?” Nidamudawira kuti: “Ninkuwona chingwe chothamulira.” Manje Yahova adati: “Ninkuikha chingwe chothamulira pakati pa wanthu wangu Aizirayeli, ndipo nidzawakhululukirelini pomwe. 9 Malo yokwizika ya Isaki yadzadzongewe, ndipo malo yopatulika ya Izirayeli yadzasakaziwe. Inepano nidzabwere kudzadzonga nyumba ya Yerobowamu na chibemba.”
10 Manje Amaziya wantsembe wa ku Beteli, adatumiza mawu kwa Yerobowamu mpfumu ya Izirayeli kuti: “Amose ankukukonzerani chiwembu nkati chaimo mwa Izirayeli, ndipo wanthu aneta nayo mawu yake. 11 Amose ankunena kuti: ‘Yerobowamu adzaphewe na chibemba ndipo shuwadi Izirayeli adzaphatiwe mu dziko yake nkutengewa kuyenda ku ukapolo.’”
12 Manje Amaziya adauza Amose kuti: “Iwe wamasomphenya, choka, yenda kudziko ya Yuda. Umbakagumane chakudya chako kumuko ndipo umbakaneneretu va kutsogolo. 13 Koma ayi kupitiriza kunena va kutsogolo ku Beteli kuno, ndawa ni malo yopatulika ya mpfumu ndipo ni nyumba ya ufumu muyu.”
14 Amose adadawira Amaziya kuti: “Inepano nenzelini mneneri panango mwana wa mneneri, koma nenze nyakabusa na wosamalira* nkhuyu. 15 Koma Yahova adanitenga komwe nimbabusa nkhosa ndipo Yahova adaniuza kuti: ‘Yenda ukaneneretu va kutsogolo kwa wanthu wangu Aizirayeli.’ 16 Manje bvaya vomwe Yahova wanena: ‘Ukunena kuti: “Ayi kuneneratu vinthu voipa vomwe vidzachitikire Izirayeli, ndipo ayi kuneneratu mawu yaliyose yoipa yonena vomwe vidzachitikire nyumba ya Isaki.” 17 Manje Yahova wanena kuti: “Nkazi wako adzakhale hule mu thaundi mweyi. Wana wako wachimuna na wachikazi adzaphewe na chibemba. Wanthu adzagawane dziko yako mochita kupima na chingwe, ndipo iwepo udzafere mudziko yopsyipiziwa. Shuwadi, Izirayeli adzaphatiwe mudziko yake nkutengewa kuyenda ku ukapolo.”’”