Amose
9 Nidawona Yahova ali imirire padzulu pa guwa ya ntsembe ndipo adati: “Menya nsolo wa chipilala ndipo fundasau yake idzagunduzike. Ugwate pomwe misolo ya vipilala vose ndipo wanthu wosala nidzawaphe na chibemba. Aliyese yemwe adzathawe nidzamuphe basi ndipo aliyese yemwe adzayese kuthawa adzapulumukelini.
2 Akadzakumba Manda* kuti abishalemo,
Nidzawabulise na djanja yangu.
Ndipo akadzakwira kudzulu,
Nidzawabulusire pasi.
3 Akadzabishala padzulu pa phiri ya Karimeli,
Nidzawafagefage mosamala nkuwatenga,
Ndipo akadzathawa pamaso pangu nkubishala pasi pa nyanja,
Nidzalamule nyoka kuti iwalume pamwapo.
4 Akadzatengewa na azondi wawo nkuyenda ku ukapolo,
Kumuko nidzalamule chibemba kuti chiwaphe.
Nidzakhale tcheru kuti niwabweresere tsoka, osati kuwapasa madaliso.
5 Yahova wa magulu yankhondo yakudzulu, Ambuya Nkulu Maninge, ni yemwe agumirira dziko yapasi,
Mwakuti isungunuka ndipo wose okhala mumo adzalire.
Dziko yose idzafwanthukire ninge kamadzi ka Nilo,
Ndipo patsogolo pake idzaphwire ninge kamadzi ka Nilo ka ku Iguputo.
6 ‘Yemwe amanga ntsikada zake kudzulu,
Nkumanga nyumba yake padzulu pa dziko yapasi.
Ndipo aunganidza madzi ya m’nyanja
Nkuyakhuthulira pasi,
Dzina yake ni Yahova.’
7 Yahova ankubvunza kuti: ‘Imwe Aizirayeli, ko kwa inepano mulirini ninge wanthu wa ku Kusi?
Ko ndinepanolini yemwe nidabulisa Aizirayeli mu dziko ya Iguputo,
Yemwe nidabulisa pomwe Afilisiti ku Kerete na Asiriya ku Kiri?’
8 Yahova wanena kuti: ‘Onani, ine Yahova, Ambuya Nkulu Maninge, ninkunyang’ana ufumu wochimwa uyo,
Ndipo nidzaupfudze padziko yapasi.
Koma nyumba ya Yakobo nidzaipfudzelini yose.’
9 ‘Onani, inepano ninkupereka lamulo
Ndipo nidzagunduze nyumba ya Izirayeli pakati pa makhaindi yose,
Ninge momwe munthu achitira posefa,
Ndipo mwala udzapitelini nkugwera pasi.
10 Wanthu wangu wose wochimwa adzaphewe na chibemba.
Omwe ankunena kuti: “Tsoka idzatifendererelini panango kutigwera.”’
11 ‘Pantsiku mweyo, nidzamuse nyumba* ya Davide yomwe idagwa,
Na kukonza malo yomwe chipupa chake chidadzongeka.
Nidzaikonze kuti ileke kukhala pomwe matongwe.
Ndipo nidzaimange kuti ikhale ninge mweyenzere kalekale.
12 Nidzachite vimwevi kuti wanthu wangu atenge vinthu va Edomu vomwe vidakhala.
Na va makhaindi yose ya wanthu yomwe yambachemera pa dzina yangu,’ wanena teno Yahova, yemwe ankuchita vimwevi.
13 Yahova wanena kuti: ‘Ntsiku zidzafike,
Pomwe wolima adzapitirire wokolola,
Ndipo woponda uva adzapitirire wonyamula mbewu.
M’mapiri yakuluyakulu mudzabule vinyu wokoma
Ndipo m’mapiri yang’onoyang’ono mumbadzabule vinyu uzinji.
14 Nidzaunganidze na kubwezeresa wanthu wangu Aizirayeli omwe adatengewa nkuyendesewa ku ukapolo.
Iwo adzamange mathaundi yomwe yenze matongwe nkukhalamo.
Adzalime minda ya uva nkumwa vinyu wake.
Adzalime pomwe minda nkudya vipaso vake.’
15 ‘Inepano nidzawabzale mudziko yawo.
Iwo adzazuliwelini pomwe
Mudziko yomwe nawapasa,’ wanena teno Yahova Mulungu wanu.”