Amose
6 “Tsoka kwa wanthu omwe akukhala mosagunduzika ku Ziyoni,
Na wanthu omwe ankuwona kuti ni otetezeka m’phiri ya Samariya.
Wanthu olemekezeka wa makhaindi yobvekera kuposha makhaindi yanango,
Omwe nyumba yose ya Izirayeli iyenda kwa iwo.
2 Yendani mukaone ku Kaline.
Mukakachoka kumuko mukayende ku Hamati Nkulu,
Patsogolo pake mukayende ku Gati wa Afilisiti.
Ko mathaundi mwaya yaposha maufumu* yanu yawiri aya?
Ko panango malo yawo ni yakulu kuposha malo yanu?
3 Ko imwepo munkufunalini kuganizira va ntsiku yatsoka?
Ko munkufuna kuti palipose pambachitike vachiwawa?
4 Mugona pa mibedi ya minyanga yanzowu na kudzithamula pa mipando yokhala ninge m’bedi,
Ndipo mukudya nkhosa zimuna na wana wa ng’ombe* onenepa.
5 Mupeka nyimbo kuti mumbaziimbe na zeze,*
Ndipo mukonzambo vipangizo voimbira, ninge mwambachitira Davide.
6 Mumwera vinyu m’makhapu yakuluyakulu,
Mudzola mafuta yodula maninge,
Ndipo mulibe basa* na tsoka yomwe idagwera Yosefe.
7 Wanthu mwawa adzakhale woyambirira kuyenda ku ukapolo,
Ndipo phwando ya zungo ya wanthu ogona modzithamula pa mipando yokhala ninge mbedi idzamale.
8 Yahova, Mulungu wa magulu yankhondo yakudzulu, wanena kuti: ‘Inepano Yahova Ambuya Nkulu Maninge, nalumbira pa dzina yangu kuti,
‘Ninyantsiwa na kumeka kwa Yakobo,
Niyipidwa na ntsanja zake zolimba,
Ndipo nidzapereke thaundi mweyi na vinthu vake vose kwa wanthu omwe amuzonda.
9 Peno wanthu 10 angasale m’nyumba ibodzi, nawombo adzafe. 10 Wachibale* adzabwere kudzawabulisa nkuyamba kuwashoka m’bodzim’bodzi. Adzabulise mabonzo yawo m’nyumba mumo, ndipo patsogolo pake adzabvunze aliyese yemwe ali m’vipinda va nkati kuti: “Ko muli pomwe wanthu anango mumo?” Ndipo adzadawire kuti: “Mulibe!” Patsogolo pake adzamuuze kuti: “Khala chete! Ndawa ino ni nthawelini yotomola dzina ya Yahova.”’
11 Pakuti Yahova ndiye walamula,
adzagwese nyumba zikuluzikulu mwakuti zidzasanduke hopo ya dothi.
Ndipo nyumba zing’onozing’ono zidzasanduke vibuma.
12 Ko makavalo yangathamange pamwala?
Panango ko munthu angalime pamwala na ng’ombe?
Ndawa mwachinja chilungamo nkukhala chomera chakupha,
Mwasandusa chipaso chachilungamo nkukhala chinthu chowawa.
13 Mukomedzewa na vinthu voipa.
Ndipo mukunena kuti: ‘Tekha takwanisa kugumana mphanvu.’*
14 Manje Yahova, Mulungu wa magulu yankhondo yakudzulu wanena kuti: ‘Imwe wa m’nyumba ya Izirayeli, ine nikubweresereni khaindi ya wanthu.
Ndipo adzakujerereni kuyambira ku Lebo-hamati* mpakana ku chigwa* cha Araba.’”