Amose
5 “Bveserani mawu aya yomwe ninkukuuzani ninge nyimbo ya pamaliro, imwe wa m’nyumba ya Izirayeli:
2 ‘Izirayeli yemwe ni namwali, wagwa.
Iye angakwaniselini pomwe kuimirira.
Aliyese wamuthawa nkumusiya mudziko yake.
Ndipo palibe yemwe angamuimiririse.’
3 Yahova, Ambuya Nkulu Maninge wanena kuti,
‘Thaundi yomwe imbayenda kunkhondo na wanthu 1000, idzasale na wanthu 100 basi.
Ndipo thaundi yomwe imbayenda kunkhondo na wanthu 100, idzasale na wanthu 10 basi. Vimwevi ndivo vomwe vidzachitikire nyumba ya Izirayeli.’
4 Yahova wauza wanthu wa m’nyumba ya Izirayeli kuti:
‘Munifagefage kuti mupitirize kukhala na moyo.
5 Ayi kukhala na shungu yofuna kuyenda ku Beteli.
Ndipo ayi kuyenda ku Giligala panango ku Beere-seba.
Ndawa ninkukutsimikizirani kuti Giligala adzayende ku ukapolo.
Ndipo Beteli adzadzongewe.*
6 Faganifagani Yahova kuti mupitirize kukhala na moyo.
Kuti osati akugakireni ninge moto panyumba ya Yosefe.
Nkushokeratu Beteli mpakana kusowa wodzimwisa moto muyo.
7 Muchinja chilungamo nkukhala chitsamba chowawa.
Ndipo muchitaya pasi chilungamo mwicho.
8 Yemwe adakonza gulu ya nyenyezi ya Kima* na gulu ya nyenyezi ya Kesili,
Yemwe achitisa kuti mdima wam’badaba uchinje nkukhala kugwerewera kwa machibese,
Yemwe achitisa masikati kukhala ninge mdima wa usiku,
Yemwe aunganidza pomwe madzi ya m’nyanja
Nkuyakhuthulira pasi,
Dzina yake ni Yahova.
9 Iye adzadzonge mwakankulumize munthu wamphanvu.
Ndipo adzadzonge malo yomwe yanampanda wolimba.
10 Wanthu mwawo aipidwa na munthu yemwe awatsuula pansuwo wa thaundi,
Ndipo anyantsiwa na munthu yemwe ayankhula chilungamo.
11 Ndawa yakuti mulamula wanthu osauka kuti akulipireni mukawakumbiza munda,
Ndipo mutenga vokolola vawo ninge mtsonkho,
Mudzapitirizelini kukhala m’nyumba za minyala yosema zomwe mwamanga.
Ndipo mudzamwelini vinyu wochokera m’minda yanu ya uva yabwino maninge.
12 Ndawa ninkudziwa kuwanda kwa voipa vanu vonipandukira,
Na kukula kwa machimo yanu.
Muchitira nkhanza munthu wachilungamo,
Mutambira bobobo,*
Ndipo muphwanya ufulu wa wanthu osauka pansuwo wa thaundi.
13 Ndipomwapa wanthu ozindikira adzakhale chete panthawe mwiyo,
Ndawa idzakhale nthawe yopasa mantha.
14 Yesesani kuchita vabwino osati voipa,
Kuti mupitirize kukhala na moyo.
Mukachita teno Yahova Mulungu wa magulu yankhondo yakudzulu adzakhale namwe.
Ninge momwe mwanenera kuti ali namwe.
15 Mumbaipidwe na choipa ndipo mumbakonde chabwino.
Pansuwo wa thaundi pambachitike chilungamo.
Panango Yahova Mulungu wa magulu yankhondo yakudzulu
Adzakomere ntima mbadwa za Yosefe zomwe zikalipo.’
16 Manje Yahova, Mulungu wa magulu yankhondo yakudzulu, Yahova wanena kuti:
‘M’malo yose ya mathaundi yanu mudzabveke kulira,
Ndipo m’misewu yanu yose wanthu ambadzati: “Mayine! Mayine!”
Adzachemere alimi kuti alire,
Na mashasha yodziwa kulira maliro kuti yalire mokuwa.’
17 ‘Kudzabveke kulira mokuwa m’minda yose ya uva,
Ndawa ine nidzagwate pakati panu,’ wanena teno Yahova.
18 ‘Tsoka kwa wanthu omwe ankufunisisa ntsiku ya Yahova!
Ko chidzakuchitikireni nchani pantsiku ya Yahova?
Mweyi idzakhale ntsiku yamdima, osati kugwerewera.
19 Vidzakhale ninge munthu ule yemwe akuthawa mphondolo koma nkugumana na chimbalangondo,
Ndipo panthawe yomwe ankungena m’nyumba nkuphata chipupa, nyoka nkumulumiratu.
20 Ntsiku ya Yahova idzakhale ipsyipa, osati yogaka,
Idzakhale ya mdima, osati yogwerewera.
21 Ine niyipidwa na vikondwerero vanu ndipo nibveranalini navo,
Ndipo nikomedzewalini na pfungo ya ntsembe zanu zoperekewa pa misonkhano yanu yapadera.
22 Olo mupereke ntsembe zanu zantero zoshoka na ntsembe zanu zoperekewa ninge mphaso,
Ine nidzakondwelini na ntsembe zanu mwizo.
Ndipo nidzakondwelini na ntsembe zanu zachibverano za nyama zonenepa.
23 Lekani kuimba nyimbo zosokosera,
Ndipo nifunalini kubva nyimbo zanu zoimbiwa na voimbira va vingwe.
24 Chilungamo chifambe ninge madzi.
Komasoti ninge kamadzi komwe kaphwiralini nthawe zose.
25 Imwe wa nyumba ya Izirayeli,
Ko pemwenze muchipululu mule kwa magole 40, mudanipasa ntsembe za nyama na vopereka vinango?
26 Koma imwepo mudzatakule Sakuti mpfumu yanu na Kaiwani,*
Mafano yomwe mudakonza ya mulungu wanu wa nyenyezi.
27 Ndipo nidzakuyendeseni ku ukapolo, kutali maninge na ku Damasiko,’ wanena teno Mulungu wa magulu yankhondo yakudzulu, yemwe dzina yake ni Yahova.”