Amose
4 “Bverani mawu aya, imwe ng’ombe zikazi za ku Basana,
Omwe mukhala m’phiri ya Samariya,
Imwe akazi omwe munkuchitira vinthu viribe chilungamo wanthu obonera na kuphwanya wanthu osauka.
Ndipo muuza azimuna wanu kuti: ‘Tipaseni vakumwa kuti timwe!’
2 Yahova, Ambuya Nkulu Maninge, walumbira mobverana na kuchena kwake kuti,
‘“Onani! Ntsiku zidzafike pomwe iye adzakukasheni na vokashira nyama nkukutakulani.
Omwe adzakhalire adzawamedze na medzo.
3 Mudzabulire pavibowo va mpanda womwe muli nawo pafupi.
Ndipo mudzathusiwe kunja ku Herimoni,” wanena teno Yahova.’
4 ‘Bwerani ku Beteli wanthu imwe kuti mudzachite voipa,*
Bwerani ku Giligala kuti mudzathimizire machimo.
Bweresani ntsembe zanu machibese.
Ndipo pa ntsiku yachitatu, mubwerese chakhumi chanu.
5 Perekani ntsembe zotembeja za nkate wokhala na vofufumisa.
Ndipo lengezani mokuwa va ntsembe zomwe muzipereka mwa kufuna kwanu!
Ndawa ni vomwe imwepo Aizirayeli mukonda kuchita, wanena teno Yahova, Ambuya Nkulu Maninge.
6 ‘M’mathaundi yanu yose, inepano niribe kukupasani chakudya.
Ndipo nidachitisa kuti mu nyumba zanu zose mukhale mulibe chakudya.
Koma mulibe kubwerera kwa inepano,’ wanena teno Yahova.
7 ‘Ine nidakumanani nvula pakudasala minyezi yatatu kuti mukolole.
Nidagwesa nvula muthaundi inango koma muthaundi inango niribe kuigwesa.
Nvula idagwa m’munda ubodzi
Koma m’munda unango, momwe mulibe kugwa nvula, mudauma.
8 Wanthu wa mathaundi yawiri panango yatatu adayenda moshupikira muthaundi inango kuti akamwe madzi,
Ndipo alibe kukhondwa,
Koma mulibe kubwerera kwa inepano,’ wanena teno Yahova.
9 ‘Nidadzonga mbewu zanu na mphepo yakupsa komasoti matenda ya chuku.
Mudawandisa minda yanu ya uva na ya mbewu zinango.
Koma abombo wa dzombe adadzonga miti yanu ya nkuyu na ya maolivi,
Ndipo imwepo mulibe kubwerera kwa inepano,’ wanena teno Yahova.
10 ‘Nidakutumizirani muliri ninge wa ku Iguputo.
Nidapha alumbwana wanu na chibemba ndipo makavalo yanu yadatengewa.
Nidachitisa kuti pfungo yonunkha ya m’misasa yanu ifike m’mphuno mwanu,
Koma imwepo mulibe kubwerera kwa inepano,’ wanena teno Yahova.
11 ‘Nidachitisa kuti mudzongewe
Ninge momwe Mulungu adadzongera Sodomu na Gomora.
Ndipo imwepo mwenze ninge chipitsi cha nkhuni chomwe chapulumusiwa pamoto.
Koma mulibe kubwerera kwa inepano,’ wanena teno Yahova.
12 Nidzakuchitire pomwe vimwivo, iwepo Izirayeli,
Ndipo ndawa yakuti nidzakuchitire vimwivi,
Konzekera kugumana na Mulungu wako, iwepo Izirayeli.
13 Ona! Iye ndiye adakonza mapiri ndipo ndiye adakonza pomwe mphepo,
Afotokozera munthu vomwe ankuganiza,
Achitisa kuti kugwerewera kwa m’madandakucha kuchinje nkukhala mdima,
Ndipo aponda pomwe malo yokwizika ya dziko yapasi.”
Dzina yake ni Yahova Mulungu wa magulu yankhondo yakudzulu.