Hoseya
7 “Nthawe zose nikafuna kupolesa Izirayeli,
Vophonya va Efuraimu viwonekera,
Komasoti voipa va Samariya.
Ndawa iwo achita vinthu viribe chilungamo.
Mbava zithyola nyumba ndipo gulu ya vigananga idzonga vinthu viri panja.
2 Koma muntima mwawo aganizirakolini kuti nidzakumbukire voipa vawo vose.
Manje vochita vawo vawazungulira.
Ndipo viri pamaso pangu.
3 Iwo akondweresa mpfumu na vinthu vawo voipa.
Komasoti akondweresa atsogoleri na vinthu viribe chilungamo.
4 Wanthu wose mwawo ni wachigololo.
Ali ninge uvuni womwe ugasiwa na wophika pawu.
Ndipo wasiya kuusonkhezera pomwe ankudikhira kuti ufa womwe waukanyakanya ufufume.
5 Pantsiku ya chikondwerero cha mpfumu yathu, atsogoleri adwala.
Ndipo ni wokalipa ndawa ya vinyu.
Mpfumu mwiyo yapfuthulira djanja yake wanthu onyoza.
6 Ndawa wanthu mwawo afika na ntima wogaka ninge uvuni.*
Wophika pawu agona usiku wose.
Machibese uvuni muyo ugaka moto wangundungundu.
7 Wose mwawo ankupsa ninge uvuni wa moto,
Ndipo ameza atsogoleri* wawo.
Mafumu yawo yose yagwa.
Palibe aliyese yemwe ankunichemera.
8 Efuraimu abverana na wanthu wa makhaindi yanango.
Iye ali ninge pawu yabololindo yakupsa mbali ibodzi.
9 Alendo amutengera mphanvu zake, koma iye ankudziwalini.
Ndipo munsolo mwake mose muli invi, koma iye ankudziwalini.
10 Kumeka kwa Aizirayeli kwakhala umboni wowatsutsa,
Koma iwo alibe kubwerera kwa Yahova Mulungu wawo.
Komasoti alibe kumunyang’ana olo kuti adachita vose vimwevi.
11 Wanthu wa ku Efuraimu ali ninge nkhangaiwa yopusa, iribe nzeru.
Iwo akumbira thandizo ku Iguputo komasoti ayenda ku dziko ya Asuri.
12 Kulikose komwe iwo adzayende, nidzawateyere msampha.
Nidzawaphate ninge mbalani zombululuka mdzulu.
Nidzawalange mobverana na chenjezo yomwe nimbawauza nikawasonkhanisa.
13 Tsoka kwa iwo ndawa anithawa!
Adzachenekewe ndawa aniphonyera.
Nenze wokonzeka kuwapulumusa, koma aninamizira mabodza.
14 Alibe kukumbira na ntima wose kuti niwathandize,
Podiya kuti ambalira mokuwa ali pa mibedi* yawo.
Ambadzicheka kuti agumane chakudya na vinyu unyowani.
Iwo anisatukira.
15 Podiya kuti nidawalangiza komasoti kulimbisa manja yawo,
Akunitsutsa ndipo ankukonza chiwembu.
16 Adabwerera, koma alibe kuyenda kuchipembedzo chaicho.*
Adakhala osathembeka ninge uta wothetha.
Atsogoleri wawo adzaphewe na chibemba ndawa yoyankhula vinthu vopusa.
Ndipomwapa iwo adzanyozewe mudziko ya Iguputo.”