Hoseya
8 Ikha lupenga ya nyanga ya nkhosa pakamwa pako.
Mzondi akubwera ninge mphungu kudzachitira vinthu voipa nyumba ya Yahova.
Ndawa Aizirayeli alibe kubvera pangano yangu komasoti alibe kutewedza malamulo yangu.
2 Iwo ankunilirira kuti: ‘Imwepo Mulungu wathu, isepano Aizirayeli tinkukudziwani!’
3 Aizirayeli ankulamba kuchita vabwino,
Ndipomwapa mzondi awathamangise.
4 Iwo asalula mafumu, koma osati mwa kufuna kwangu.
Iwo asalula atsogoleri, olo kuti ine niribe kuwabvumiza.
Pakuphatisa basa siliva na golide wawo akonza mafano,
Ndipo vimwevi vidzawadzongese.
5 Iwepo Samariya, fano yako ya mwana wa ng’ombe yalambiwa.
Nakalipa maninge na wanthu wako.
Ko papite nthawe itali tani kuti iwepo ukhale pomwe wochena?*
6 Vimwevi vachokera ku Izirayeli.
M’misiri ndiye wakonza fano mweyi, ndipo fano mweyi ni Mulungulini.
Fano ya ku Samariya idzakhale ninge nkhuni zogwatiwagwatiwa.
7 Iwo akundofesa mphepo,
Ndipo adzakolole chimphepo champhanvu.
Mbewu zawo zidzakulelini mpakana kukhuma.
Ndipo zomwe zidzakule, zidzawapaselini ufa.
Peno zinango zingabereke, alendo* adzazimeze.
8 Aizirayeli adzamezewe.
Mwakuti adzakhale pakati pa wanthu wa makhaindi yanango,
Ninge chombo chilibe basa.
9 Iwo akafike mpakana ku dziko ya Asuri ninge bulu wa mthengo.
Efuraimu walipira akazi kuti ambagone nawo.
10 Podiya kuti ankulipira akazi wa makhaindi yanango,
Inepano nidzawasonkhanise pabodzi.
Adzayambe kubonera ndawa yosachitiriwa chilungamo na mafumu komasoti na atsogoleri.
11 Efuraimu wakonza maguwa ya ntsembe yazinji ndipo wachimwa.
Ankuphatisa basa maguwa yake mwayo kuti ambachimwe.
12 Nidamunembera vizinji vonena va malamulo* yangu,
Koma ambandoviwona ninge vinthu vachilendo.
13 Iwo ambapereka ntsembe kwa inepano ndipo ambadya nyama yake,
Koma inepano Yahova niribe kukondwa nawo.
Manje nidzakumbukire vophonya vawo ndipo nidzawalange ndawa ya machimo yawo.
Iwo adabwerera* ku Iguputo.
14 Izirayeli wayebwa yemwe adamukonza ndipo wamanga makachisi.
Nayembo Yuda wamanga mathaundi yazinji yomwe yali na mipanda yolimba.
Koma inepano nidzatumize moto m’mathaundi yake
Ndipo udzashoke nyumba za mdzulu za muthaundi iriyose.”