Hoseya
6 “Bwerani, naboni tibwerere kwa Yahova,
Ndawa iye watikhwadzulakhwadzula, koma adzatipolese.
Watidzonga, koma adzamange vilonda vathu.
2 Iye adzatithandize kuti titsitsimuke pakamala ntsiku ziwiri.
Pa ntsiku yachitatu adzatimukise,
Ndipo tidzakhale pomwe na moyo pamaso pake.
3 Isepano tidzamudziwe Yahova ndipo tidzayesese kuti timudziwe bwinobwino.
Ni vosakaikisa kuti adzafike ninge momwe madandakucha yafikira.
Adzabwere kwa ise ninge nvula izinji,
Ninge nvula yomalizira yomwe itotesa maninge dothi.”
4 “Ko nikuchite chani iwepo Efuraimu?
Ndipo ko nikuchite chani iwepo Yuda?
Ndawa chikondi chanu chokhulupirika chiri ninge mitambo ya m’machibese,
Komasoti ninge mame yomwe yachebwalini kuuma.
5 Ndawa ya vimwevi wanthu mwawa nidzawagwate pakuphatisa basa aneneri.
Nidzawaphe na mawu ya nkamwa mwangu.
Chiweruzo chomwe mudzatambire chidzakhale ninge kugwerewera.
6 Ndawa nikondwera na chikondi chokhulupirika,* osati ntsembe.
Nikondwera pomwe na kudziwa Mulungu, osati ntsembe zoshoka zantero.
7 Koma iwo, molingana na wanthu aliwose, alibe kubvera.
Kumuko anichitira vinthu viribe chilungamo.
8 Giliyadi ni thaundi ya vigananga.
Yodzala na vidindo va mapazi yamagazi.
9 Gulu ya antsembe iri ninge gulu ya vigananga yobishalira munthu panjira.
Akupha wanthu munsewu ku Sekemu
Ndawa khalidwe yawo ni yochitisa manyazi.
10 Nawona vinthu vonyantsa maninge mu nyumba ya Izirayeli.
Efuraimu ankuchita va uhule mumo.
Izirayeli wadziipisa.
11 Komasoti, imwepo wanthu wa ku Yuda, nthawe yakuti mukololewe yakhazikisiwa.
Inepano nidzasonkhanise pomwe wanthu wangu omwe adatengewa kuyenda kudziko inango.”