Hoseya
5 “Bveserani ivi imwepo antsembe,
Ndipo bveserani imwepo wa m’banja ya Izirayeli.
Imwembo wa m’banja ya mpfumu bveserani,
Pakuti chiweruzo mwichi chinkuyenda kwa imwepo,
Ndawa mwakhala msampha ku Mizipa
Komasoti ninge kombe paphiri ya Tabori.
2 Wanthu omwe anipandukira apha wanthu azinji,
Ndipo inepano ninkuwachenjeza* wose mwawo.
3 Inepano nimudziwa bwino Efuraimu,
Ndipo Izirayeli ni wobisikalini kwa inepano.
Iwe Efuraimu wachita va uhule,*
Ndipo Izirayeli wadziipisa.
4 Vochita vawo vinkuwakangisa kubwerera kwa Mulungu wawo,
Ndawa iwo ntima wawo ni wa uhule*
Ndipo alamba kuzindikira kuti ine Yahova ndine Mulungu wawo.
5 Kumeka kwa Izirayeli kwakhala umboni womutsutsa,*
Ndipo Izirayeli na Efuraimu akhukhumudwa na vophonya vawo.
Nayembo Yuda wakhukhumudwa nawo pabodzi.
6 Iwo enze ayenda kukafagafaga Yahova ali na nkhosa komasoti ng’ombe zawo,
Koma alibe kumugumana.
Ndawa wenze adawasiya.
7 Akhala osakhulupirika kwa Yahova,
Ndawa abereka wana wachilendo.
Manje mwezi udzawadye* pabodzi na vinthu vawo.*
8 Lizani lupenga ya nyanga ya nkhosa ku Gibeya na lupenga ku Rama!
Kuwani na mawu yankhondo ku Beti-aveni kuti: Tsogola iwepo Benjamim!
9 Iwepo Efuraimu, udzakhale chinthu chogopsya pantsiku yomwe udzalangiwe.
Inepano nauza dzinza ya Izirayeli vinthu vomwe vidzawachitikiredi.
10 Atsogoleri wa Ayuda ali ninge wanthu ofutusa malire.
Nidzawakhuthulire ukali wangu ninge madzi.
11 Efuraimu wajererewa na chiweruzo,
Ndawa adatsimikiza ntima kutewera munthu yemwe amuzonda.
12 Ndipomwapa nenze ninge nchenje kwa Efuraimu,
Ndipo nidachitisa kuti wanthu wa m’nyumba ya Yuda awole.
13 Efuraimu padawona matenda yake komasoti Yuda padawona chilonda chake,
Efuraimu adayenda kwa Asuri komasoti adatumiza wanthu kwa mpfumu ikulu.
Koma mpfumu mwiyo iribe kukwanisa kukupolesani.
Ndipo alibe kukwanisa kupolesa chilonda chanu.
14 Inepano nidzakhale ninge mphondolo yamphanvu kwa Efuraimu,
Komasoti nidzakhale ninge mphondolo yamphanvu kwa wanthu wa m’banja ya Yuda.
Inepano nidzawakhwadzulekhwadzule nkuchoka.
Nidzawatenge nkukawataya ndipo palibe omwe adzawapulumuse.
15 Patsogolo pake nidzabwerere kumalo yangu mpakana iwo adzagumane na mabvuto ndawa ya vophonya vawo,
Ndipo iwo adzayambe kunifagafaga kuti niwakomere ntima.
Akadzagumana na mabvuto, adzanifune.”