Hoseya
4 Bveserani mawu ya Yahova imwepo Aizirayeli.
Yahova aweruze wanthu wa mudziko mweyi,
Ndawa mudziko mweyi mulibe chonadi, chikondi chokhulupirika ndipo wanthu wake adziwalini Mulungu.
2 Kulumbira konama, bodza, kuphana,
Kuba na chigololo vawanda mudziko mweyi.
Ndipo wanthu ankuphana maninge.
3 Ndipomwapa dziko mweyi idzalire maliro,
Ndipo aliyese wokhala mudziko mwiyo adzamaliretu mphanvu.
Nyama zakuthengo na mbalani zombululuka mdzulu,
Komasoti ntsomba za m’nyanja, zidzafe.
4 “Koma olo nteno, ayi kuti munthu akutsutseni panango kukutsuulani,
Ndawa muli ninge wanthu otsutsana na wantsembe.
5 Ndipomwapa mudzakhukhumudwe masikati.
Ndipo mneneri adzakhukhumudwe namwe pabodzi ninge kuti ni usiku.
Komasoti amayi wanu nidzawakhalise chete.*
6 Wanthu wangu adzakhalisiwe chete* ndawa yakuti anidziwalini.
Pakuti iwo alamba kunidziwa,
Inembo nidzawalambe kuti osati ambanitumikire ninge wantsembe wangu.
Komasoti ndawa yakuti iwo ayebwa lamulo* ya inepano Mulungu wawo,
Inembo nidzayebwe wana wawo.
7 Pomwe ankuwanda, ni pomwe ankunichimwira maninge.
Nidzachinje ulemerero wawo nkukhala kunyozeka.*
8 Iwo akuphindula mwadyera na machimo ya wanthu wangu,
Ndipo afunisisa mwadyera machimo ya wanthu mwawo.
9 Vomwe vidzachitikire wanthu mwawo vidzachitikire pomwe antsembe.
Wose nidzawaweruze ndawa ya vochita vawo,
Ndipo adzagumane na mabvuto mobverana na vochita vawo.
10 Iwo adzadye, koma adzakhutelini.
Adzachite va uhule, koma adzawandelini,
Ndawa yakuti ankubveralini Yahova.
11 Uhule, vinyu wakalekale komasoti vinyu unyowani
Vikangisa munthu kuchita vinthu vabwino.
12 Wanthu wangu akumbira nzeru kwa mafano yochita kukonzewa na miti,
Ndipo achita vomwe mpsyimbo* yawo yawauza.
Ndawa yakuti ntima wawo wa uhule uwasokeresa,
Komasoti ndawa ya uhule wawo uyo, alamba kubvera Mulungu wawo.
13 Iwo apereka ntsembe padzulu pa mapiri yakuluyakulu,
Ndipo apereka ntsembe zautsi pa mapiri yang’onoyang’ono.
Achita pomwe vimwevi pasi pa miti yomwe yananthawi zizinji na masamba yazinji, pasi pa miti ya mulanje* komasoti pa muti uliwose ukulu,
Ndawa miti mwaya yakhala na mthunzi wabwino.
Ndipomwapa wana wanu akazi achita uhule
Ndipo akazi wa wana wanu achita chigololo.
14 Nidzaweruzelini wana wanu akazi ndawa ya uhule wawo,
Komasoti akazi wa wana wanu ndawa ya chigololo.
Ndawa amuna akufamba na mahule
Ndipo ankupereka ntsembe pabodzi na mahule ya pakachisi.
Wanthu osabvesa vinthu mwawa adzadzongewe.
15 Podiya kuti imwepo Aizirayeli munkuchita uhule,
Yuda osati akhale na mulandu.
Ayi kuti mubwere ku Giligala panango ku Beti-aveni,
Ndipo ayi kumbalumbira kuti: ‘Mudzina ya Yahova Mulungu wamoyo!’
16 Izirayeli akuchita nthota ninge ng’ombe yomwe inkuchita nthota.
Manje ko Yahova adzawabuse ninge nkhosa imuna ing’ono pamalo yodyeserako vipfuwo?
17 Efuraimu wabverana na mafano.
Musiyeni ati awone!
Ndipo atsogoleri wawo akonda maninge kuchita vinthu vochitisa manyazi.
19 Mphepo idzawakulunge nkuwaikha m’maphaphiro yake,*
Ndipo adzachite manyazi na ntsembe zawo.”