Hoseya
12 “Efuraimu ankudya mphepo.
Ankuthamangisa mphepo ya kumachibese ntsiku yose.
Iye akuwandisa mabodza na ndewo.
Wabverana na Asuri ndipo wayendesa mafuta ku Iguputo.
2 Pali mulandu womwe Yahova ankufuna kuweruza Yuda.
Adzalange Yakobo mobverana na vochita vake.
Ndipo adzamubwezere mobverana na vochita vake.
3 Pomwe Yakobo wenze m’mimba adaphata katendeni ka m’bale wake.
Iye adalimbana na Mulungu na mphanvu zake zose.
4 Adapitiriza kulimbana na mngelo ndipo adawina.
Adalira komasoti adagwigwirira kuti amudalise.”
Mulungu adamugumana ku Beteli ndipo kumuko Mulungu adayankhula nase.*
5 Yahova Mulungu wa magulu ya nkhondo yakudzulu,
Akumbukiriwa na dzina yakuti Yahova.
6 “Ndipomwapa bwerera kwa Mulungu wako.
Umbawonese chikondi chokhulupirika na chilungamo,
Ndipo nthawe zose umbadikhirire Mulungu wako.
7 Koma wamalonda anakilo iribe chilungamo m’manja mwake.
Iye akonda kuba.
8 Efuraimu akupitiriza kunena kuti: ‘Inepano nalemeradi,
Nagumana chuma.
Pa basa zangu zose, palibe yemwe angagumane chophonyeka panango chimo.’
9 Koma inepano ndine Yahova Mulungu wako kundochokera* pomwe wenze ku Iguputo.
Nidzakuchitise pomwe kukhala m’matenti,
Ninge pantsiku zachikondwerero.
10 Nidayankhula na aneneri,
Ndipo nidawawonesa masomphenya yazinji.
Nidayankhula mafanizo kupitira mwa aneneri.
11 Ku Giliyadi wanthu akuchita vosowa chilungamo komasoti akuyankhula mabodza.*
Ku Giligala, ankupereka ntsembe ng’ombe zimuna.
Ndipo maguwa yawo ya ntsembe yali ninge mahopo ya minyala m’munda.
12 Yakobo adathawira mudera ya Aramu.*
Ndipo Izirayeli ambaphata basa kumuko kuti agumane nkazi,
Ambadikhirira nkhosa kuti agumane nkazi.
13 Yahova adaphatisa basa mneneri kubulisa Aizirayeli ku Iguputo,
Ndipo mneneri ambadikhirira Aizirayeli.
14 Efuraimu wakalipisa maninge Mulungu.
Mulandu wake wamagazi uli pa iye,
Ndipo Ambuya adzamubwezere kunyoza kwake.”