Hoseya
11 “Izirayeli pewenze mulumbwana nidamukonda,
Ndipo nidachemera mwana wangu muyu kuti abule mu Iguputo.
2 Pomwe iwo* ambawachemera maninge,
Ni pomwe iwo ambawathawa maninge.
Ambapereka ntsembe kwa vifaniziro va Baala,
Ndipo ntsembe mwizo ambazipereka pomwe kwa vifaniziro vogoba.
3 Koma ndine nidapfunzisa Efuraimu kufamba, ndipo nimbamunyamula m’manja mwangu
Koma iye alibe kubvuma kuti ndine nidamupolesa.
4 Nimbawakwekweta mokoma ntima komasoti mwachikondi,*
Kwa iwo nenze ninge wochosa djoko m’khosi* mwawo,
Ndipo mwachikondi nimbabweresera aliyese chakudya.
5 Iwo adzabwererelini ku dziko ya Iguputo, koma Asuri adzakhale mpfumu yawo,
Ndawa adalamba kubwerera kwa inepano.
6 Chibemba chidzazungulire m’mathaundi yake
Ndipo chidzadzonge mipiringidzo* nkupha wanthu ndawa ya voipa vomwe ambafuna kuchita.
7 Wanthu wangu atsimikiza kuti akhale osakhulupirika kwa inepano.
Olo kuti adawachemera kuti ayende kudzulu,* palibe yemwe adaimirira.
8 Ko ningakusiyire chani iwepo Efuraimu?
Ko ningakuperekere chani kwa azondi iwepo Izirayeli?
Ko ndawa chani ningakuchitire vinthu ninge Adima?
Ko nikuchinjirenyi kukhala ninge Zeboyimu?
Koma nachinja maganizo yangu
Ndipo nayamba kukubvera ntsisi.
9 Nidzawoneselini pomwe ukali wangu wogaka moto.
Nidzadzongelini pomwe Efuraimu
Ndawa ndine Mulungu, osati munthu.
Ndine Wochena pakati panu,
Ndipo nidzabwerelini kwa imwepo niri wokalipa.
10 Iwo adzatewere Yahova ndipo iye adzabangule ninge mphondolo.
Ndipo akadzabangula, wana wake adzabwere ankunjenjemera kuchokera kumaulo.
11 Iwo adzabwere ankunjenjemera ninge mbalani akambadzachokera ku Iguputo.
Adzabwere ninge njiwa kuchokera ku dziko ya Asuri.
Ndipo nidzawakhazike m’nyumba zawo,” wanena teno Yahova.
12 “Efuraimu aniuza mabodza yokhayokha.
Kulikose komwe ninganyang’ane, nikuwona kusowa chilungamo kwa Izirayeli.
Koma Yuda ankupitiriza kufamba na Mulungu,
Ndipo iye ni wokhulupirika kwa Wochena Maninge.”