Hoseya
13 “Efuraimu akayankhula, wanthu ambanjenjemera.
Iye wenze wolemekezeka mu Izirayeli,
Koma adagumanika na mulandu wotumikira Baala ndipo adafa.
2 Manje iwo ankuchita machimo yanango,
Ndipo ankuphatisa basa siliva wawo pakukonza vifaniziro vasimbi.*
Akonza mafano mwaluso, koma vose vimwevi ni basa za amisiri.
Iwo auza mafano mwayo kuti: ‘Amuna opereka ntsembe abejali mafano ya wana wa ng’ombe.’
3 Manje iwo adzakhale ninge mitambo ya nthawe ya kumachibese,
Komasoti ninge mame yomwe yachebwalini kuuma.
Adzakhale pomwe ninge mungu womwe uuluzika na mphepo kuchokera pamalo yopulira mbewu,
Komasoti ninge utsi womwe ubula mu chochosera utsi kudenga.
4 Koma inepano ndine Yahova Mulungu wako kuchokera* pomwe wenze ku Iguputo.
Palibe Mulungu munango yemwe umbamudziwa kupatulapo inepano.
Palibe pomwe mpulumusi munango kupatulapo inepano.
5 Inepano nidakudziwa uli muchipululu, mudziko yachilala.
6 Iwepo udakhuta ndawa wenze na vakudya vizinji.
Udakhuta ndipo ntima wako udayamba kumeka.
Ndipo udaniyebwa.
7 Inepano nidzakhale ninge mphondolo yamphanvu kwa iwo.
Ninge nyalugwe yemwe wabishala m’balim’bali mwa njira.
8 Nidzawabwerere ninge chimbalangondo chomwe wana wake asowa,
Ndipo nidzawang’ambe pachifuwa,
Kumuko nidzawadye ninge mphondolo.
Chilombo chakuthengo chidzawakhwadzulekhwadzule.
9 Chidzakudzonge iwepo Izirayeli
Ndawa yakuti udanisiya inepano mthandizi wako.
10 Manje iri kuponi mpfumu yako, kuti ikupulumuse m’mathaundi yako yose?
Olamulira* wako ali kuponi omwe udawauza kuti,
‘Nipaseni mpfumu komasoti atsogoleri’?
11 Nidakupasa mpfumu niri wokalipa,
Ndipo nidzaichose niri wokalipa.
12 Vophonya va Efuraimu vakulungiwa,*
Ndipo machimo yake yasungiwa.
13 Vowawa ninge va nkazi yemwe ankubereka vidzamubwerere
Koma iye ni mwana alibe nzeru,
Ndawa nthawe yakuti abadwe ikakwana, adzabwerelini kuti abule.
14 Inepano nidzawapulumuse wanthu wangu ku mphanvu za Manda.*
Nidzawapulumuse ku impfa.
Iwepo impfa yemwe ubweresa kuwawa kogopsya, ko mphanvu yako iri kuponi?
Iwepo manda, ko mphanvu yako yodzonga iri kuponi?
Koma Efuraimu nimubverelini ntsisi.
15 Podiya kuti wakula bwino pakati pa ntsanga,
Mphepo yakumachibese idzabwere, mphepo ya Yahova.
Idzabwere kuchokera kuchipululu nkuumisa nchera wake na ntsantsa yake.
Munango adzadzonge chuma chake chose chodula maninge.
16 Samariya adzatongewe ndawa wapandukira Mulungu wake.
Iwo adzaphewe na chibemba.
Wana wawo adzaphwanyiwephwanyiwe.
Ndipo akazi wawo wamimba adzatumbuliwe.”