Hoseya
10 “Izirayeli ni muti wa uva wodzongeka* womwe unkubereka vipaso.
Pomwe vipaso vake vinkuwanda, ni pomwe ankumanga maguwa yazinji.
Pomwe vokolola vinkuwanda mudziko yake, ni pomwe ankumanga vipilala vopatulika vokhuza maninge.
2 Ntima wawo ulibe chilungamo.*
Manje iwo adzagumanike na mulandu.
Pali munango yemwe adzagwese maguwa yawo ya ntsembe komasoti vipilala vawo vopatulika.
3 Manje iwo adzanene kuti: ‘Tiribe mpfumu ndawa tiribe kugopa Yahova.
Ndipo ko mpfumu ingatichitire chani?’
4 Iwo ayankhula mawu mosowa nzeru, alumbira monama komasoti achita mbverano.
Ndipomwapa chiweruzo chomwe chinkubwera chiri ninge vomera vapoizoni m’munda.
5 Wanthu wa ku Samariya adzachite mantha na fano ya mwana wa ng’ombe ya ku Beti-aveni.
Wanthu wake adzailirire.
Nawombo antsembe wa mulungu wachilendo, omwe ambakondwa na fano mwiyo komasoti ulemerero wake, adzailirire.
Ndawa idzatengewe nkuyendesewa ku dziko inango.
6 Munango adzayende nayo kudziko ya Asuri nkukaipereka ninge mphaso kwa mpfumu ikulu.
Efuraimu adzachitisiwe manyazi,
Ndipo Izirayeli adzachite manyazi ndawa ya malangizo yomwe ambatewedza.
7 Samariya pabodzi na mpfumu yake adzadzongewe,*
Ninge kanthawi kothyolewa m’muti komwe kankuyangalala m’madzi.
8 Malo yokwizika ya ku Beti-aveni, yomwe ni chimo ya Izirayeli, yadzadzongewe.
Minga na vitsamba volasa vidzamere pamaguwa yawo ya ntsembe.
Wanthu adzauze mapiri kuti: ‘Tifuchireni!’
Adzauze pomwe mapiri yang’onoyang’ono kuti: ‘Tigwereni!’
9 Imwepo Aizirayeli, mwakhala munkuchimwa kundoyambira panthawe ya vochitika va ku Gibeya.
Kumuko wanthu adapitiriza kuchimwa.
Nkhondo iribe kudzongeratu wanthu wose osalungama wa ku Gibeya.
10 Nikadzafuna nidzawalange.
Wanthu wa makhaindi yanango adzasonkhane kuti alimbane nawo,
Pomwe adzamangiririwe djoko ya vophonya vawo viwiri.*
11 Efuraimu wenze ng’ombe yopfunzisiwa bwino yokonda kupula mbewu,
Ndipomwapa inepano niribe kudzonga khosi yake yokhuza.
Koma nidzachitise kuti munango apakire pansana pa Efuraimu.
Yuda adzalime, Yakobo adzamusalazire vibuma va dothi.
12 Bzalani mbewu zachilungamo ndipo kololani chikondi chokhulupirika.
Limani munda pa dothi yabwino,
Pomwe muli na nthawe yofagafaga Yahova,
Mpakana iye kubwera nkukulangizani mwachilungamo.
13 Koma mwalima voipa,
Ndipo mwakolola vinthu viribe chilungamo.
Mwadya vipaso vanu viribe chilungamo.
Ndawa munkuthemba vochita vanu,
Komasoti kuwanda kwa masocha yanu.
14 Pakati pa wanthu wa makhaindi yanu padzakhale chipiringu.
Ndipo mathaundi yose yokhala na mipanda yolimba yadzadzongewe,
Ninge momwe Salimani adadzongera Beti-aribeli
Pantsiku ya nkhondo, pomwe azimayi na wana wawo adawagayagaya.
15 Imwepo wanthu wa ku Beteli, munango adzakuchitenimbo vimwevi ndawa ndimwe woipa maninge.
Shuwadi, mpfumu ya Izirayeli idzadzongewe* kumadandakucha.”